LUK 5

Jisu nou Rozümai Raitaoye Kulouyu

(Mt 4.18-22; Mk 1.16-20)

1Naiteithe lisü maikhe mainou Jisu hinou Ramai chipao keire donou nghojülo khaokoua buyu kisü, Jisusü Shunesaret zaipe hinou la-a bue. 2Alia puhnou sakhao ahai zaipehi pokhaikhaitouyu ngaoe; ana khahphoumai taosü sakhao sühai hinou tapaloua puletaosü khahbe taosü dzüthea-a bue. 3Jisu nou sakhao alihi süolouzü Simon vei nahi louloua zaipe hinou saoposhu kaphoua khaipeiwo tea Simon hi paoe. Alia puhnou lou buloua sakhao levai hinou maisouye doupeie.

4Alia puhnou chi paocheyu thaisü, Simon hi paoe, “Thoushoyu buh hilo saokouloua neletao vei khahbe taosü khah süloure donou laithoukhaio.”

5Simon nou chila peie, “Dou-apeio, Ehnou kheimathe phoukhaia halia phouloumoe! Ana nevei chipao thaifüa Enou khahbe taosü polai thoulai.” 6Alia puletao nou sübüa polai thouyu kisü, khah alaosou lou süloure ea puletao vei khahbe taosü süphawuyu laire. 7Südonou puletao nou sakhao kukhena hi louyu puletaoye koa khah phoumaitao hisü tave puletaoye sükha peire donou bahnou zha-a laloure. Alia puletao nou taveloua sakhao ahai hisü khah pothou phoulouyu vanou sakhao sühaisü leilouyu laire. 8Ana Simon Pitar nou süsü ngaolouyu kisü, kou Jisu phi hinou duloua puh hi paoe, “Mapao, Ahinou tala peikhaio, daiolouzü Esü mahmai alie!”

9Daiolouzü puh-a ea puhye koa buyu mai hrülai-a puletao nou alaosou nilouyu khah sütao vanou khupasho loure; 10alia süzhaibüa Simonye koa laiyu Zebedee nahpoutuhai Jems ea Johan-a khupasho loure. Alia Jisu nou Simon hi paoe, “Pikhaiso; zhou thainou ne sü maiye phoutalai.”

11Alia puletao nou puletao vei sakhao taosü zaipehi süpa khaiwuyu thaisü, puletao nou puletao vei na veishisü thaowu-a puhthai fütare.

Jisu nou Loukhaora Soumai Aliye Souvei Peiyu

(Mt 8.1-4; Mk 1.40-45)

12Jisu nou vuhlihi nuhdu ali hinou bubuki, sühisü loukhaora nou souyu mai ali tave; alia puh nou Jisu ye ngaolouyu kisü kou khoukhüloua puh hinou khoe, “Dou-apeio, nenou aetou peilouzü, Eye nenou soushee peilou süe.”

13Alia Jisu nou puh bah sü topaloua ea puhye kou deiloua paoe, “E aetouwe, sheelouwo!” Alia sübü hinou loukhaora nasü mai süna hinou tare. 14Süthaisü Jisu nou puh hi kharochi pei-a paoe, “Maita lihi-a paokhaiso, ana napao nahi taveloua puhye panou neye zhukhaio; süthaisü mai hrülaihi ne veiloure touyu zhopaoh souloure donou Moses nou chikha peiyu thaifüa posheelare na nasü sheelakhaio.”

15Ana Jisu kosü holo hailo kubou loure; alia maisou alaosou puh hinou ko keire ea puletao vei sounou souvei loure donou tave dzüloure. 16Ana puhsü rekouhi taloua veachi paoloure.

Jisu nou Pothaimai Aliye Souvei Peiyu

(Mt 9.1-8; Mk 2.1-12)

17Naiteitheli Jisu nou doupei-a buyu kisü, sühisü Galilee, Judea, alia Jerusalem hi nuhdu teitei hinou tavelouyu Phariseemaitao ea razhai dou-apeimaitao sü bue; alia sounou souvei peiloure Mapao vei khoukosü Jisu ye koa bue. 18Alia zhukhaio, maikhemai kamainou pothaiyu mai aliye züh vanou kaopo veloua puletao nou puhye sü kikhahi polouloua Jisu nghojühi pokhai loure donou teloure. 19Ana maisou vanou puhye polouloure du phouhare. Südonou puletao nou puhye sü kiphaohi popaloua kitsü hinou hashaloua puhye sü puhzühnou pu maisou hrohi süolouzü Jisu nghojühi kezhukou khaire. 20Alia Jisu nou puletao vei lü nasü ngaolouyu kisü puhnou mai sünahi paoe, “Asana, ne mah taosü khaipeire.”

21Alia razhai dou-apeimai ea Phariseemai taonou puletao hrohinou haibüa paoe, “Ramaiye paoshiyu mai hainasü thaoh-e? Ramai likhei baimoa thaohnou mah khaipei lousüe!”

22Jisu nou puletao vei tsüsü süloua puletao hi paoe, “Neletao daidonou sübüyu tsü chowe? 23Daiolouzü, ‘Nemahtao khaipeire,’ tea paoyu talahiho, ‘Lashuloua takhaio’ tea paoyu nou lahie? 24Sükulouzü Enou neletao hi Mai Nahpoutu hai deiphao hi mah khaipeilou süyu khouko bue touyu zhopaoh peilai.” Südonou puhnou pothaiyu mai sünahi paoe, “Enou nehi paowe, lashulo ea nezüh poloua kihi taveo!”

25Alia sübü hinou mai sünasü puletao veishi nghojü hinou lashu loure, alia puhnou züa buyu züh sünasü poloua ea Ramaiye shopoa puh kihi tare. 26Alia puletao hrülaisü khupasho loure ea ngaopinou phoupoa ea Ramaiye shoyu noupu puletao nou haibüa paoe, “Eletao zhou khupa vahli ngaoloure.”

Jisu nou Leviye Kulouyu

(Mt 9.9-13; Mk 2.13-17)

27Süthaisü Jisu sü vakouhi tare, alia kikha khayu vahki hinou chobua buyu Levi tea kuyu kikha khamai sünaye ngaoloua puh hi paoe, “Athai fülo.” 28Sühinou puhnou lashuloua ea ha teitei thaowu-a puhthai fütare.

29Alia Levinou Jisu ye donou puhki hinou tovai aduli soudare; alia sühisü kikha khamai ea kukhe maitao-a alaosou puletaoye koa arübuh hinou toua bue. 30Alia Phariseemai kamainou ea puletao vei razhai dou-apei kamaitao nou Jisu rozümai taohi sü mülealea-a paoe, “Neletao daidonou kikha khamaitao ea mahmaitaoye koa tou-showe?”

31Jisu nou puletao hi chila peie, “Pfüphao veiyu maitao donou pou-apeimai sü koyu hae ana lishimaitao donou likhei kobaie. 32Esü cheche maiye kure donou vemoe, ana mahmaitaoye panou le daloure donou baie.”

Lühyu vanou Chi nouyu

(Mt 9.14-17; Mk 2.18-22)

33Alia puletao kamai nou Jisu hi noue, “Johan vei rozümaitaowo lüh zhazha-a veachi paobaiwe, alia sübüa Phariseemai vei rozümaitao-a soubaiwe, ana nevei rozümaitaowo tou-sho baiwe.”

34Jisu nou puletao hi chila peie, “Neletao nou sheenghiyu buh hi shemaitaoye sheeyupunou puletaoye koa bubusasü panou lüh-a bulou süwu? Sükulou hoe! 35Ana sheerepu sünaye puletao hinou potawuyu teithesü velai, alia süshonou puletaosü sükinou lüh talai.”

36Puhnou puletao hi nada kukhe hainasü paopupeie: “Maitalinoua sheetouyu sah hinou sah peli raphapaloua sünanou poshu sahku lihi khotamoe; sübüa soure toulouzü, puhnou sahshu nasü-a paiphalai, alia sahshu navei sahpe nasünou sahku nahisü zülai moe. 37Moa maitalinoua darkha zhaoh ashuhai souheebvü kutaohi thoukhai moe; hakinou thoulouzü, darkha zhaoh ashu nasünou souheebvü taoye sü soukhowulai ea sünasü vakouhi küpa bailai, alia souheebvü taosü soushiwu bailai. 38Süjüwo darkha zhaoh ashu hai sheetouyu souheebvü taohi lathou vuzülai. 39Alia maitalia darkha zhaoku sholouyu thaisü ashu nasü züpa tamoe; daiolouzü puhnou, ‘Akuna veikouhie’ tea paowe.”

Currently Selected:

LUK 5: POUMBSI

Highlight

Copy