LUK 9
9
Jisu nou Rozümai Kiahaiye Vakou Seitayu
(Mt 10.5-15; Mk 6.7-13)
1Alia Jisu nou rozümai kiahaitaoye kuve dzüloua puletao hi rashitaoye hupalou süyu ea sounou souvei peilou süyu khouko ea soulousü zü peire; 2alia puhnou puletaoye Ramai vedeivei ko paodoure ea sounou maiye souvei peire donou seitare. 3Alia puhnou puletao hi paoe, “Neletao vei veihdu donou süpo-a, lekha-a, raokhao-a, pousha-a moa zao-pa koute hatalia pfütaso. 4Alia neletao nou ki talihi lou houlouzü, sühinou neletao tamosasü bukhaio. 5Alia buhtaki nou neletaoye maikhe mainou shepei balouzü, neletao nou nuhdu süna thaowu-a tayu kisü puletao pei hi motouyu zhopaoh soure donou neletao phihi naisü buh sühi sükou khaiwu-o.”
6Alia rozümaitao nou taloua buhliki hinou ko avei nasü paodoupoa ea sounou maiye souveipeia nuh likihi tasühao tare.
Herod Veonou tsübo phouhayu
(Mt 14.1-12; Mk 6.14-29)
7Chuo Herod Veo nou pa-a buyu sütao teitei vanou choulouyu kisü puhsü tsübo phouhare, daiolouzü Johan Baptist hai thaiyu hinou hridashu loure tea kamainou paoe, 8kamainou Elijah khaive khaire tea paoe, alia kamainou dao raichoki rachi paolamaitao hrohinou ali hrishure tea paoe. 9Herod nou paoe, “Enou Johan peisü dere, ana Enou sübüyu ko chouyu mai hainasü thaohsa?” Alia puhnou Jisu ye daoloure donou phouloure.
Jisu nou Mai Thengouye Vaiyu
(Mt 14.13-21; Mk 6.30-44; Jn 6.1-14)
10Sei-atamai taonou khaiveyu kisü puletao nou souyu teitei sü Jisu hi paongaoe. Puhnou puletaoye saloua Bethsaida touyu nuhdu nahi puletao lah khaitare. 11Maisoutao nou sübüyu kosü choulouyu kisü, puletao nou puhthai füpoa tare; alia puhnou puletaoye sasa-a shepeiwu-a puletao hi Ramai vedei vanou paodou peie, alia sou souveilou nüyu maitaoye souvei peie.
12Teinghinou kou loutare kisü rozümai kiahai taonou taveloua puh hi paoe, “Maisoutaoye nuhtao hi ea nuhfühao taohi chaoloure donou ea touso ngaotou loure donou seitawo; daiolouzü Eletao nou buyu buh haisü zheih zheihyu buh-e.”
13Ana puh nou puletao hi paoe, “Neletao nou puletao hi toure donou hatali peikhaio.”
Puletao nou chila peie, “Eletao hi raokhao phou angou ea khah ahai jünou bupu moe. Nenou Eletaoye panou taloua maisou hrülai haitao donou touso hrüyu züpawu?” 14Daiolouzü sühisü mai thengou pha bue.
Alia puh nou rozümai taohi paoe, “Maikhemai taoye panou mai raingou-ngou phanou meme souloua kou buloukhaio.”
15Alia puletao nou sübüa souloure ea puletao hrülaiye panou kou buloure. 16Alia raokhaopho angouna ea khah ahai nasü poloua puhnou rakihi pheloure, alia hapeiwu-a sütaosü soukhore, alia sütaosü maikhemai taohi pozhihpei loure donou rozümai taohi peire. 17Alia maikhemai hrülainou touloua pou phoukhai loure. Alia rozümaitao nou tashu toushoyu koulih taohai sülai kiahai kodzüloue.
Pitar nou Jisu vanou Paopayu
(Mt 16.13-19; Mk 8.27-29)
18Vuhliki sü Jisu nou khei-a veachi pao-a buyu hinou ea puh vei rozümai taonou puhye koa buyu hinou puhnou puletao hi noue, “Maikhe mainou Eye nou thaohtou-a paowe?”
19Alia puletao nou chila peie, “Kamainou Johan Baptist touwe; ana kukhenou Elijah tea paowe ea kukhe mainou dao raichoki rachi paola maili hridashu loure tea paowe.”
20Alia puhnou puletao hi noue, “Ana neletaowo Eye nou thaohtoue?”
Pitar nou chila peie, “Newo Ramai vei Razhepu nasüe.”
Jisu nou Puhvei Veayu ea Athai vanou Paoyu
(Mt 16.20-28; Mk 8.30—9.1)
21Süthaisü puhnou puletao hi sünahai maitalihi-a paokhaiso tea soutaosou kharochi peiwuyu thaisü 22haibüa paoe, “Mai Nahpoutu sü alaosou veavu zülai, alia tsümai taonou, napao adumai taonou ea razhai dou-apeimai taonou motou vuzülai, alia puhye southealai, ana puhsü teithe asü kisü hrida shuloulai.”
23Alia puhnou puletao hrülaihi paoe, “Maita linou Athai fünü louzü, puh lahnou puhye motulo, alia teisanou puhvei kros pfüloua Athai fülo. 24Daiolouzü maitalia lah puhvei hrirai khailulounü louzü süsü halai; ana maita linou Eye donou puhvei hrirai halouzü, süsü puhnou khailuloulai. 25Daiolouzü mailinou deiphao teitei koloukhaia lah puh ha-kalouzü puhye donou dai zhiyu bue? 26Daiolouzü maitamai linou Avanou ea Avei chipaotao vanou ahrao louzü, puhye donou-a Mai Nahpoutu nou puhvei, Puovei ea sheeyu rakivamaitao vei khouko ava hinou veyu kisü ahraolai. 27Ana chekhaoa Enou neletao hi paowe, Ramai vedei ngaomosa koute thailai moyu mai kamaisü haihi la-a bue.”
Jisu Zhu Dayu
(Mt 17.1-8; Mk 9.2-8)
28Chuo sübüa chi sütao paowuyu teithe acha thaisü Jisu nou puhye koa Pitar, Johan ea Jems ye saloua veachi paore donou deichi hi tapare. 29Alia puhnou veachi pao-a buyu hinou puh zhu sü datare, alia puhvei sahnüsü kaathou peivava loure. 30Alia zhukhaio, sühisü sükhaimoa mai ahai nou puhye koa chipha-a bue. Puhaisü Moses ea Elijah süe. 31Puhainou khouko ava hinou taveloua Jisu ye koa puhnou Jerusalem hinou tave thailoua Ramai vei li-choyu sü souvete laiyu vanou chipha-a bue. 32Chuo Pitar ea puhye koa buyu mai taosü zhitei tare, alia puletao nou kaishuyu kisü, puletao nou Jisu vei khouko ava ea puhye koa la-a buyu mai ahaiye ngaoloure. 33Alia mai sühainou Jisu hinou tarata-a buyu pha hinou Pitar nou puh hi paoe, “Dou-apeio, Eletao nou haihi buyuhai daizhozhou veisa; Eletaoye panou repao asü, neye donou ali, Moses donou ali ea Elijah donou ali soukhaio.” (Puhnou paoyu sü daiye paosa touyu hai puhnou sümoe.)
34Puhnou sübüa paobu kinou, teihao alinou kou puletaoye zhüloure; alia puletao nou teihao lekhehi loulouyu kisü puletaosü pisho loure. 35Alia teihao süna hinou pailinou haibüa shala vewe, “Haisü Enou dolouyu Anah Poutue, puhnou paoyu keilo!”
36Alia pai sünanou soyu thaisü Jisu likheithe buyu ngaolou baire. Alia rozümaitao nou sütao vanou hachilia paokhai moe ea teithe sütao hisü puletao nou ngaolouyu vanou hatalia maitalihi-a paongao khaimoe.
Rashinou louyu Nahpoutumai Aliye Souvei Peiyu
(Mt 17.14-18; Mk 9.14-27)
37Thainaisho sü puletao nou deichi hinou takouyu kisü maikhemai alaosou Jisu ye tave daoe. 38Alia zhukhaio, maisou hrohinou alinou shusoua raopae, “Dou-apeio! Enou nehinou Anahpoutuye zhupeire donou khowe, daiolouzü puh hai Avei likhuyu nahpoutue! 39Alia zhukhaio, rashi alinou puhye nilouloua puhsü sübü hinou shusoua raopapawe ea puhnou tudzü lapamo koutesü sünanou puhye sü nitsütsüpei baiwe, alia puhye sü zhupeiwu-a puh hinou thaotanü khaimoa tabaiwe. 40Enou ne rozümaitao hinou sünaye sü hulaipa peire donou khoe, ana puletao nou hupalou hore.”
41Jisu nou chila peie, “Oh lü hayu ea mah souyu maikha, teilepha kasho doua Enou neletaoye koa ea shamea zhoa bulai?” Süthaisü puhnou mai sünahi paoe, “Ne nahpoutuye haihi sakoukhaio.”
42Alia nahpoutu sünanou sübüa takouyu hinou, rashi sünanou puhye soukhaoloua nitsütsü peire. Ana Jisu nou rashi sünaye tukha peiwu-a nahpoutu sünaye souvei peire. 43Alia maikhemai hrülai sü Ramai vei dushoyu khoukona vanou khupasho loure.
Jisu nou Puhvei Athai vanou Paopu Peiyu
(Mt 17.22-23; Mk 9.30-32)
Ana puletao hrülainou Jisu nou souyu teitei vanou khupa-a buyu hinou, puhnou puhvei rozümai taohi paoe, 44“Enou paopare chipao haitaosü neletao vei lekhehi soutaosoua khailoukhaiwo! Mainah Poutuye sü maikhemai bah hi thoupeiwulai.” 45Ana paopeiyu ko süsü rozümaitao nou süloumoe, alia sünasü puletaoye panou sülou more donou puletao hinou kukhaire; alia puletao sü paopeiyu süna vanou puh hinou noure sü piloure.
Thaohnou Dukae?
(Mt 18.1-5; Mk 9.33-37)
46Alia rozümaitao hrohinou thaohnou dukae touyu vanou veiva loure. 47Ana Jisu nou puletao nou choyu sü sülouyu kisü, puhnou nahmai aliye saloua puh ngheikihi panou laloure, 48alia puletao hi paoe, “Maitalinou nahmai hainaye Azhih hinou popei louzü, Eye popeiwe, alia Eye popeiyu maitalinou Eye seive peiyu puhye popeiwe; daiolouzü neletao hrülai hrohinou tai-noukayu puhnou dukayu nasüe.”
Eletaoye Motou moyu Maisü Eletao donou Baie
(Mk 9.38-40)
49Johan nou chila peie, “Dou-apeio, mailinou nezhih hinou rashi hulai payu Eletao nou ngaoe, alia Eletao nou puhye nue, daiolouzü puhsü Eletao thaifüa tamoe.”
50Ana Jisu nou puh hi paoe, “Puhye nuso; daiolouzü Eletaoye motou moyu puhsü Eletao donou baie.”
Samaria Nuh Ali hinou Jisu ye Shepei Bayu
51Alia Jisu ye rakihi pokhewu laiyu teithe ngheikouyu kisü, puhnou Jerusalem hi tare donou le latouloua sühilo pah pfürei loure. 52Alia puhnou puh jünou raia ko paolamaiye seitawure, alia puletao nou taloua puhye donou ha teitei souda loure Samaria nuh alihi taloure. 53Ana puhnou Jerusalem hi taresü ngaoloua sühi buyu maikhemai taonou puhye shepeibae. 54Alia puhvei rozümai Jems ea Johan nou sübüyu sü ngaoloua paoe, “Mapao, nenou Eletaoye panou raki hinou mei seikouloua puletaoye souhare khoyu züpawu?”
55Ana Jisu nou reiveloua puletaoye züpeie. (Alia puhnou paoe, “Neletao hai kabüyu rako maisa touyu lah neletao nou sümoe; daiolouzü Mai Nahpoutu hai maikhemai vei ahri souhare donou vemoe, ana puletaoye khaipeire donou vebaie.”) 56Süthaisü puletao sü kukhe nuh alihi tare.
Jisu Thaifüre Maitao
(Mt 8.19-22)
57Puletao nou sübüa ludu hinou tabukinou mai alinou tave Jisu hi paoe, “Nenou tayu buh takisü E-a nethai fülai.”
58Alia Jisu nou puh hi paoe, “Lakhaotao-a puletao vei kulu bue, ea teihi raohou tao-a pheh bue, ana Mainah Poutuwo puhpei khüyu buh koute-a hae.”
59Kukhe alihi puhnou paoe, “Athai fülo.”
Ana mai sünanou paoe, “Mapao, raia Eye panou khaive Apuoye vuloukhaio.”
60Ana Jisu nou puh hi chila peie, “Thaimaitaoye panou lah puletao vei thaimaiye sü vukhaio; ana neye donou louzü taloua Ramai vedei kosü paodou takhaio.”
61Kukhe alinou paoe, “Mapao, E nethai fülai; ana Eye panou raia tave Akihi buyu maitao hi tarare chi paokhaio.”
62Jisu nou puh hi paoe, “Haphou polukhu thailo reive zhuyu mai talisü Ramai Vedei donou züdou moe.”
Currently Selected:
LUK 9: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
