LUK 6

Soteithe vanou Chi nouyu

(Mt 12.1-8; Mk 2.23-28)

1Vuhlihi Jisu nou Soteitheki southou doutao tachopoa buyu hinou puh rozümaitao nou southou rouko taosü hailoua ea puletao bah hinou nüloua toue. 2Ana Phariseemai kamainou paoe, “Neletao dai donou Soteitheki souzü moyu vah soue?”

3Jisu nou puletao hi chila peie, “Neletao nou David nou puh ea puhvei maitao nou houyu phaki dai sousa touyu kosü phoumowu? 4Puh nou Ramai kihi talouloua, razhai thaifüa napaomai likhei baideinou maitalinoua tounouyu Ramai hi posheelayu raokhao nasü puhnou poloua toue ea puhye koa bumaitao hi-a peie.”

5Alia Jisu nou puletao hi paoe, “Mai Nahpoutu nou Soteithe vei Mapaowo süe.”

Bah Polova Shoyu Mailiye Souvei Peiyu

(Mt 12.9-14; Mk 3.1-6)

6Soteithe kukheli kisü Jisu nou rathobuh lihi talouloua doupei-a buyu phakisü sühisü bah zhoulova shoyu mai ali bue. 7Alia razhai dou-apeimaitao ea Phariseemai kamaitao nou puh pei hi dukhaire mah phoupa loure donou Soteithe kihinou puhnou sounou maiye souvei peilai mosa tea chohteipoa bue. 8Ana puhnou puletao vei tsü-le nasü süloua bah polova shoyu mai sünahi paoe, “Lashuloukhaio ea takou maikhemai nghojü hinou lalouwo.” Alia mai sünanou lashuloua sühinou kou laloure. 9Alia Jisu nou puletao hi paoe, “Enou neletao hi nouwe; Soteitheki avei souyu zhaiho, ashi souyu zhaie moa hrirai khailu peilaiho sünasü souhalai?” 10Alia puhnou puletao hrülaihi zhusühaoloua puh hi paoe, “Nebah topalouwo.” Alia puhnou sübüa soulouyu kisü puh bahsü veida loure.

11Ana puletaosü rarousholoua puletao hrohinou Jisu pei hisü dai soupei laisa touyu sü khailoure.

Jisu nou Rozümai Kiahaiye Doyu

(Mt 10.1-4; Mk 3.13-19)

12Teile sütaohi vuhli sü Jisu nou veachi paore donou deichi alihi tapare; alia sühinou kheimathe sü Ramai hi veachi paoa bue. 13Alia teitheloukhaie puhnou puh vei rozümaitaoye kuloua puletao hrohinou mai kiahaiye doloure ea puletaoye sü puhnou sei-atamaitao tea zhih sapeiwure: 14Pitar tea puhnou zhih sapeiyu Simon, alia puh thaihou Andrew, Jems ea Johan, Philip ea Bartholomew, 15Mathiu ea Thomas, Alphia nahpoutu Jems ea teidei-leshio tea kuyu Simon, 16Jems nahpoutu Judas ea maiye zhotouna Iskariot Judas.

Jisu nou Doupeiyu ea Sounou Souvei Peiyu

(Mt 4.23-25)

17Alia Jisu nou puhvei sei-atamaitaoye koa deichi hinou takouhloua deikhobuh ali hinou kou laloure, alia sühisü puhvei rozümaitao alaosou ea maisou alaosou Judea teidei veishi hinou, Jerusalem hinou, alia Tair ea Sidon vei zaidu ngheiki hinou maisou alaosou puh hinou puhvei chipao keiloure ea puletao vei sounou sü souvei loure donou tave loure; 18alia rashinou souveayu maitaolia taveloua veikhai loure. 19Sükisü maisou hrülainou puhye sü deiloure donou phoue, daiolouzü puhva hinou khouko sü paloua puletao hrülaiye sü souveipeie.

Rako Veiyu ea Veayu

(Mt 5.1-12)

20Alia Jisu nou puh rozümai taohi pheloua haibüa paotare:

“Neletao toure hamaitao rakoveie,

daiolouzü Raki vedeisü neletao veie!

21Chu houa laimai neletao rakoveie,

daiolouzü neletaoye pouphou soupeilai.

Chu kra-a bumai neletao rakoveie,

daiolouzü neletao nülai!

22“Mai Nahpoutu vanou neletaoye maikhemai nou ngaorayu, souku payu, sou ahrao peiyu ea maishie tea neletaoye zhih phawuyu kisü rakoveie! 23Süteithe kisü asalo ea lesaloua do soulouwo, daiolouzü zhukhaio, neletao vei buusü raki hinou dushoa bue. Daiolouzü sübüa puletao vei pai-paomai taonoua rachi paola maitao hi soupeie.

24“Ana chu kini bumai neletao donou daizhozhou ngaopisa;

daiolouzü neletao-wo neletao vei sa-vayu sü ngaoche loue!

25“Chu pouphou-a bumai neletao donou daizhozhou ngaopisa;

daiolouzü neletaosü hou khailai!

Chu nü-a bumai neletao donou daizhozhou ngaopisa;

daiolouzü neletaosü dopfüa kralai!

26“Mai hrülainou neletaoye paoshoyu kisü neletaoye donou daizhozhou ngaopisa, daiolouzü puletao vei pai-paomaitao nou-a madayu rachi paolamaitao hisü sübüa paoshopeie.

Ngaobamaiye Leshi peiyu

(Mt 5.38-48; 7.12)

27“Ana kei-a buyu neletao hi Enou paowe: Neletao vei ngaobamaiye leshilo, neletaoye ngaorayu maitaohi avei soupeikhaio, 28neletaoye chayu maitaoye hapeikhaio, alia neletaoye nghi-a bumaiye donou veachi paopeio. 29Maitalinou nebai polovahi phapei louzü kukhe alina-a pfüdo peikhaio, alia maita linou ne sahba saolouzü puh hisü nevei zao-a peibaso. 30Nehinou hatali khoyu puh hisü peikhaio; alia maita linou nevei hatali poloua talouzü sünasü puh hinou khodawuso. 31Alia neletao nou maiye panou neletao hi soupei nüyu büa neletao-a puletao hi soupeiwo.

32“Neletao nou neletaoye leshiyu maitaoye likhei leshi bailouzü, neletaoye paoshore dai bue? Daiolouzü mahmaitao koutea puletaoye leshimaiye leshiwe! 33Alia neletao nou neletao hi avei soupeiyu maitaohi likhei avei soupei bailouzü, neletaoye paoshore dai bue? Daiolouzü mahmaitao koutea sübüa souwe! 34Alia neletao nou ngaodakhai lousüe tea choyu maitaohi likhei neletao nou ha poupei bailouzü neletaoye paoshore dai bue? Mahmaitao koute-a alaosou ngaopure donou mahmai taohi poupeiwe. 35Ana neletaoye ngaoba maitaoye leshilo ea puletao hi avei soupeikhaio; ngaoda khaire chokhaimoa poupeikhaio, sübülouzü neletao vei buusü dusholai ea neletao sü Aku Kulai Ramai vei nahmaitao soulai; daiolouzü puhwo mai veamuh sümoyu ea dutou nüyu maitaoye-a zhuvea peiwe. 36Neletao Puonou zhuvea peilou süyu büa neletao-a zhuvea peio.

Mai Kukheye Chi kuyu

(Mt 7.1-5)

37“Mai kukheye chi kuso, alia neletaoye chi kulaimoe; maiye mah dukhaiso, alia neletaoye mah dukhai laimoe; maiye khaipeikhaio, alia neletaoye khaipeilai. 38Maiye peiwo, alia sünasü neletao hi peikhailai; alia doutouloua, nouthouloua, ngukouloua ea phouli-a neletao vei khao-lekhahi thoupeilai.”

39Süthaisü Jisu nou puletao hi nada ali paopu peie: “Nghichamai alinou nghichamai aliye süthai talou süwu? Sübüa soulouzü puhai maihainou raobvühi duloulai mowu? 40Rozümai alinou puhvei dou-apeio jünou dumoe, ana rozümai hrülainou puhnou doure doucheyu thainou puhvei dou-apeio bübailai.

41“Alia nelah ne nghithouhi houngh louyu sü popare romoa daidonou nevei thaihou jürai nghithouhi louyu houngh nanou zhuwe? 42Moa nelah ne nghithouhi houngh louyu nasü ngaomoa kabüa nenou ne thaihou jüraihi, ‘Achina, ne nghithouhi louyu houngh nasü panou Eye popalouwo,’ tea paoloulai? Aveikho souyu taore, raia nelah ne nghithouhi louyu houngh nasü popalouwo, alia süshonou nenou ne thaihou jürai nghithouhi louyu houngh nasü popa loure donou sheesha-a ngaolou süe.

Süübe ea Sünavei Rashithou

(Mt 7.16-20; 12.33-35)

43“Daiolouzü avei süübe hinou ashi rashi shimoe, moa ashi süübe hinou avei rashi shimoe; 44daiolouzü süübe taliye lah sünavei rashi vanou sülou baiwe. Daiolouzü doushi hai rakhoudube hinou hailaimoe, moa darkha rashi hai ngushishi be hinou hailoumoe. 45Mai avei mainou puhvei lekhehi avei podzükhai touyu hinou avei popawe, alia maishi mainou lekhehi ashi podzükhai touyu hinou ashi popawe; daiolouzü lekhehi phoua buyu hinou münou paopawe.

Ki Souyu Mai Ahai Ko

(Mt 7.24-27)

46“Neletao daidonou Enou neletao hi paopeiyu nasü soumoabu lukhu Eye nou ‘Mapao, Mapao’ tea kuwe? 47Maita linou Ahi taveloua ea Avei chipaotao keiloua souyu puhsü daiye raisa touyusü Enou neletao hi paongaolai: 48Puhsü deibvü thoushoa raothouloua chuhrao peinou kifü soulouyu ki souyumai süna büe; alia dzüdu veyu kisü ki sünaye sü vephya loure, ana sünaye sü soulülou moe, daiolouzü sünasü soutaosoua soushupa khaitoue. 49Ana Achipaotao chouloua sütaosü soulou moyu puhsü kifü khopaloumoa nai peivanou ki soushupa khaitouyu mai süna büe; alia dzüdunou veloua ki sünaye vephyayu kisü sünasü thala-a kaotare ea ki sünasü kaothou deisasare.”

Currently Selected:

LUK 6: POUMBSI

Highlight

Copy