KAHBHAO 22

Isak Jakei Moila Shuohhen Epü

1Kanja angpheikü Kahvangi Abraham kü dok. Büpai Abraham kü, “Abraham” shei nyük, hatü büpai, “Ngei hammü nyüpeih” shei e. 2Büpai, “Nüngei halom Isak nüngi bampü ha müei Moriah kahdokei daituh, hatü ngei nüng kü huphahen kahshang hükei büpa jüei jakpü moila shuohtuh” shei e. 3Hanangkü Abrahami dhom mü lomi büpalei gadu kü uotü büpa mü nethe nyi hatü cheha Isak mü, hatü moila jakhen pü yah-ei kotü Kahvangi büpa kü hushuohpü tailu shing hükei dai. 4Nyih jempabü kü Abrahami ngangei veishingkü hapa shing tailuei eeteke. 5Hahepak kü Abrahami nethepa nyi kü, “Gadu mü hatouei chongkei, naü henji antolei heihhen; henji halei khümtü leikahen” shei e.

6Abrahami moila jakhen püdü yah-ei Isak kü paihü, hatü büpai aw hatü longkhoih notü jiji chemi dai. 7Isaki chepa Abraham kü, “Opa” shei nyük. Büpai, “Oi, ngelei hapeü” shei jang. Isaki, “Aw hatü pü nyüke, shejao jakpü moila shuohhen mi melei nyüpa?” shei phe. 8Abrahami, “Hapeü, Kahvang, büpai-üng jakpü moila shuohhen mi yahphahen hih” shei e. Hanangkü jiji nedoh-i kamei dai.

9Mechem Kahvangi hupü shingei jiji ngoipa, Abrahami halei moidü hük lingtü pü ai jiüei bhaongei haü. Büpai cheha Isak kü shatü moidülei pübhaong shangkü haüteke. 10Hahepak kü Abrahami büpalei longkhoih yahei ngai, hatü cheha jühen yaong. 11Shejao vangsho leipü Shembüpalei phongshani büpa kü, “Abraham, Abraham” shei nyük. Büpai, “Ngei hammü nyüpeih” shei e. 12Büpai, “Nüngi naü kü lak teshih nevaijü büpa kü meheyao tedük; mehenangkü nüngi Kahvang kü nyemnyüke, hatü laophülei halom hük mon nyupü dangkao ngei kü moilahen kaungei nenyu shei ngei nyingteke” shei e. 13Abrahami yaakei veishuohjü mi baongha hük phenha kü vaungi mantü ee. Abrahami heih-ei hapa mi yah-ei cheha nangjei jakpü moila shuoh. 14Hanangkü Abrahami hapa shing kü, “Shembüpai shuohnyüpeih”#Hebrew shah mü, “Jehovah Jireh” shei eehen. shei men, hatü shinnyih thahshi, “Shembüpai kahshangei shuohnyeih” shei enyüke.

15 Shembüpalei phongshani Abraham kü vangsho leipü nyipabü nyüktü, 16“Ngei, ngei nyingi lahtepih shei Shembüpai enyüke: Nüngi nüngei halom dangkao shümei nedoh-i ha dükpü nangkü, 17ngei nüng kü moihimanhen, hatü nüngei lihila vangsho lithathü kei hatü yungching bhihhiphang kei daeisheyei leihühen. Nüngi ngelei shah bangpü nangkü nüngei hühihathüi vepathülei chingnyüthü kaamlanghen, 18hatü nüngei lihilathü homei kahdoknyü jatthü peü moihiman danghen; mehenangkü nüngi ngelei shah bangteke” shei e. 19Hanangkü Abrahami büpalei chongphopü nethepa nyi touei nyokei lei, hatü jom peü Beershebalei leiyei halei nyu.

Nahorlei Hühihathü

20Kansho hük pheikü chenaü Nahorlei chenyüha Milkah-i yeshang shet bühpüja shei Abrahami dan: 21Hashongpa Uz, chenaü Buz, Kemuelü Aramei chepa, 22Kesed, Hazo, Pildash, Jidlaph hatü Bethuel nyuteke. 23Bethuelü Rebekahlei chepa nyu. Hathü jom shet Abrahamei chenaü Nahor kü Milkah-i bühjapü hapeüthü nyu. 24Nyeinya vaishi büpalei yiükphü Reumah-i Tebah, Gaham, Tahash hatü Maakah hathü bühjateke.

Currently Selected:

KAHBHAO 22: PHOMBSI

Highlight

Copy