MATHIU 6

Maiye Peiyu vanou Doupeiyu

1“Maikhemai nghojünou puletaoye panou ngaoloure neletao vei rahrüzhai tayu zhaidotao soungao more donou leikeilo. Neletao nou haitaohai dua soungao louzü rakibu neletao Puo hinou neletao nou buu lia ngaolai moe.

2“Südonou nenou toure hamaiye hatali peiyu kisü aveikho soumainou rathobuhtao ea luducho hinou souyu büa maiye podangaoso. Maikhe maiye panou puletaoye paosho loure donou sübüa puletao nou soue. Enou neletao hi paowe, puletao nou puletao buusü ngaoche loure. 3Ana nenou toure hamaiye soukhayu kisü nebah zhoulonou soua buyu nasü panou nebah nalo naye süwuso. 4Sübülouzü nenou souyu nasü kheivah baie. Alia kheia ngaoyu ne Puonou neye buu peilai.

Veachi Paoyu vanou Doupeiyu

(Lk 11.2-4)

5“Neletao nou veachi paoyu kisü aveikho souyumai büwuso. Puletao nou mai hrülaiye panou puletaoye ngaoloure donou rathobuhtao ea ludukai hinou la-a veachi paoyu züpae. Enou neletao hi chechenou paowe, puletao nou puletao buusü ngaoche loure. 6Ana nenou veachi paoyu kisü ne kikhahi louloua kikhu khuwo ea ngaomoyu ne Puohi veachi paokhaio. Alia nenou kheia souyu ngaoa buyu ne Puonou neye buu peilai.

7“Neletao nou veachi paoyu kisü tahrüh kukhemai büa hako chinou alaosou paowuso, daiolouzü puletao nou veachi paoshoyu vanou Ramai nou puletao pai keipeiwe tea chowe. 8Puletao büwuso. Neletao Puonou neletao nou khomo jünou neletao nou moshilaiyu sü rai-a süwe. 9Südonou haibüa veachi paolo:

‘Rakibu Eh Puo:

Ne zhih soushee peio;

10ne vedei vepeio;

rakihi büa deiphao hi-a nedo soupeio.

11Eh teithetsü touso zhou peio.

12Ehnou-a Ehpao pfümaitaoye khaipeiwuyu büa,

Ehpao khaipeio.

13Alia Ehye athaohi süthailou peiwuso,

ana Ehye ashina hinou vupapeio.’ (Daiolouzü Vedei, khouko ea khouko avasü teisanou neveie. Amen)

14“Daiolouzü neletao nou maikhemai mah khaipei louzü, rakibu neletao Puonou-a neletaoye khaipeilai. 15Ana neletao nou maikhemai mah khaipei molouzü, neletao Puonou-a neletao mah khaipei laimoe.

Lühyu vanou Doupeiyu

16“Alia neletao nou lühyu kisü aveikho soumai büa veayu zhu pongaoso. Daiolouzü puletao nou lühyu hai maiye panou ngaoloure donou puletao zhu sü shira-a laiwe. Enou chekhao-a neletao hi paowe, puletao nou puletao buusü ngaoche loure. 17Ana nenou lühyu kisü, nepah phülo ea pei hi theadzü nalo, 18sübülouzü nenou lühyu hai mai kukhenou sülai moe, ana khei-a buyu ne Puonou neye buu peilai.

Raki hi Kini

(Lk 12.33-34)

19“Rükhao ea hubanou souhalou veiyu, alia vaomainou dakhaoloua vaolou veiyu, deiphao haina hinou lah neletaoye donou kini podzüwuso. 20Süjüwo rükhaonou ea hubanou souhalou hoyu ea vaomainou dakhaoloua vaolou hoyu raki hinou lah neletaoye donou kini podzü khailo. 21Daiolouzü nevei kini buyu hisü ne le-a teisanou bubailai.

Pfüphao vei Ava

(Lk 11.34-36)

22“Nghithou hai pfüphao vei meibvüe. Südonou ne nghithou veilouzü, ne pfüphao sü varulai; 23ana ne nghithou nou veimo louzü, ne pfüphao teitei sü maiteilai. Südonou nehi buyu ava nasü mailouzü, süsü daizhozhou mailaisa!

Ramai ea Kini

(Lk 16.13; 12.22-31)

24“Mailinoua paopu ahaivei qila soulouhoe; daiolouzü puhnou aliye ngaoralai ea kukhe aliye leshilai; moa puhnou alichi zülai ea kukhe alinaye ngaophou laimoe. Neletao nou Ramai ea pousha ahai vei kuvah soulouhoe.

25“Südonou Enou neletao hi paowe, neletao nou hriloure donou dai toulai, dai sholai; moa neletao pfüphao donou dai ba-noulai tea dowuso. Hrirai nanou touso jünou ea pfüphao nou sahnü jünou muh kouhi mowu? 26Zhaosühao-a laiyu raohoutaoye zhukhaio; puletao sü thoutai vuthou moe, moa cha chiloua thoupaohi pove dzükhai moe; sütoukhaia rakibu neletao Puonou puletaoye vaitou peiwe! Neletaowo puletao jünou muh koushohi mowu? 27Alia neletao hronou thaohmainou doyu vanou lah hrümaiye panou daotu maipulou süe?

28“Alia neletaowo daidonou sahnü vanou dowe? Rekouhi poupataonou kazhaibüa hrüpasa touyu neletao nou chokhaio: puletaosü vah soumoe, pha-a sümoe. 29Ana Enou neletao hi paowe, süolouzü Solomon Veo koutenoua puh vei kini süzhou bukhaia poupa sütao hrohinou ali koute büa ngah veia na tumoe. 30Ana rekouhi poudai zhou likhei hriloua doso meifühi pothou deiyu sünaye Ramai nou süzhou veia natupei louzü, puhnou süjünou veikoushoa neletaoye na tupei laimowu? Oh lü taishoyu maitaore!

31“Südonou ‘Eh dai toulai?’ moa ‘Eh dai sholai?’ moa ‘Eh dai bah noulai?’ tea pao-a dowuso. 32Daiolouzü Tahrüh kukhemai taonou sübüyu natao teitei hai phouwe. Rakibu neletao Puonou na sütao veishi hai neletaoye donou kowe touyu sü süwe. 33Ana neletao nou rairaikaia Ramai Vedei ea puh vei acheche nasü phoulo, alia na haitao teitei sü neletao hi thoupu peilai. 34Südonou dosoye donou dowuso, daiolouzü doso-a lah thao doyu bubailai. Naili veayu hai naili donou khabaie.

Currently Selected:

MATHIU 6: POUMBSI

Highlight

Copy