LUK 10

Jisu nou Mai Rainai Ahaiye vakou Seitayu

1Süthaisü Mapao nou kukhe mai rainai ahaiye doloua puletaoye maihai hainou puh jünou raia puhnou tave laiyu nuhdu veishi hi ea buh likihi seitare. 2Alia puhnou puletao hi paoe, “Chachire louzü alao soua bue, ana vapeire maisü daotu baie; südonou cha Mapao hinou puhvei cha ludouhi cha chire maiye seive peire donou veachi paokhaio. 3Takhaio; zhukhaio, Enou neletaoye nüsei hrohi zhaotu büa seitawe. 4Shavü lia moa lekhabvü moa phikha lia pfütaso; alia lududo hinou maita mailiye khurüso. 5Neletao nou ki talihi talouyu kisü, raikaia, ‘Ki hainahi kaonayu buloutheo!’ tea paowo. 6Alia hakinou kaonayu maili sühi bulouzü, neletao vei kaonayu sü puh pei hi bulai, ana halouzü sünasü neletao hi khaikoulai. 7Alia puletao nou peiyu tasü tou-a shoa ki süna hinou nai-a bukhaio, daiolouzü vah souyumai alinou puhvei zho ngaozüe. Ki ali hinou alihi taso. 8Neletao nou nuhdu talihi takouyu kisü ea puletao nou neletaoye shepei louzü, neletao nghojühi khaipeiyu tasü toukhaio; 9sühi buyu sounou maitaoye souvei peio ea puletao hi paokhaio, ‘Ramai Vedeisü neletao ngheikihi veloure.’ 10Ana neletao nou nuhdu tahi talouyu kisü ea puletao nou neletaoye shepei molouzü, sünavei ludutao hi tapaloua haibüa paokhaio, 11‘Eletao phihi neletao nuhdu vei nai taipfüa laiyu sükoute-a neletao pei hi motouyu zhopaoh soure donou Ehnou sülai koure; sütoukhaia Ramai Vedeisü neletao ngheikihi veloure touyu sü sülouwo.’ 12Enou neletao hi chekhaoa paoe, Chikulaiyu teithe kisü nuhdu süna jünou Sodom ye nou sha-mealou veilai hie.

Louche moyu Nuhdutao

(Mt 11.20-24)

13“Oh Khorazin, neye donou daizhozhou ngaopisa! Oh Bethsaida, neye donou-a daizhozhou ngaopisa! Nehaihi soukhai touyu khupa vah taore Tair ea Sidon hi soungaore toulouzü, sühi maikhemai taosü dao raikinou puletao vei le daloure touyu zhopaoh soure donou puletao pei hi vounai vukhaiwu-a lousah nou ba-a bubu laire! 14Ana chiku laiyu teithe sükisü nehai jünou Tur ea Sidon ye nou shamealou veilai hie. 15Alia Kapernahum newo, rakihi khete kukhe laiwu? Neye akhai hayu raobvü hi polai thouwulai.”

16Jisu nou puh rozümai taohi paoe, “Neletao chi keiyu puh sü Achi keiwe, alia neletaoye motouyu puhsü Eye motouwe.”

Rozümai Rainai Ahaitao Khaiveyu

17Alia mai rainai ahaitao nou sasa-a khaiveloua paoe, “Mapao, rashitao koutenou-a nezhih hinou Eletao vei kharo khehi hrübaiwe!”

18Jisu nou puletao hi paoe, “Raki hinou tei-peiyu büa Saitan nou dekouyu Enou ngaoe. 19Zhukhaio, nghoutao ea hairakhaotao pei hi nou taipoa taloure, alia ngaobamai vei khouko teitei koloure khouko Enou neletao hi peire, alia hatalinoua neletaoye zhuwu laimoe. 20Sütoukhaia rashi taonou neletao khakhehi hrüe touyu vanou sawuso; ana neletao zhih hai rakihi rüthoure touyu vanou salo.”

Jisu nou Le sayu

(Mt 11.25-27; 13.16-17)

21Teile süphabü hinou Jisu nou Rako Mashi hinou le sasholoua paoe, “Apuo, raki ea deiphao Mapao! Enou neye kalo paowe, süolouzü nenou tsü veimai ea hasümai nghojünou pokukhai touyu sü nahtumai taohi pongao peire; ovai, Apuo, haibüyu hai nevei züpa nabaie.

22“Apuonou Ahi na teitei thoupeiwure; alia Apuo baideinou maita mailinoua Nahpoutu hai thaohsa touyu sümoe, moa Nahpoutu ea Nahpoutu nou Puoye pongao nüa dolouyu mai sütao baimoa maitalinoua Puohai thaohsa touyu sümoe.”

23Süthaisü puhnou rozümaitao hi reiveloua puletao hi kheia paoe, “Neletao nou ngaoyutao ngaoyu nghithoutao sü rakoveie! 24Daiolouzü Enou neletao hi paowe, süolouzü rachi paolamai taoli ea vemai taolinou neletao nou ngaoyu sü ngaonüshoe, ana süsü ngaolou more, alia neletao nou chouyu sü chounüshoe, ana süsü choulou more.”

Avei Samaria Pouna vanou Nada

25Alia zhukhaio, razhai dou-apeimai alinou Jisu mah phoupare donou lashuloua puh hi noue, “Dou-apeio, teisa ahri ngaoloure donou Enou dai soulai?”

26Jisu nou puh hi chila peie, “Razhai hi dai rüthou khaitoue? Nenou kabüa sütaosü phouwe?”

27Alia mai sünanou chila peie, “Nenou Mapao nevei Ramaiye ne le teiteinou, ne rako teiteinou, ne khouko teiteinou ea netsü teiteinou leshilai; alia nevei kinapaye nelah neye büa leshilai.”

28Jisu nou puh hi paoe, “Nenou kaobüa kheloure; haisü soukhaio, alia ne hriloulai.”

29Ana puhnou puhlah souzülou nüa Jisu hi noue, “Akinapa sü thaoh-e?”

30Jisu nou chila peie, “Teile alihi mai ali sü Jerusalem hinou Jeriko hi takouyu kisü puhsü maivei saotoumaitao hrohi louloua puletao nou puhye sü dapeiwure ea puhye sü thainonoyu hinou thaowu-a tare. 31Chuo napaomai alisü süphabü hinou ludu sünahi takoue; alia puhnou mai sünaye ngaolouyu kisü puhsü ludu polo dova hilonou tareipoa tare. 32Sübüa Levimai ali-a buh sühi taveyu kisü puhye ngaoloua ludu polo dova hilonou tareipoa tare. 33Ana Samaria tamai alinou veihdu hinou ta-a buyu hinou mai sünanou buyu buh sünahi tave loure; 34alia puh hi takouloua puhvei zheemütao hisü theadzünou ea darkha zhaohnou lanapeiwu-a phutou peire; süthaisü puhnou puhye sü lah puhvei rheisüh phaova hi panou buloua puhye sü shechaoki alihi save khaipeiwure ea sühinou puhyesü zhutou peire. 35Alia thainaisho kisü puhnou denarü ahai popaloua süsü shechaoki khoyu nahi peiwu-a paoe, ‘Puhye soutaosoua kitou peikhaio; alia nenou koua thou-sha soudowuyu taosü Enou khaiveyu kinou neye khapeilai!’”

36Alia Jisu nou akhaisoua noue, “Puletao asü hrohinou kananou maivei saotoumai bah hi louyu mai sünavei kinapae tea nenou chowe?”

37Razhai dou-apeio sünanou paoe, “Puh hi zhuvea peiyu mai sünasüe.”

Sühinou Jisu nou puh hi paoe, “Takhaio ea ne-a sübüa soukhaio.”

Jisu nou Martha ea Meri Kihi Taveyu

38Chuo Jisu ea puh rozümai taonou puletao vei veih duhi ta-a buyu hinou, puhsü nuh alihi taloure; alia sühinou Martha tea kuyu naotumai alinou puhye sü sheloure. 39Alia Meri tea kuyu puhvei matoupai ali bue. Puhsü Mapao vei phi hinou bua puhnou doupeiyu sü kei-a bue. 40Ana Marthawo louzü kuvah souretao hinou vah rushoa bue; südonou puhnou Jisu hi takouloua paoe, “Mapao, Eye panou lah kuvah teitei soure donou Athaihou painou Ahi thaothoukhou peiyu hai newo halia chomowu? Südonou puhye panou Eye soukha peire donou puh hi paopeio!”

41Ana Mapao nou puh hi chila peie, “Martha, Martha! Newo vah alao donou lekishoa ea levea-a bue; 42ana alikhei soure matsübaie. Meri nou puh hinou potalou hoyu zha avei nasü doloure.”

Currently Selected:

LUK 10: POUMBSI

Highlight

Copy