MATHIU 11

Johan Baptist nou Seiveyu Chipaoh Paomaitao

(Lk 7.18-35)

1Alia Jisu nou puh rozümai kiahai taohi chi haitao paocheyu kisü, puhnou buh süsü thaowu-a tare ea buh süna ngheiki buyu nuhdutaohi taho doupei tare ea ko paodou tare.

2Chuo Khrista nou souyu vahtao vanou Johan Baptist nou hukha hinou choulouyu kisü, puhnou puh rozümai kamaiye Jisu hi seive. 3Puletao nou Jisu hi noue, “Ne hai Johan nou maili velai tea paoyu nawu, molouzü Ehnou kukheliye zhipulaiwu? Eh hi paongao khaio.”

4Jisu nou puletao hi chila peie, “Khaitawo, alia neletao nou chouyu ea ngaoyutao sü Johan hi paongaokhaio: 5nghichamaitao nou ngaoloure, phishomainou taloure, loukhaora soumaiye sü soushee peire, noupe mainou chouloure, thaimaiye souhri peire, alia toure hamai hisü ko avei paodou peire. 6Alia Eye letsü moyu puhsü rakoveie!”

7Johan rozümaitao nou khaitayu phaki, Jisu nou Johan vanou maisouhi paoe: “Neletao nou rekou Johan hi tahoyu kisü, neletao nou dai ngaore zhiwe? Teikhainou hülüyu poube sünawu? 8Molouzü neletao dai zhure donou tahowe? Sahnü avei banouyu mai sünaye zhure donouwu? Sübüa banouyu mai taosü veofühao hinou hrüa bue! 9Sükulouzü neletao daidonou tahowe? Rachi paolamai aliye zhure donouwu? Ovai, chekhaoe, ana neletao nou rachi paolamai ali jünou koushoa ngaoloure. 10Daiolouzü Johan hai sheeyu larübvü hinou: ‘Zhukhaio, Enou Akopaomainaye sü neye donou ludu souda peiloure ne jünou rai-a seive peilai’ tea paokhai touyu mainasüe. 11Enou neletao hi cheche vuzünou paowe, naotumainou nakouyu maikhemai hrohisü Johan Baptist jünou dukouyu maili-a pakhaimohie. Ana raki Vedei hinou taikayu puhnou Johan jünou duhie. 12Johan Baptist nou ko paodou tayu hinou shua chu koute sü raki Vedeiye chihshoa souvea peiyu sü daore, alia khushoyu maitao nou süsü poloure donou tea bue. 13Johan teile koute hai rachi paolamai hrülai ea Moses vei razhai nou Vedei vanou paopeire; 14alia neletao nou puletao vei chipaohai louche nülouzü, Johan hai raia velai tea paopeiyu Elijah baie. 15Südonou keiloure nou pfüyu puhnou keiloukhaio!

16“Chuo Enou maikha hainaye daiye nou paonadalai? Puletao hai hupobuh hinou chobua buyu nahmaitaoye kheihaoe. Me alinou alihi haibüa paikua paoe, 17‘Eh nou neleye donou shaa houa lousoue, ana neletao nou do soubae! Ehnou kouli lipeie, ana neletao nou krabae!’ 18Daiolouzü Johan nou toumo-shomo-a ve, alia mai hrülai nou paoe, ‘Puh hi rashi ali bue!’ 19Mai Nahpoutu nou tou-shoa veyu kisü mai hrülainou paoe, ‘Mai hainaye zhukhaio! Puhwo touzhi-shozhiyu mai alie, alia puhwo kikha khamaitao ea kukhe mahmaitao vei samai baie!’ Sütoukhaia, ratsünawo louzü puhvei shithounou puh hai chekhaoe touyu sü ngaopeibaiwe.”

Louche moyu Nuhdutao

(Lk 10.13-15)

20Jisu nou puhvei khupa vah souyu buh nuhdutaohi maikhemai nou leda moyu donou nuh sütaoye züa paoe: 21“Oh Korazin, neye donou daizhozhou ngaopisa! Oh Bethsaida, neye donou-a daizhozhou ngaopisa! Daiolouzü neletao hinou soukhai touyu khupa vah taosü Tair ea Sidon hinou soure toulouzü, sühi maikhemai taosü dao raikinou puletao le daloure touyu shee soungaore donou lousah ba-a lah puletao pei hi vounai bokhai bulaire! 22Enou neletao hi cheche nou paowe, süolouzü Chikuyu Teithekisü neletaoye jünou louzü Tair ea Sidon hi maitaoye nou Ramai nou zhuvea koupeilai! 23Alia Kapernahum, newo raki khete kukhe laiwu? Neye akhai hayu kaobvühi polai thouwulai! Daiolouzü nehi soupeiyu khupa vah taohai Sodom hinou soure toulouzü süsü zhou koutea bukouwu laihie! 24Ana Enou nehi paoe süolouzü Chikuyu Teithekisü neye jünou Sodom teideiye nou Ramai nou zhuvea koupeilai!”

Ahi Tave Solo

(Lk 10.21-22)

25Teile süpha hinou Jisu nou paoe, “Oh Apuo, raki ea deiphao Mapao! Enou neye kalo paowe daiolouzü nenou tsü veimai ea hasümai nghojünou pokukhai touyu sü nahtumai taohi pongao peire. 26Ovai, Apuo, haibüyu hai ne züpa nasüe.

27“Apuonou Ahi ha teitei thoupeiwure. Puo deinou maitalinoua Nahpoutuye sümoe, alia Nahpoutu ea Nahpoutu nou Puoye pongao nüa dolouyu puletao deinou maitalinoua puhye sümoe.

28“Vah vea-a soulaimai ea kou sü-a pfülaimai hrülai Ahi tavelo, Enou neletaoye panou soloulai. 29Aphaodao hai neletao phaohi pokhailo, alia Ahinou doulouwo; daiolouzü Ewo nashawe ea le nawe; alia neletao nou neletao vei rako donou soyu ngaoloulai. 30Daiolouzü Aphaodaowo lawe, alia Akouwo theawe.”

Currently Selected:

MATHIU 11: POUMBSI

Highlight

Copy