MATHIU 5

Deichi vanou Doupeiyu

1Jisu nou maisouye ngaoloua deichi vahi tapare, alia puhnou kou bulouyu kisü puh rozümai taonou puh hi tave loure. 2Alia puhnou puletao hi haibüa doupeishu tare:

Cheche-a Vayu

(Lk 6.20-23)

3“Rako hinou lülouhoe tea süa bumaisü rakoveie;

daiolouzü raki Vedeisü puletao veie!

4Dopfüa bumaisü rakoveie;

daiolouzü puletaoye souva peilai!

5Nasha-a bumaisü rakoveie;

daiolouzü deiphaohai puletao vei soulai!

6Achechena donou rei-züyu maisü rakoveie;

daiolouzü puletao sü reikha ngaoloulai!

7Zhuvea peilousü maisü rakoveie;

daiolouzü puletao nou zhuvea ngaoloulai!

8Le sheeyu maisü rakoveie;

daiolouzü puletao nou Ramaiye ngaolai!

9Kaonayu pove peimai sü rakoveie;

daiolouzü puletaoye sü Ramai nahtao tea kulai!

10Achechena vanou mainou souvea-souhoyu puletaosü rakoveie;

daiolouzü raki Vedeisü puletao veie!

11“Neletao nou Athaifümai souyu donou mainou neletaoye sou ahraopei, souvea-souhopei ea mada-a chishi tyalinou paopeiyu kisü rakoveie. 12Va-salo, daiolouzü neletao vei buusü raki hinou dusho-a bue, daiolouzü süzhai bütoua neletao jünou rai-a hrüyu rachi paolamai taoye maikhe mainou souvea-souho peie.

Tai ea Ava vanou Doupeiyu

(Mk 9.50; Lk 14.34-35)

13“Neletao hai deiphao vei taie. Ana tainou puhkhü nahai hawu louzü, kazhaibüa puhye soukhülou khailai? Süsü polaiwu-a emai phinou taitou baiyuwo deinou hatali donoua koyu hare.

14“Neletao hai deiphao vei avae. Deichinou soukhai touyu nuhdu nasü poku louhoe. 15Maita linoua meibvü taokhaitoua sülai khehi pothou bengi-a khaitamoe, ana meibvü khaiyu buh hi khaibaiwe, alia sünanou kikhahi buyu mai hrülaiye vapeie. 16Süzhaibüa neletao vei ava sü maikhemai nghojühi vangao peikhaio, sübü louzü neletao vei vahvei taosü puletao nou ngaoloua rakibu neletao Puoye paosholai.

Razhai vanou Doupeiyu

17“Enou Moses vei razhai ea rachi paolamaitao nou doupeiyu taosü souhare donou vewe tea chowuso. Sütao souhare donou E vemoe, ana sütao panou vetere donou ve. 18Cheche vuzünou Enou neletao hi paowe, raki ea deiphao hatamosa koute razhai hinou chahko taili moa chahko daopouyu li koutea sütao teitei vetemo koutesü halaimoe. 19Südonou maita linou chikhatao hrohinou taikayu ali zümo louzü ea mai kukhehi-a sübüa doupei louzü, puhye sü raki Vedei hinou taikhana tea kulai. Ana maitalinou razhai nasü züloua sübüa souloure donou kukhehi-a doupei louzü puhye sü raki Vedei hinou aduna tea kulai. 20Südonou Enou neletao hi paowe, süolouzü neletao vei achechena nou razhai dou-apeimaitao ea Phariseemaitao vei jünou koulou molouzü neletao hai hakia raki Vedeihi velou louhoe.

Rarouyu vanou Doupeiyu

21“Neletao nou maiye southea laimoe; alia maita linou maiye southea louzü puhye chi kure donou savelai tea dao raimai taohi paoyu sü neletao nou chouloure. 22Ana chuo Enou neletao hi paowe: puh thaihou jüraiye rarouyu maitaliye sü chi kure donou savelai, maitalinou puh thaihou jüraiye ‘Hakonawo!’ tea kulouzü puhye sü tsümehi save lalai, alia maita linou puh thaihou jüraiye, ‘Avowo!’ tea paolouzü puh hai meizhai hi loure rakoshi nasü daolai. 23Südonou nenou sheela buh hi nevei sapeina poveyuki ne thaihou jürainou ne pei hi motouyu sü sühinou chove daolouzü, 24nevei sapeina nasü sheelayu buh nghojühi thaowuwo ea thala-a tave ne thaihou jüraiye raia chaveilou khaio, alia süshonou khaive Ramai hi nevei sapeina nasü posheela khaio.

25“Maitalinou nepei hi chikure donou neye chikuki hi savelouzü, chikuki hi veloumo jünou ea teile bubukinou saova-a buyu nasü sousheelo. Molouzü buh sühi velouyu thaisü puhnou neye chiku-apeiona bah hi thoupeiwu shulai ea puhnou neye kharovamai bah hi thoupeiwu-a hukhahi thoushulai. 26Enou nehi chechenou paowe, nenou nevei zho pousha akhaina khapeimo koute sü ne sü sühinou bulai.

Khulou Souyu vanou Soupeiyu

27“Nenou khulou vah soulaimoe tea paoyu hai neletao nou chouloure. 28Ana chuo Enou neletao hi paowe süolouzü maitalinou naotumai aliye vasou züpa hilonou zhutei louzü puhnou puh lekhe hinou naotu süpaiye koa khulou soure. 29Südonou ne nghithou zhoulonou neye mah hi süthou peilouzü, süsü reilapawu-a polaiwo! Neye donou pfüphao teiteinou meizaihi polai thouwuyu jüwo pfüphao zhali hayu nou veikou shohie. 30Nebah zhoulonou neye mah hi süthou peilouzü, süsü daodewu-a khilaiwo! Neye donou pfüphao teiteinou meizaihi louyu jüwo pfüphao zhali hayu nou veikou shohie.

Chapfü-chaa Ratayu vanou Doupeiyu

(Mt 19.9; Mk 10.11-12; Lk 16.18)

31“Haikuyu-a paoe, ‘Puh chapfüye rayu maitalinou puh hisü rayu vei ae-aopei larüli peilai.’ 32Ana chuo Enou neletao hi paowe: maitalinou puh chapfü hrümai sheemoyu vanou moanou rawu louzü, süthaisü naotupai nou nghida khailouzü, puhnou puhye sü panou khulou vah soure; alia naotupai sünaye nayu puh-a khulou vah soure.

Chaachou vanou Doupeiyu

33“Daoraimai taohi haibüa paoyu sü neletao nou chouloure, ‘Nenou mada-a chaachou soulai moe, ana nenou chaachou soulouyu nasü Mapaowo hi soupeilai.’ 34Ana chuo Enou neletao hi paowe: Hatakia chaachou soukhaiso; raki-a sathou-a chouso, daiolouzü haisü Ramai Vebuh-e; 35moa deiphao-a sathouso, daiolouzü haisü puh phitaibuh-e; moa Jerusalem-a sathouso, daiolouzü haisü dushoyu Veo nuhdue. 36Nepei-a sathou-a chaachou souso, daiolouzü nenou peishu poli-a soukaa moa soutei louhoe. 37Ana nenou paoyu taosü laboua ‘Ae’ moa ‘Moe’ tea paobaiwo; süpeinou paopuyu taosü Ashina hinou vebaie.

Paorüyu vanou Doupeiyu

(Lk 6.29-30)

38“Haibüa paoyu sü neletao nou chouloure, ‘Nghithou ali süh nghithou ali, alia huh ali süh huh ali.’ 39Ana chuo Enou neletao hi paowe; Ashinaye sü nuso. Ana maitalinou neye bai zhoulo vanou phapei louzü kukhelova na-a puh hi pfürei peio. 40Alia neye chikuki hi save-a nezao saolou nüyu puh hisü nevei zaoduna-a panou polo. 41Alia maitalinou neye kaacholi tapeire donou nutai louzü, puhye koa kaacho ahai takhaio. 42Maitalinou nehi hatali kholouzü, süsü puh hi peikhaio; alia maitalinou ne hinou hatali pounü louzü, süsü puh hi poupeikhaio.

Ngaobamaiye Leshiyu

(Lk 6.27-28,32-36)

43“ ‘Ne kinapaye leshilo ea ne ngaobamai ye ngaoralo’ tea paoyu sü neletao nou chouloure. 44Ana chuo Enou neletao hi paowe: neletao ngaobamaiye leshilo ea neletaoye souvea-souhomaiye donou veachi paopeio, 45sübüa neletao nou rakibu neletao Puo vei nahpoutumaitao souloulai. Daiolouzü puhnou puh teinghi sü maishimai ea maiveimai pei hi panou kheihao-a vapeiwe, alia teirü sü avei souyutao ea ashi souyutao hi seivepeiwe. 46Daiolouzü neletao nou neletaoye leshimai likheiye leshi bailouzü, daidonou Ramai nou neletaoye buu peilai? Süsü kikha khamai koutenou-a souwe! 47Alia neletao nou neletao thaihou jüraiye likhei khurü bailouzü, neletao nou kukhemai jünou dai koua souloure? Tahrüh kukhemai-a sübü-a soulou mowu? 48Südonou rakibu neletao Puonou licheyu büa, neletao-a liche vuzülai!

Currently Selected:

MATHIU 5: POUMBSI

Highlight

Copy