KAHBHAO 21

Isak Bühpü

1Shaang Shembüpai epükei Sarah kü moihiman hatü Shembüpai Sarah kü lahtükpü dük. 2Shaang Sarah büm nekongi lei, hatü Kahvangi lahpü kü jiüshi Abraham viüdaitü yeshang hük büh. 3Sarah-i bühjapü naü kü Abrahami Isak shei men. 4Kahvangi büpa kü epükei Abrahami Isak nyih shetpabü kü shuw japtük. 5Cheha Isak bühpü hepak kü Abrahamü bong kho hük nyuteke. 6Shaang Sarah-i, “Kahvangi ngei kü nyihübenüng koei peiküteke; ha jung danpü peüi ngei kü nyiphahen khih” shei e. 7Shao pinnyüi, “Sarah-i Abraham kü hapeü bühjahen shei üpai deihshi nyupa? Shejao büpa viüdai pheikü ngei büpa kü yeshang hük bühjapeih” shei e.

8Hapa naü long, hatü hapa naü nük hah-ei pangpü nyih Abrahami mo longpü hük moteke.

Hagar hi Ishmael Nyi Deitükpü

9Shejao mechem Sarah-i Ijip am aa lanyü Hagar-i bühpü Ishmael mü cheha Isak ngateiyei eepa, 10pinnyüi Abraham kü, “Hapa aa lanyü hatü cheha nyi changtüktuh; mehenangkü hapa aa lanyülei chehai ngelei hapeü Isak mü mükjüp nehanteihüpih” shei e. 11Cheha nangkü hapa shahhidou-ü Abraham kü longi mongshang vaiteke. 12Shejao Kahvangi Abraham kü, “Anha hatü aa lanyü nyi nangkü nüng mongteshang; Sarah-i epü keiha düktuh; mehenangkü Isak homei mon nüngei li shei nyuhen. 13Aa lanyülei hapeü nang keyü ngei büpayao jat hük leihühen; mehenangkü büpayao nüngei li” shei e.

14Nepphei lomi Abrahami hahying hanei hatü yinghen yung yah-ei Hagar kü bhagchongei chanhütü cheha jiji deitük. Pinnyü daiyei Beersheba jahpanei paüeiyonei longtei.

15Mechem koei daipü yung kemdaipa, pinnyüi naü pü hük phangei tuhphong. 16Hapheikü pinnyüi lahhan kappü daiyei vüpü shing shük taishi daiyei uoteke; mehenangkü pinnyüi, “Ngelei hapeü dipü ngelei müki neveihahhüang” shei e. Pinnyü halei daiyei wongmü thep. 17Kahvangi naü theppü dan, hatü vangsho phongshani vangsho leipü Hagar kü nyüktü pinnyü kü, “Hagar, nüng mehekei mongshangnya? Nüng tenyem; mehenangkü naü nyupü shing leipü naüei ngeü Kahvangi danteke. 18Yaongei heih-ei naü yah-ei paümtü yawhlangtuh; mehenangkü ngei büpayü jat longpü hük leihühen” shei e. 19Hahepak kü Kahvangi pinnyülei mük apshuoh, hatü pinnyüi yungkuk hük ee. Pinnyüi heih-ei yung maei shoei leiyei naü kü yung yinghen shuoh.

20Ha naü longyaki Kahvang hapa naü mü nyu, hatü büpa Paran jahpanei nyu, hatü sikari shennyak meipü leiteke. 21Paran jahpanei nyushi chenyüi büpa shing Ijip leipü yiük hük yahteke.

Abraham hi Abimelekh Nyi Vangteipü

22Hahepak kü Abimelekh-i büpalei veshan mübü Phikol mü heih-ei Abraham kü, “Kahvangü nüng hatü nüngi dükpü lemphü mü nyüke. 23Shaang nüngi Kahvangei men kü ngei mü, ngelei hühihathü mü nevaijü ngei phei kübüthü mü lueilemei nelingpih shei ngei kü lahshih. Ngei nüng mü hingshangi nyupü keiha nüngiyao ngei hatü nüng nyupü kahmük kü hingshangi nyuhen lahshih” shei e. 24Abrahami, “Ngei lahnyüpeih” shei e.

25Mechem Abrahami Abimelekh kü Abimelekhei chongphobüthüi yungkuk yahlangpü nang eshuohpa, 26Abimelekh-i, “Ha üpai dükpa, ngei nenyingangpih; nüngiyao ngei kü ne-epha; ngeiyao shinnyih-ang ha dannyeih” shei e. 27Hanangkü Abrahami mi hatü mohohbaongthü yah-ei Abimelekh kü shuoh, hatü jijinyi-i vangpüshuwpü ling. 28Abrahami mi chebihathü hayaoha nyet khaatei dei. 29Abimelekh-i Abraham kü, “Nüngi mi chebiha nyet hayaoha khaatei deipü lappeyü meheang?” shei phe. 30Büpai, “Hapa yungkuk ngei-i shoupeih shei nüngiyao denpü vaihen shangmü nüngi ngelei lak leipü hapa mi chebiha nyet yahtuh” shei e. 31Hanangkü hapa shing kü Beer-sheba#Beer-sheba lappü, “Vangteipü yungkuk” shei epü nyüke. shei nyüknyüke; mehenangkü jijiphen hatouei vangteiteke. 32Jijinyi Beer-shebalei vangpüshuwpü lingpheikü Abimelekh hi veshan mübü Phikol nyi Philistia kahdok yemei leidai. 33Abrahami Beer-shebalei tamarisk pü hük sheiteke, hatü Shembüpa, Nedohnetenpü Kahvang kü khümteke. 34Hatü benha hük keiha Abrahami Philistia kahdokei hepak luangi nyu.

Currently Selected:

KAHBHAO 21: PHOMBSI

Highlight

Copy