MATHIU 10

Sei-atamai Kiahai

(Mk 3.13-19; Lk 6.12-16)

1Jisu nou puh rozümai kiahaitaoye kuve dzüloua puletao hi rashitaoye hupa loure, sou tyali ea lishi maiye souvei loure khouko peire. 2Sei-atamai kiahaitao zhihsü haire: raikaia Pitar tea kuyu Simon ea puh thaihou Andrew: Zebedee nahpoutuhai Jems ea puh thaihou Johan; 3Philip ea Bartholomew; Thomas ea kikha khawo Mathiu; Alphia nahpoutu Jems, alia Thaddias; 4Kana himai Simon, alia Jisu ye ngaobamai bah hi thoupeiyu Iskariot Judas.

Rozümai Kiahaiye Vakou Seitayu

(Mk 6.7-13; Lk 9.1-6)

5Jisu nou mai kiahai haitaoye khekouhi chitaohai paopeia vakouhi seitare: “Tahrüh kukhemai teidei talihi-a taso moa Samaritan tamai nuhdutao talihi-a talouso. 6Ana süjüwo neletao nou hayu zhaotu, Israel maitaohi tahokhaio. 7Alia neletao nou taho haibüa, ‘Raki Vedeisü ngheire’ tea paodoukhaio. 8Sounou maiye souveipeio, thaimaiye souhri peio, loukhaora soumaiye soushee peio, rashitaoye hupapeio. Neletao nou sa-a ngaoloubaie, südonou sa-a peikhaio. 9Neletao vei shavühi sana, husha moa shanou talia pfüso; 10neletao veihdu donou lekha, zao ahai, phikha moa süpo talia pfütaso; daiolouzü vah souyumai alihai puh touso ngaotou züe.

11“Neletao nou nuhdu moa nuh talihi talouyu kisü neletaoye sasa-a shepeiremai kamaiye phoulouwo, alia neletao nou buh süsü thao-a tamo koutesü puhye koa buwo. 12Neletao nou ki sühi talouyu kisü, ‘Nehi kaonayu buloutheo’ tea paokhaio. 13Ki sühi buyu maitao nou neleye sasa-a shepei louzü, neletao vei kaonayu sü sühi panou bukhaio, ana puletao nou neletaoye sasa-a shepei molouzü, süthaisü neletao vei kaonayu nasü neletao hi lukhailo. 14Alia maita linou neletaoye shepei balouzü moa neletao chi keipei molouzü, neletao nou ki süna moa nuhdu süna thaowu-a tayu kisü neletao phi hinou naisü sülaiwuwo. 15Enou neletao hi chechenou paowe süolouzü Chikuyu Teithe zhousü nuhdu sünavei maitao jünou Sodom ea Gomorrah maitaoye nou Ramai nou koua zhuvea peilai!

Vere Souvea-souholaiyu

(Mk 13.9-13; Lk 21.12-17)

16“Keikhaio! Enou neletaoye zhaotu büa nüseitao hrohi seitawe. Südonou neletao nghoutao büa kailo ea khaotao büa nashalo. 17Maikhe maiye zhutoulo; daiolouzü puletao nou neletaoye niloua chikuki hi savelai, alia neletaoye rathobuhtao hinou dapeilai. 18Alia Avanou neletaoye puletao ea Tahrüh kukhemai nghojünou zhopaoh soure donou teidei khomai ea Vemaitao nghojühi savelai. 19Puletao nou neletaoye chikure donou saveyu kisü, neletao nou daichi paolaisa moa kabüa paolaisa tea dowuso; daiolouzü neletao nou paore nasü teilecho sühinou neletao hi peilai. 20Daiolouzü neletao nou paore chitaosü neletao vei laimoe; ana sütaohai neletao Puovei Rakonou neletao lekhe hinou paopa peilai.

21“Thaihou jürainou lah thaihou jüraiye southeare donou thoupeilai, alia puokhemaitao-a sübüa puletao nahmai taohi soulai; nahmaitao-a puletao pfüpuomai pei hi motouloua puletaoye southealai. 22Alia Azhih vanou mai hrülainou neletaoye ngaoralai. Ana akhai koute healouyu puhye sü khaipeilai. 23Puletao nou neletaoye nuhdu ali hinou souveayu kisü, kukhe alihi tuvelo; daiolouzü cheche vuzü Enou neletao hi paowe, neletao nou Mai Nahpoutu nou vemo jühisü Israel nahmaitao vei nuhdu taohi taveche louhoe.

24“Doumai li-a puhvei dou-apeio jünou dumoe; moa kilai alihai puhvei paopu jünou dumoe. 25Südonou doumai alihai puhvei dou-apeio bülouzü khabaie, alia kilai alihai puhvei paopu bülouzü khabaie. Ki paopuye puletao nou Beelzebul tea kulouzü, daizhozhou koua puletao nou puh kikha maitaoye shishoyu zhihnou kulaisa!

Thaohye nou Pilai

(Lk 12.2-7)

26“Südonou puletaoye piso; daiolouzü popangaolai moyu hokhaikhai touyu halia hae, moa kukhaitoua sülai moyu alia hae. 27Enou neletao hi teizhi hinou paopeiyu nasü neletao nou teiva hinou paovuzükhaio, alia neletao nou kheia choulouyu nahai kipei hinou pa shakhaio. 28Alia pfüphaoye southealou khaia rakoye southealou hoyu puletaoye piso; ana pfüphao ea rako ahaiye koa meizaihi pothou souhalou süyu Ramaiye pilo. 29Khaitou ahaiye pousha alinou zholoubai mowu? Sütoukhaia neletao Puo leli hinou moa khaitou ali koutea deiphihi dekoumoe. 30Ana neletaoye donou louzü, neletao pei hi peishu teitei-a chochewu-a bue. 31Südonou neletaowo louzü khaitou taoli jünou muh kousho hie.

Khristaye Aetouyu ea Motouyu

(Lk 12.8-9)

32“Südonou Eye maikhemai nghojünou aetou peiyu mai taliye sü Enoua, puhye sü rakibu Apuo nghojünou aetou peilai. 33Ana Eye maikhemai nghojünou motouyu mai taliye sü E-a rakibu Apuo nghojünou puhye sü motoulai.

Kaonayu donou Moe, ana Khoche Donoue

(Lk 12.51-53; 14.26-27)

34“Deiphaohi kaonayu povere donou Ehai vewe tea chowuso. Moe, kaonayu povere donou E vemoe, ana khoche povebaie. 35Daiolouzü Enou nahpoutuye panou puhpuo pei hi, nah naotupaiye panou puhpfü pei hi, alia mouye panou puhnai pei hi motoure donou vebaie; 36alia mai alivei ngaobamai hai lah puh kihikha maitao bailai.

37“Ajünou puhpuo moa puhpfüye leshi kouyu maitali sü Arozümai souzü moe; alia Ajünou puh nahpoutu moa puh nah naotupai ye leshi kouyu puhsü Arozümai souzü moe. 38Alia puhvei kros pfüloua Athai fülou moyu maitalisü Arozümai souzümoe. 39Lah hrümai khailu paloure te-a buyu maitali nou süsü ha-kabailai, ana Eye donou puh hrümai ha-kayu puhnou süsü ngaoloulai.

Buutao

(Mk 9.41)

40“Neletaoye shepeiyu maitalinou Eye shepeiwe; alia Eye shepeiyu maitalinou Eye seiveyu puhye shepeiwe. 41Rachi paolamai aliye shepeiyu maitalinou puh hai rachi paolamai aliyu donou, rachi paolamai alivei buusü ngaolai, alia achechemai aliye shepeiyu maitalinou puh hai achechemai aliyu donou, achechemai alivei buusü ngaolai. 42Alia maitalinou Arozümaitao hronou tainou kayu aliye dzükao paili koute peilouzü, puh hai Arozümailiyu donou, chechevuzü Enou neletao hi paowe, puh buusü hatakia hakhai laimoe.”

Currently Selected:

MATHIU 10: POUMBSI

Highlight

Copy