JOHAN 21

Jisu nou Rozümai Anaitao hi Ngaopeiyu

1Haithaisü Jisu nou Tibiria zaipe hinou puh rozümai taohi tave ngaopu peikhaie; alia puhnou haibüa ngaopeie. 2Simon Pitar, nahbei tea kuyu Thomas, Galilee hi buyu Kana hinou veyu Nathanel, Zebedee nahpoutuhai, alia kukhe puh rozümai ahai taosü vedzüa bue. 3Simon Pitar nou kukhe taohi paoe, “Ewo khah phouta laire.”

Puletao nou puh hi paoe, “Eletao-a neye koa talai.” Südonou puletao nou taloua sakhao hi louloure; ana süzhou khei hisü puletaosü halia phouloumoe. 4Ana shohna tei thepayu kisü Jisu sü zaipe hinou la-a bue, ana rozümaitao nou süna hai Jisue touyu süloumoe. 5Jisu nou puletao hi noue, “Khemaina taore, neletao khah lia phoulou mowu?”

Puletao nou puh hi chila peie, “Halia phoulou moe.”

6Puhnou puletao hi paoe, “Neletao vei khahbe nasü sakhao zhoulo vahi laithou khaio, alia neletao nou daotu ngaoloulai.” Südonou puletao nou laithouyu kisü, khah loupouleyu donou puletao nou khahbe nasü pai palou hore.

7Jisu nou leshiyu rozümai nanou Pitar hi paoe, “Haina hai Mapao-e!” Simon Pitar nou sünasü Mapao-e touyu choulouyu kisü, puhnou puh sahnü nouthouloure (daiolouzü vah souyu donou puhsü baitoua bue) alia zaihi choloure. 8Ana kukhe rozümaitao louzü khahnou lou phoupeiyu khahbe nasü süthaipoa sakhao hinou takoue, daiolouzü puletao sü deithe hinou dousho more, hacho Kaihlipha dou baire. 9Puletao nou deithe hi tapalouyu kisü, sühisü veimei ea süpei hi khah buyu, alia raokhao daotu-a buyu ngaoloure. 10Jisu nou puletao hi paoe, “Neletao nou chubü hinou nilouyu khahtao hronou daotu pokoukhaio.”

11Südonou Simon Pitar nou sakhao nahi takou louloua khahdu kaihlia raingouasünou lou phoupeiyu khahbe nasü deithe hi süthaipare; alia khahtaosü poushokhaia khahbe nasü soupha khaimoe. 12Jisu nou puletao hi paoe, “Takou toulouwo.” Rozümaitao hrohinou maitalinoua, “Ne thaohwe?” tea khuveia puh hi noumoe, puletao nou sünasü Mapaobaie touyu süe. 13Südonou Jisu nou takouloua raokhao nasü poloua puletao hi peie, alia sükua khah nasüa peie.

14Chuo haina hai Jisu nou athai hinou hrishu louyuthai rozümai taohi ngaopeiyu lüh asü chenae.

Jisu ea Pitar

15Puletao nou toulou cheyu thaisü Jisu nou Simon Pitar hi noue, “Johan nahpoutu Simon, haitao jünou nenou Eye leshi kouhimoe?”

Puhnou chila peie, “Ovai Mapao, Enou neye leshie touyu sü nenou süwe.”

Jisu nou puh hi paoe, “Azhaotaoye vaipei khaio.” 16Jisu nou puh hi lüh ahaichena noue, “Johan nahpoutu Simon, ne Eye leshiwu?”

Puhnou chila peie, “Ovai, Mapao, Enou neye leshie touyu sü nenou süwe.”

Jisu nou puh hi paoe, “Azhaotaoye khopei khaio.” 17Jisu nou puh hi lüh asü chena noue, “Johan nahpoutu Simon, ne Eye leshiwu?”

Pitar sü levea loure daiolouzü Jisu nou puh hi lüh asü koute, “Ne Eye leshiwu?” tea puh hi noue, alia puhnou puh hi paoe, “Mapao, nenou hali-hala süwe; Enou neye leshie touyu sü nenou süwe!”

Jisu nou puh hi paoe “Azhaotaoye vaipei khaio. 18Cheche vuzünou Enou nehi paowe, nenou nahlebuki louzü nelah sahvealoua nenou taho nüyu buh hisü nenou tabaiwe; ana nenou tsüloulouzü, nenou nebah sü topalai, alia kukhe alinou neye phuloua nenou tanümoyu buh hi satalai.” 19(Pitar nou kakuyu athai zhaido hinou Ramaiye soudusho peilaisa touyu süngao peire donou Jisu nou haisü paoe.) Süthaisü Jisu nou puh hi paoe, “Athai fülo!”

Jisu alia Rozümai Kukhena

20Pitar nou thailo reiveyu kisü Jisu nou leshiyu rozümai nanou puhaithai füpoa laiyu ngaoe. Rozümai sünasü koukhe vai touyuki Jisu khao hinou vüa, “Mapao, neye shoh soupeire nasü thaoh-e?” tea nouyu nasüe. 21Pitar nou puhye ngaolouyu kisü Jisu hi noue, “Mapao, mai hainawo louzü kaku khailai?”

22Jisu nou puh hi chila peie, “E khaivemo koute Enou puhye panou hria bunülouzü, sünanou neye donou dai bue? Athai fülo!”

23Südonou rozümai sünasü thailaimoe touyu ko sünasü thaihou jürai maitao hrohi kubou loure. Ana Jisu nou puh hi puh hai thailai moe tea paoyu moe, ana “E khaivemo koute Enou puhye panou hria bunülouzü, sünanou neye donou dai bue?” tea puhnou paobaie.

24Chi haitao vanou zhopaoh peiyu ea chi haitao rükhaiyu rozümai nasü hainae; alia puhvei zhopaoh hai chechewe touyu hai Eletao nou süe.

Akhai Chi

25Ana Jisu nou soukhai touyu vah kukhe alaosou buhie. Sütaohai ali linou rüthou khailai toulouzü, rüre larübvü taosü deiphao teitei noua pfüpai louhoe tea Enou chowe.

Currently Selected:

JOHAN 21: POUMBSI

Highlight

Copy