MATHIU 26

Jisu ye Southeare Do

(Mk 14.1-2; Lk 22.1-2; Jn 11.45-53)

1Jisu nou chi haitao paocheyu kisü, puhnou puh rozümai taohi paoe, 2“Teithe ahai thaisü Tachonüh hai velaire touyu sü neletao nou süe, alia Mai Nahpoutuye kros vanou veatheare donou thoupeiwulai.”

3Süthaisü napao adumaitao ea tsümai taonou Kaipha tea kuyu napao peichana vei veofühao hinou ve dzüloure, 4alia Jisu ye kheia niloua southea loure donou chikhai loure. 5Ana puletao nou paoe, “Haihai Eletao nou nühki hinou souwu laimoe, sükumo louzü maisou hrohinou bvüro shulai.”

Jisu ye Bethani hinou Theadzü Noupeiyu

(Mk 14.3-9; Jn 12.1-8)

6Chuo Jisu nou Bethani hi loukhaora souyu Simon kihinou bubu kinou, 7naotumai alinou muh teishoyu kainüvei theadzü nou phoupeiyu chuhkaa nou souyu khouli poloua puh hi tave, alia Jisu nou arübuh phaonou toua bubu kinou naotupai sünanou sünahai puh pei hi lakhai peire. 8Ana süsü rozümai taonou ngaolouyu kisü, puletao nou rarouloua paoe, “Daidonou haihai hakonou souhasa? 9Daiolouzü theadzü haihai pousha alao muh zholou süe, alia süsü toure hamai hi peilou veie.”

10Ana Jisu nou süsü süloua puletao hi paoe, “Daidonou neletao nou naotu haipaiye souveawe? Daiolouzü puhnou Ahi haveili soupeire. 11Daiolouzü neletaowo toure hamaiye teisa koa bulai, ana neletaowo Eye koa teisa bulai moe. 12Kaivei theadzü haina hai Apfüphaohi lakhai peiyu hinou puhnou süsü Eye vure donou souda peire. 13Chekhaoa Enou neletao hi paoe, deiphao teiteihi ko avei haina paotayu buh likihi, puh nou soukhaitouyu nasü puhye li-choloure donou paongaolai.”

Judas nou Jisu ye Shoh soure Lüpeiyu

(Mk 14.10-11; Lk 22.3-6)

14Süthaisü kiahai hrohinou ali soua buyu Judas Iskariot tea kuyu nanou napao adumai taohi taho loua 15noue, “Enou puhye neletao bahhi thoupei louzü, neletao nou Eye daipeilai?” Alia puletao nou puh hi husha shirou chothou peire. 16Alia teile sühinou shua puhnou Jisu ye shohdo soure teile zhou avei phoutare.

Jisu nou puh rozümaitaoye koa Tachonüh vai touyu

(Mk 14.12-21; Lk 22.7-13,21-23; Jn 13.21-30)

17Chuo raoko nühvei teithe raikai kisü rozümai taonou Jisu hi taveloua paoe, “Nenou Eletaoye panou daikinou taho neye donou Tachonüh vai soudayu züpae?”

18Puhnou paoe, “Nuhdu nahi talouloua mai alihi paokhaio, ‘Dou-apeio nou paoe, Avei teile ngheire; Enou neki hinou rozümai taoye koa Tachonüh nülai.’ ”

19Alia rozümai taonou puletao hi Jisu nou paopeiyu kua souloure, alia puletao nou Tachonüh vai nahai soudare.

20Koukhe louyu kisü, puhnou rozümai kiahai taoye koa toure donou kou butare; 21alia puletao nou toua buyu hinou, Jisu nou paoe, “Chechenou Enou neletao hi paoe, neletao hrohinou alinou Eye shohdo soupeilai.”

22Alia puletaosü le veasho loure, alia puh hi shoshonou noue, “Mapao, Ewu?”

23Jisu nou chila peie, “Eye koa khaoh hi puh bah thaithou zhoyu nanou Eye thoupeilai. 24Mai Nahpoutu louzü puh vanou sheeyu larübvü hinou rükhai touyu kua tabaie; ana Mai Nahpoutuye shoh soupeiyu mai süna donou daizhozhou ngaopisa! Puhye donou nakoukhai moyu nanou veikou shohie.”

25Puhye shoh soupeiyu Judas nou paoe, “Dou-apeio, haihai Ewu?”

Jisu nou chila peie, “Nenou paopawure.”

Mapao vei Lito

(Mk 14.22-26; Lk 22.14-20; 1 Kor 11.23-25)

26Alia puletao nou toua bubu kinou, Jisu nou raokhao poloua hapeire, alia sünasü soukho loua rozümai taohi peia paoe, “Poloua toukhaio; haihai Apfüphaoe.”

27Süthaisü puhnou paili poloure ea puhnou kalo paocheyu thaisü süsü puhnou puletao hi pola peia paoe, “Neletao hrülai haihinou pokülo; 28daiolouzü haihai mah khaipeire mai alao donou küpa peiyu vo soukhaiyu Azhe nasüe. 29Enou neletao hi paoe, Apuo Vedei hinou Enou neletaoye koa darkha zhaoh ashu küzho laiyu teithe süna vemo koutesü Enou chuthainou darkha zhaoh haina hai küpukhai khailaimoe.”

30Alia puletao nou lou ali soulouyu thaisü Oliv deichi hi tapare.

Jisu nou Raia Pitar nou Bare Paosü Peiyu

(Mk 14.27-31; Lk 22.31-34; Jn 13.36-38)

31Süthaisü Jisu nou puletao hi paoe, “Neletao hrülai Avanou zhoukhei kaota khailai, daiolouzü haibüa rükhaire, ‘Enou zhao-akhowoye southealai, alia zhaokhohi zhao taosü rata khailai.’ 32Ana hrishu louyu thaisü, Enou neletao jünou raia Galilee hi talai.”

33Pitar nou chila peia puh hi paoe, “Puletao hrülainou ne vanou kaotayuma, Ewo hakia kaotakhai laimoe.”

34Jisu nou puh hi paoe, “Chechenou Enou nehi paowe, zhoukhei vuzü hinou, houjünou khaomo jühinou nenou Eye lüh asü balai.”

35Pitar nou puh hi paoe, “Ewo neye koa thai vuzü laiyu koutea Enou neye hakia motoulai moe!”

Alia kukhe rozümai hrülai taoa sübüa paoe.

Jisu nou Gethsemane Kipei hinou Veachi Paoyu

(Mk 14.32-42; Lk 22.39-46)

36Süthaisü Jisu nou puletaoye koa Gethsemane tea kuyu buh hi tare, alia puhnou puh rozümai taohi paoe, “Holo vanou taho Enou veachi paobuki haihinou buwo.” 37Alia puhnou puhye koa Pitar ea Zebedee nahpoutu ahaiye satare ea puhsü le veasho loure ea le choro loure. 38Sükisü puhnou puletao hi paoe, “Ale hai veathou thaire soua bure; haihinou bua Eye koa zhai helo.”

39Alia tadouphou kouloua puhnou deiphinou kou khüa kaoloua veachi paoe, “Apuo, soulou veilouzü veayu pai haina hai Ahinou potapeio; sütou khaia, Enou liyu bümoa nenou liyu büa soupeio.”

40Süthaisü puhnou rozümai asütaohi khaikoue ea puletaoye zhia bua ngaoloure; alia puhnou Pitar hi paoe, “Neletao Eye koa teilecho ali koutea zhai helou howu? 41Neletao athao hi kaolou more donou zhai helo ea veachi paolo; chechenou rakowo louzü züpae, ana vasou louzü lelou hoe.”

42Süthaia puhnou tapulou khaia veachi paoe, “Apuo, veare pai haina hai Eye panou kümoa nou po talalou hoe toulouzü, nedo soulouwo.” 43Alia puhnou khaikou puyu kisü puletaoye zhia buyu ngaoloue, daiolouzü puletao nghithouhai süübeia bure.

44Süthaisü puletaoye thaowua puhnou lüh asüna hia taloukhaia kheihaoyu chipaotaonou veachi paoe. 45Süthaisü puhnou rozümai taohi tave loua puletao hi paoe, “Neletao chukoutea zhi vashoa ea soa buwu? Zhukhaio, Mai Nahpoutuye mahmai bah hi thoupeire phasü veloure. 46Shulouwo, Eletao talaire khe; zhukhaio, Eye shoh soupeire mainasü haihi bure!”

Jisu ye Nilouyu

(Mk 14.43-50; Lk 22.47-53; Jn 18.3-12)

47Puhnou sübüa chi paobebu kinou, kiahai hrohinou ali soua buyu Judas hai tavere, alia napao adu maitao ea tsümaitao hinou seiveyu khoche ea süda poyu maikhemai alaosou puhye koa laiwe. 48Chuo Jisu ye shoh soupeire mai sünanou maisouhi shee ali peia haibüa paoe, “Enou münou mure mai sünasü neletao nou züpayu nae, Puhye nilo.”

49Alia puhnou Jisu hi thalasou takouloua paoe, “Khurüwe, Dou-apeio,” alia sübüa puhye kou münou mue.

50Jisu nou puh hi paoe, “Asana! Ne daidonou haihi bue?”

Süthaisü puletao nou takouloua Jisu vahi bahkha khakhaia puhye niloure. 51Alia zhukhaio, Jisu ye koa buyu maitao hrohinou alinou puh bah sü topaloua puh khoche nasü paizhou loure, alia napao peichana kilai naye podaoe ea puh nousü jadere. 52Sükisü Jisu nou puh hi paoe, “Ne khochehai pokhailou süna buh hi khaio; daiolouzü khoche poyumai veishi sü khochenou souhalai. 53Rakivamai reihmaime adu kiahai jünou koua Ahi chubü hinou seive peire donou Enou Apuo hinou kholou hoe tea nenou chowu? 54Ana sübülouzü kabüa sheeyu larübvü hinou sübüa pavu zülai tea paopeiyu nasü vetelai?”

55Teile süpha hinou Jisu nou maisou taohi paoe, “Maivei saotoumai aliye nilaiyu kua khoche ea süda poa Eye niloure donou neletao tavewu? Teithe tsünou Esü rathoki hinou doupeia bue, alia neletao nou Eye nilou moe. 56Ana rachi paolamai taonou sheeyu larübvü hinou rükhai touyu nasü panou vete loure donou sütao veishi hai pakhaire.”

Süthaisü rozümaitao hrülaisü puhye thaowu-a tutare.

Tsüme Nghojü hi Jisu ye Save Layu

(Mk 14.53-65; Lk 22.54-55,63-71; Jn 18.13-14,19-24)

57Süthaisü Jisu ye nilouyu taonou puhye sü razhai dou-apei maitao ea tsümai taonou vedzüa buyu Kaiapha napao peichana buh hi savere. 58Ana Pitar nou napao peichana kijühi talouyu koute puhthai füpoa tae, alia kikhahi talouyu kisü akhai koute zhure donou puhnou kikhoyu maitaoye koa kou chobua bue. 59Chuo napao adumai taonou alia tsüme teiteinou Jisu ye southeare donou da-a chi lapeiyu phoue, 60ana puletao mai taolinou nghojülo takouloua puh vanou da-a chi lapeikhaia puletao nou halia ngaolou moe. Akhai khailai hinou mai ahai nou nghojülo takouloua 61paoe, “Mai hainanou, ‘E nou rathoki haina hai hakhaokou loua teithe asü levai hinou soupei khailou süe,’ tea paoe.”

62Alia napao peicha nanou lashu loua paoe, “Ne chila peire hawu? Mai haitaonou nepei hi paodu khaiyu hai daie?” 63Ana Jisu nou hachi lia paokhai moe. Alia napao peicha nanou puh hi paoe, “Hriyu Ramai zhih hinou Enou neye kharochi peia paowe, nehai Ramai Nahpoutu Khristae toulouzü Eletao hi paokhaio.”

64Jisu nou puh hi chila peie, “Nenou sünasü paopare. Ana Enou neletao hrülaihi paowe, chu thainou Mai Nahpoutu nou Khoukhoulai Ramai bah zhoulo hinou bua raki teihao pei vanou taveyu neletao nou ngaolai!”

65Sübü hinou napao peicha nanou puh sah daopha loua paoe, “Puh nou Ramaiye paoshire. Eletao nou haipeinou zhopaoh kukhe phoupuyu daizhiyu bue? Neletao nou chuo puhnou Ramaiye paoshiyu chouloure! 66Neletaowo daitea chowe?”

Puletao nou chila peie, “Puh hai thaizüe.”

67Süpha hinou puletao nou puh pah hi taidzünou süsho peia puhye dapeie; alia kamainou puhye bahnou phapeia 68paoe, “O Khrista! Neye dayu nasü thaowe, Eletao hi paopa ngaokhaio!”

Pitar nou Jisu ye Laiyu

(Mk 14.66-72; Lk 22.56-62; Jn 18.15-18,25-27)

69Chuo Pitar nou kijü vavai hinou bubuki, kilai naotumai alinou puh hi taveloua paoe, “Ne-a Galileemai Jisu ye koa laiwe.”

70Ana puh nou sünasü ba-a puletao hrülai nghojünou paoe, “Nenou daichi paosa touyu Ewo sümoe.” 71Alia puh nou kijü bomühi tapayu kisü kukhe kilai loumaina alinou puhye ngaolou khaire, alia puhnou ngheiki la-a bumai taohi paoe, “Mai haina hai Nazareth Jisu ye koa laiwe.”

72Süthaia puhnou chou-a, “Ewo mai sünaye sükhai moe!” tea bakhaire.

73Phajü buyu thaisü, ngheikihi layu maitao nou Pitar hi takoulou khaia puh hi paoe, “Veimosoua ne-a puletao hrohinou alie, daiolouzü nevei khao-zhai hinou neye shiwe.”

74Süpha hinou Pitar nou paoe, “Enou chouwe, süolouzü Enou chekhaoa paoe! Sükumo louzü Ramai nou Apei hi tudee peitheo! Ewo mai sünaye sükhai moe!”

Sübü hinou houjü alinou khaopare, 75alia Pitar nou puh hi Jisu nou, “Houjünou khaomo jühinou nenou Eye lüh asü koute balai,” tea paopeiyu nasü chüloure. Alia puhnou vakouhi tapa loua sochesoua krare.

Currently Selected:

MATHIU 26: POUMBSI

Highlight

Copy