MATHIU 9

Jisu nou Pothaimai Aliye Souvei Peiyu

(Mk 2.1-12; Lk 5.17-26)

1Alia Jisu nou sakhao alihi louloua zai nasü tachopoa lah puhvei nuhduhi khaivere. 2Alia zhukhaio, sühinou mai kamainou züh vanou züyu pothaimai aliye Jisu hi pove. Alia Jisu nou puletao vei lü hai ngaoloua, pothaimainahi paoe, “Lesalo, Anahna! Nemah taosü khaipeire.”

3Süthaisü razhai dou-apeimai kamainou lah puletao kheihaohi paoe, “Mai haina hai Ramaiye paoshiwe!”

4Puletao nou choyu sü Jisu nou süloua paoe, “Neletao daidonou haibüyu tsüshi chowe? 5Daiolouzü, ‘Nemahtao khaipeire,’ tea paoyu laho, ‘Lashuloua takhaio,’ tea paoyu nou lahie? 6Sükulouzü Enou neletao hi Mai Nahpoutuhai deiphao hi mah khaipeilou süyu khouko bue, touyu vei zhopaoh peilai.” Südonou puhnou pothaimai nahi paoe, “Lashulo ea ne züh poloua kihi taveo!”

7Mai sünanou lashuloua puh kihi tavere. 8Maisounou süsü ngaoloukhaie khupaloure ea emai hi sübüyu khouko peiyu vanou Ramaiye paosho loure.

Jisu nou Mathiuye Kulouyu

(Mk 2.13-17; Lk 5.27-32)

9Jisu nou buh süsü thaowu-a takouyu phahinou kikha khayu Mathiuye puhvei vahki hinou chobua buyu sü ngaoloure. Puhnou puh hi paoe, “Athai fülo.”

Alia Mathiu nou shuloua puhthai fütare.

10Alia zhukhaio, Jisu nou Mathiu ki hinou vai-a bubukinou kikha khamai taoli ea kukhe mahmai taolinou taveloua Jisu ea puh rozümaitaoye koa arübuh hinou kou buloure. 11Alia Phariseemai kamainou haisü ngaolouyu kisü, puletao nou puh rozümaitaohi noue, “Daidonou neletao vei dou-apeio nou kikha khamaitao ea mahmaitaoye koa toushowe?”

12Ana Jisu nou süsü choulouyu kisü chila peie, “Pfüphao veimaiye donou pou-apeimai halia koyu hae, ana lishi maitao likhei donou kobaie. 13‘Enou züpayu süwo louzü zhuvea peiyuna baie, posheelayuna moe,’ tea sheeyu larübvü hinou paokhai touyu kosü daisa touyu hai taho phoupa loukhaio. Daiolouzü Esü cheche maiye kure donou vemoe, ana mahmaiye kure donou baie.”

Lühyu vanou Chi Nouyu

(Mk 2.18-22; Lk 5.33-39)

14Süthaisü Johan Baptist rozümai taonou taveloua Jisu hinou noue, “Daidonou Phariseemai ea Ehnou lüh zhazhawe, ana nevei rozümaitaowo lühkhai tamoe?”

15Jisu nou puletao hi paoe, “Sheenghiyu buh hi shemaitao nou sheerepunou puletaoye koa bubusasü levea-a bulou süwu? Sükulouhoe! Ana sheerepuye puletao hinou potalaiyu teithesü velai, alia sükinou puletao sü lühlai.

16“Maitalinoua sahkuhi sah sheenou khokhaimoe, daiolouzü sheetouyu sahpe sünanou paitsüloua khoyu buh hisü lejünou dupua souphapuwu baiwe. 17Moa maitalinou-a darkha zhaoh ashu hai souheebvü akuna hi thoutamoe, hakinou thoulouzü souheebvü taosü pfükhowulai ea darkha zhaoh sü küpalai, alia souheebvü taosü soushiwu bailai. Süjüwo darkha zhaoh ashuhai sheetouyu souheebvütao hi lathou baiwe ea sübüa sühaisü veishoa khailou baiwe.”

Vahdumaina Nah Naotupai ea Jisu Sah Noukai Deiyu Naotupai

(Mk 5.21-43; Lk 8.40-56)

18Jisu nou sübüa puletao hi paobukinou, Jihudimai vahdumaina alinou puh hi taveloua kou puh nghojünou khou khüloua paoe, “Anah naotupai hai chuphabü hinou thaihie; ana tave nebahnou puh vahi pokhai peio, alia puh sü hriloulai.”

19Südonou Jisu nou shuloua puhthai füloua tare, alia puh rozümaitao-a puhye koa tare.

20Alia zhukhaio, po kiahai zhe küa buyu naotumai alinou Jisu thailo takouloua puh sahnoukai kou deiloure. 21Daiolouzü puh lahnou haibüa, “Enou puh sahnoukai likhei deiloubai-a Ehai veiloulai,” tea paoe.

22Jisu nou reivekhaie naotupaiye ngaoloua paoe, “Anahpai, lesalo! Nevei lünou neye souvei peire.” Sübü hinou naotupai sü veiloure.

23Süthaisü Jisu nou vahdumaina kihi tavere. Alia maikhe mainou po-vu sümoa raopoyu ea povure mainou sha-be houa lousouyu ngaoloukhaie, 24puhnou paoe, “Maikhemai hrülai, vakou tapalouwo; daiolouzü nahpai sü thaimoe, ana puhwo zhibaie!” Sükisü maikhe mainou puhye konü loure. 25Ana maikhe maiye vakouhi panou tapalou bükhaie, Jisu nou loupai sünanou buyu kidehi talouloua puh bahsü kou keiloure, alia puhsü shuloure. 26Alia ko süsü teidei süna buh liki kubou loure.

Jisu nou Nghichamai Ahaiye Souvei Peiyu

27Jisu nou buh sünasü thaowu-a tare, alia puhnou sübüa takoukhaie, nghichamai ahai nou puhthai füpoa tare. Puhainou, “David Nahpoutu, Ehye zhuvea peio!” tea shusoua raoloure.

28Jisu nou kikhahi talou louyu kisü, nghichamai sühainou puh hi tave, alia puhaihi Jisu nou noue, “Enou nehaiye souvei peilou süe touyu nehai louchewu?”

Puhainou chila peie, “Ovai, Mapao!”

29Süthaisü Jisu nou puhai nghisü deiloua paoe, “Nehai lü thaifüa, süsü nehaihi panou paloutheo!” 30Alia puhai nghithousü ngaoloure. Jisu nou puhaihi tukha-a paoe, “Haihai maitali hi-a paongao khaiso!”

31Ana puhai nou taloua Jisu kosü teidei süna buh likihi paongao tare.

Jisu nou Lahamai Aliye Souvei Peiyu

32Mai sühainou taloubükhaie, zhukhaio, mai kamainou rashinou louyu vanou la ha-a buyu mai aliye Jisu hi save. 33Ana rashinaye sü hutalou bükhaie, mai sünasü chi paopa loure, alia maikhemai hrülainou khupaloua paoe, “Ehnou hatakia Israelmai hrohinou haibüyu hai ngaokhai mohie!”

34Ana Phariseemai taonou paoe, “Rashitaoye hulai payu khouko hai rashitao peichana nou puh hi peibaie.”

Jisu nou Maikhe maiye Zhuvea Peiyu

35Jisu nou nuhdutao ea nuh veishisü tasühao-a zhutae. Puhnou rathobuhtao hinou doupeie, Vedei vei Ko Avei nasü paodoupeie, alia lishia buyu ea sounou tyalinou soua buyu maikhe maiye souvei peie. 36Puhnou maisouye ngaoloukhaie, puletaoye sü zhuveasho loure, daiolouzü puletao sü zhaokhowo hayu zhaotutao büa vea-a ea soukha peiremai ha-a bue. 37Südonou puhnou puh rozümai taohi paoe, “Cha chire alaosou bue, ana cha chipeiremai sü chie. 38Südonou cha Mapaowo hinou puh vei douhi cha chire maiye seive peire donou veachi paokhaio.”

Currently Selected:

MATHIU 9: POUMBSI

Highlight

Copy