MATHIU 27
27
Jisu ye Pilat hi Sakouyu
(Mk 15.1; Lk 23.1-2; Jn 18.28-32)
1Shohna hisü napao adu maitao ea tsümai taonou Jisu ye southeare donou chikhai loure. 2Alia puletao nou puhye baorai phuwua ea sü thai poa teideikhowo Pilat bah hi peire.
Judas Thaiyu
(Vah 1.18-19)
3Jisu ye shohdo souyu Judas nou Jisu ye southeare donou chi kukoure touyu hai sülouyu thaisü, puh lehai daloure ea pousha shirou taosü napao adu maitao ea tsümai taohi po khaive peire, 4alia haibüa paoe, “Mah hayu mailiye Enou southeare donou shohdo soupeiyu vanou E mahre!” Puletao nou chila peie, “Süna vanou Eh lenou dai bue? sünasü nelah ne vah baie!” 5Alia puhnou husha taosü rathoki hi polai thouwu a tare; süthaisü puh lah taho raidaotheare. 6Ana napao adumai taonou husha taosü kou poloua paoe, “Haitaohai zhe pousha baiyu donou rathoki vei pousha podzübuh hi pothou khaiyu razhai hae.” 7Südonou puletao nou chikhailoua shevai-shesü maitaoye povure donou pousha sütaonou lee souyumai fü nasü hrüloure. 8Südonou fü süna zhih hai “Zhefü!” tea zhodo koutea kua bue. 9Jeremiah rachi paolawo nanou paopayu, “Alia Israelmai kamai taonou puh muh paokhai touyu husha shirou nasü puletao nou poloure, 10alia Mapao nou Ahi chikha peiyu büa puletao nou sütaohai lee souyumai fü donou peire,” touyu nasü süki hinou vete loure.
Pilat nou Jisu hi Chi nouyu
(Mk 15.2-5; Lk 23.3-5; Jn 18.33-38)
11Chuo Jisu nou Teideikhowona nghojühi kou laloure, alia Teideikhowo nou puh hinoue, “Ne Jihudimai Veowu?” Jisu nou chila peie, “Nenou süsü paopare.” 12Ana napao adumai taonou ea tsümai taonou puh hi mah dukhaiyu kisü puh nou chila lia peimoe. 13Südonou Pilat nou puh hi paoe, “Puletao nou ne pei hi chi haizhozhou dukhaiyu hai ne choumowu?” 14Ana Jisu nou puh pei hi dukhaiyu chi tali vanou chila ali koutea peimoe, Südonou teideikhowo nasü khupasho loure.
Jisu ye Southeare Lüpeiyu
(Mk 15.6-15; Lk 23.13-25; Jn 18.39—19.16)
15Alia Tachonühsahi maisounou züpayu hukhahi bumai taliye teideikhowo nanou maisou donou phapeiyu zhai bue. 16Alia sükisü hukhahi buyu ashi hinou zhih tashoyu Jisu Barabbas tea kuyu maili bue. 17Südonou maisoutao nou vedzüa buyu phaki hinou Pilat nou puletao hi noue, “Neletao donou Eye panou thaohye phapeiyu züpawe, Barabbas tea kuyu Jisu ho, Khrista tea kuyu Jisue?” 18Daiolouzü puletao nou Jisu ye ngaoraiyu vanou puh bah hi thoupei baie touyu hai puh nou sütoua bue. 19Süpeinou, puhnou chikubuh hinou bubuki, puh chapfünou puh hi chi seive-a paoe. “Mah hayu mai süna pei hi halia souso, daiolouzü zhou kheikou me hinou E puh vanou veashore.”
20Ana napao adumaitao ea tsümai taonou maisouhi Barabbas ye phapeire alia Jisu ye southeare donou khokhaio tea süpeire. 21Süthaisü Teideikhowo nanou puletao hi paoe, “Puhai hrohinou neletao donou Eye panou thaohye phapeiyu züpawe?” Alia puletao nou chila peie,
“Barabbas ye züpae!”
22Pilat nou puletao hi noue, “Sükulouzü Khrista tea kuyu Jisu ye Enou dai soulai?”
Puletao hrülainou chila peie, “Puh ye kros vanou veatheawo!”
23Ana Pilat nou noue, “Daidonoue, puh nou daishi soure?” Sükisü puletao nou pai kupusho loua paoe, “Puh ye kros vanou veatheawo!” 24Südonou puh nou souyu hai maikhe maiye soubvüro shoyu likhei baideinou kukhe halia zhiyu hare touyu sü ngaoloua, Pilat nou dzü poloua ea maisou nghojünou bahdzü teiloua paoe, “Acheche mai haina vei athai vanou Apei hi mah hae! Haihai neletao vah baie!” 25Alia maikhemai hrülainou chila peie, “Puh thaiyu donou tudee verenasü Eletao pei hi ea Eletao nahmai pei hi vetheo!” 26Süthaisü puhnou Barabbas ye puletao donou phapeire, alia Jisu ye dapeiwua kros vanou veatheare donou puhye thoupeire.
Reihmai taonou Jisu ye Konüyu
(Mk 15.16-20; Jn 19.2-3)
27Süthaisü Pilat reihmai taonou Jisu ye Teideikhowo vei fühao hi saloure alia reihmai me teitei puh nghojühi tavedzüloure. 28Alia puletao nou puh va sabanütao daolaiwu-a horoyu zaocha alinou puh vahi zhaopeire, 29alia shunou peirüli khiloua puletao nou puh pei hi sünasü porü peire, alia rü süpo ali puh bah zhoulo pothoupeie. Alia puh nghojünou kou khou khüloua puletao nou puhye konüa paoe, “O Jihudimai Veo, maisho khaio!” 30Alia puletao nou puh hi taidzü süsho peie, alia rü süpo nasü poloua puh pei hi dapeie. 31Alia puletao nou puhye konüyu thaisü puletao nou puh hinou zaocha nasü daolaire, alia puh sahbanou puh vahi banoupeia puhye veatheare donou sapoa tare.
Jisu ye Veatheayu
(Mk 15.21-32; Lk 23.26-43; Jn 19.17-27)
32Alia puletao nou tapayu kisü Kurini teidei hinou veyu Simon tea kuyu mai sünaye puletao nou daoloure, alia mai sünaye Jisu vei kros pfükhare donou reihmai taonou kutai loure. 33Alia puletao nou Golgotha (süolouzü, peirao buh toue) tea kuyu buh hi tave louyu kisü, 34puletao nou southaidzü nou chokhai touyu darkha dzünou puh hi popeie; ana puhnou sünasü chiloua kükhai bare.
35Alia puletao nou puhye kros vanou veakhaiyu thaisü, puh sahnü taosü puletao hrohinou rako avei zhua zhiloure. 36Süthaisü puletao nou kou buloua sühinou puhye khoa bue. 37Alia puletao nou puh pei hi dukhaiyu chipao, “Haihai Jihudimai Veo Jisue,” tea phouyu chahkhao nasü puh peikou hi dakhaire. 38Sükisü maivei saotoumai ahaiye kros vanou Jisu ye koa aliye bahkha zhoulo ea liye bahkha nalo hinou veakhaire.
39Alia ngheiki taveyu maitao nou puletao pei ngua puhye konüa paoe, 40“Rathoki souha laiyu ea teithe asü levai hinou soupei khailaiyu ne, lah neye khailu louwo! Ne hai Ramai Nahpoutue toulouzü kros vanou takou louwo.”
41Süzhaibüa napao adumaitao, razhai dou-apeimaitao ea tsümai taonou-a puhye konüa paoe, 42“Puhnou kukhe maiye khailupeiwe; ana puhwo lah puhye khailulou hoe! Puhwo Israelmai veo süe; puhye panou chuo kros vahinou takou loukhaio, alia sütoulouzü Ehnou puhye louchelai. 43Puhwo Ramaiye louchewe südonou Ramai nou puhye züpa louzü, chunou Ramaiye panou puhye vupa peiyu soulou khaio; daiolouzü puhnou, ‘Ewo Ramainah Poutue’ tea paoe.”
44Alia puhye koa kros vanou veakhaiyu maivei saotoumai-a sübüa puhye konüe.
Jisu Thaiyu
(Mk 15.33-41; Lk 23.44-49; Jn 19.28-30)
45Alia chuo heako teilecho kiahai hinou koukhe teilecho asü koute teidei teitei hisü maitei loure. 46Alia teilecho asü tayu phakisü Jisu nou kushoyu painou raopare, “Eli, Eli, lama sabachthani?” süvei kowo louzü, “Aramai, Aramai, ne daidonou Eye thaowure?”
47Alia ngheiki hinou la-a buyu kamainou süsü chouloua paoe, “Mai hainanou Elijah ye lae.” 48Alia puletao hrohinou mai alinou sübü hinou tutaloua phako ali poloua sünasü khairouyu darkha dzü hinou sücha loure, alia sünahai süpo ali pei hi phu muloua panou küre donou puh hi peie.
49Ana kukhemai taonou paoe, “Kholaio, puhye khaipeire donou Elijah vevelai mosa Eletao zhulaikhe!”
50Alia Jisu nou pai kushoa raopuloua puh rakohai thoupeire.
51Alia zhukhaio, Rathoki hi hakhaiyu sah nasü ahai soua pei hinou teikou koute patare; alia deiphao hia nüsü loure ea chuhlea taoa kophobou tare; 52khüh taosü houkhao pare, alia zhitayu sheeyumai pfüphao taolia hrishu loure, 53alia puhnou hrishu louyu thaisü puletao nou khühtao hinou tashuloua sheeyu nuhdu hi taveloua maikhemai alao hi ngaoe.
54Reihmai kaihpei chana ea puhye koa Jisu ye khoyu maitao nou nüsüyu ea kukhe payu teitei ngaolouyu kisü, puletaosü ngaopisho loure, alia haibüa paoe, “Chechenou mai haina hai Ramai Nahpoutue!”
55Galilee hinou Jisu thaifüa taveyu puhvei kuvah souyu naotumai taolia sühinou kra-a zhia bue. 56Puletao hrohisü Meri Magdalini, Jems ea Josef pfü Meri, alia Zebedee chapfü louwe.
Jisu ye Vuyu
(Mk 15.42-47; Lk 23.50-56; Jn 19.38-42)
57Koukhe louyu kisü Arimathea hinou veyu Josef tea kuyu hanimai ali buh sühi tave-e, puh-a Jisu rozümai alie. 58Puhnou Pilat hi taveloua Jisu vei pfüphao nasü peire donou khoe. Südonou Pilat nou sünasü puh hi thoupeire donou kharochi peire. 59Alia Josef nou pfüphao nasü poloure, alia süsü sheetouyu jüyu sah ali hinou pozüloure, 60alia puhnou chuhrao hinou vouthouloua soukhai touyu lah puhvei khüh ashu nahi sünahai pothou khaire; süthaisü puhnou khüh mühi chuh aduli phaokou khaiwu-a tare. 61Magdalini Meri ea kukhe Meri pai-a khüh sühi zhia chobua bue.
Khüh Khoyu Maitao
62Thainaisho kisü, süolouzü Soteithe kisü, napao adumaitao ea Phariseemai taosü Pilat nghojünou tave dzüloure, 63alia haibüa paoe, “Dou-apeio, amadamai honanou puhnou hribuki, ‘Teithe asü thaisü E hridashu khailai,’ tea paoyuhai Eh nou tsü-a buhie. 64Südonou puh khüh hai teithe asüzhou koute panou soutaosoua khotou loure donou kharochi peikhaio, molouzü puh rozümai taonou taho puh pfüphao hai vaolou shulai, alia ‘puh hai athai hinou hrishu loure,’ tea maikhe mai hi paoshulai, alia akhai khailai hi dayu sünanou raiki dayu süna jünou shipu shulai.”
65Pilat nou puletao hi paoe, “Khopeire reihmai taosü neletao nou salouwo ea takhaio, neletao nou soulou veisa khüh sünasü khotou louwo.”
66Südonou puletao nou taho sünasü soutaosou chuhphao vanou paoshee soukhaire ea khore maiye sühi soutaosoua khaire.
Currently Selected:
MATHIU 27: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
