MATHIU 4

Jisu ye Thaoyu

(Mk 1.12-13; Lk 4.1-13)

1Süthaisü Rashinaye panou thaore donou Jisu ye Rako nou süthaipoa rekouhi tare. 2Alia puhnou hea raidai, khei raidai lüh-a buyu thaisü puhsü houloure. 3Süthaisü Rashi nanou puh hi veloua paoe, “Ne hai Ramai Nahpoutue toulouzü, chuh haitao hisü raokhao dalouwo tea kharochi peikhaio.”

4Ana Jisu nou chila peie, “Haibüa rüthoure, ‘Emainou raokhao likheinou hrilouhoe, ana Ramai mü hinou paopayu chipao sütao teitei vanou hriloulai.’”

5Süthaisü Rashina nou Jisu ye sheeyu Nuhdu Jerusalem hi saveloua Rathoki kipei dukhahi sapa khaipeire, 6alia puh hi paoe, “Ne hai Ramai Nahpoutue toulouzü, nelah chokoukhaio, daiolouzü haibüa rüthoure,

‘Ramai nou puhvei rakivamai taohi ne vanou kharochi peilai;

puletao nou puletao bahnou neye pola peilai,

sübüa nephi koutea panou chuh hinou zhuwu laimoe.’ ”

7Jisu nou chila peie, “Haibüa rüthouwu khaire, ‘Nenou ne Ramai Mapaoye thaolaimoe.’ ”

8Süthaisü Rashina nou Jisu ye kushoyu deichi alivahi sapaloure ea puh hi deiphao hi vedei veishi ea sütaovei du-shoyu teitei pongaoe. 9Alia Rashina nou puh hi paoe, “Nenou kou khou khüloua Eye khurü louzü, haitao teitei Enou nehi peilai.”

10Süthaisü Jisu nou chila peie, “Tawo, Saitan! daiolouzü haibüa rüthoure, ‘Nenou ne Ramai Mapaoye khurülai ea puhye likheithe nenou kuvah soulai!’ ”

11Süthaisü Rashina nou Jisu ye thaowu-a tare; alia rakivamai taonou taveloua puhye kuvah soupeie.

Jisu nou Galilee hinou Puh Vah Soushu Tayu

(Mk 1.14-15; Lk 4.14-15)

12Jisu nou Johanye hukhahi thoure touyu choulouyu kisü, puhsü Galilee hi tare. 13Puh hai Nazareth hinou chao-a bumoe, ana Zebulun ea Naphtali teideihi Galilee zaipehi buyu Kapernahum nuhdu hinou ve hrüre donou tare. 14Haisü rachi paolawo Isaiah nou paoyu sü panou vetere donoue:

15“Zebulun teidei ea Naphtali teidei,

Jordan rei polo dovahi zai ludu hinou buyu,

Tahrüh kukhemai vei teidei, Galilee!

16Teizhi hinou hrüa buyu maikhemai taonou dushoyu ava ali ngaolai.

Athaivei maiyu teidei hinou hrüa buyu maitao pei hisü ava sünanou vapeilai.”

17Teile süshonou Jisu nou puh chipaosü paodou shupoa haibüa paoe: “Ledalo, daiolouzü raki vedeisü ngheire!”

Jisu nou Khah Phoumai Adaiye Kulouyu

(Mk 1.16-20; Lk 5.1-11)

18Jisu nou Galilee zaipe hinou tasühaoa buyu hinou, puhnou khah phoumai china ahai, Simon (Pitar tea kuyuna) ea puh thaihou Andrew nou zaihinou khahbe nou khah phoua buyu sü ngaoe. 19Jisu nou puhaihi paoe, “Athai fülo, alia Enou nehaiye mai phoumai panou soulai.” 20Sübühinou puhai nou puhaivei khahbesü thaowu-a puhthai füloure.

21Alia buh sühinou takhaie puhnou kukhe china ahai, Zebedee nahpoutu Jems ea Johanye ngaoloure. Puhaisü sakhao hinou puhaipuo Zebedeeye koa khahbe nasü khoa bue. Jisu nou puhaiye kue, 22alia sübühinou puhai nou sakhao ea puhai puoye thaowu-a puhthai fütare.

Jisu nou doupeiyu; Ko paodouyu ea sounou souvei peiyu

(Lk 6.17-19)

23Jisu nou Galilee teidei teitei tasühao poa rathobuhtao hinou doupeie ea Vedei vei Ko Avei nasü paodoupeie, alia sounou ea sou tyalinou sou-a buyu maikhemai taoye souvei peie. 24Südonou puh kohai Suria teidei teiteihi kupoa tare ea maikhe mainou puh hisü lishi-a bumai hrülai, sou tyalinou soua bumai ea sounghei-nghei-a bumai, rashinou louyumai, soura soumai ea pothaimai taoye pove-a puhnou puletao hrülaiye souvei khaipeire. 25Alia Galilee, Dekapoli, Jerusalem, Judea ea Jordan polo dovahi teideitao hinou mai alaonou puhthai füloure.

Currently Selected:

MATHIU 4: POUMBSI

Highlight

Copy