SHURAI 32
32
Jakob nou Esau ye Daore donou Soudayu
1Jakob nou ludu tapoa kouyu phaki, puhnou duhinou rakivamai taoliye daoe. 2Puhnou puletaoye ngaolou khaie, puhnou paoe, “Haisü Ramai vei reihmai bue.” Südonou puhnou buh süna zhih sü Mahanaim tea sapeie.
3Jakob nou Edom teidei, Seir hi buyu puh jürai Esau hisü raia seiko pomaiye seitare. 4Jakob nou puletao hisü haikua neletao nou ajürai Esau hisü taho paopeio: “Ne thaihou Jakob, Esü Laban hinou shetumai soua hrüloua chunou khaive hie. 5Avei kikhaorü, rheisüh, nghitu zhaotu, alia qila mai naotu poutu taoli bue. Ajürai nou Eye leshi peire donou Enou chipao haitao seiwe.”
6Kopomai taonou dakhai ve Jakob hisü paoe, “Ehnou nejürai Esau hisü taho daore alia puhnou puhvei mai 400 koa neye daore donou laire.” 7Sükuyu ko süloukhaie, Jakob sü ngaopi loure ae levea loure. Südonou puhnou puhvei maitao, kikhaorü, nghitu zhaotu ae racho haitao hai me ahai souloua dade loure, 8daiolouzü puhnou haibüa choloure: “Esau nou me ali southare touyuma, me kukheli nasü panou tupa loulai.”
9Süthaisü Jakob nou haikua veachi paoe, “Oh apaoh Abraham Ramai, apuo Isaak Ramai, Oh Mapao, ahi haibüa paopeiyu Ramai, ‘Ne nuh hi ae ne kikhamai hi dakhai tawo, Enou neye havei soupeilai.’ 10Nenou ne kilai Eye haizhou koute zhuvea leshi peiyu hai Enou ngaozü moe, daiolouzü süüpo likhi poa Enou Jordan rei kacho tabaie, ana chuo Enou me ahai sa-a khaivere. 11Ajürai Esau bah hinou vupa peio tea khowe, molouzü puhnou Etao hrülaiye, pfümai ae nahmai koa souhawulai Enou ngaopie. 12Ana nenou paoe, ‘Enou ne hi havei soupeilai alia nevei tyaonah khesü panou chosha louhoyu rei hi venai zhoua peilai tea nenou apaopei khaitouyu nasü zhuvea-a licho peio.’ ”
13Süzhou khei puhnou buh sühi chaoloue alia puhnou husa-a laiyu kikhaorü hinou, 14nghike kraihai ae de kai, zhaotuke kraihai ae de kai, 15teutu naoyu rachoke shirou, choke raidai, chode kirou, rheisüh ke kai ae de kirou hai puh jürai Esau ye peilai tea dopa khailoure. 16Puhnou sütaosü khome kukua dade paloue ae khome alili hisü maiche khailoure alia khometao ko hisü ka-a khailoua shosho nou puhjü raia husa-a tawo tea kharochi peire. 17Arai khana me hisü puhnou haibüa paoe, “Ajürai Esau nou neletaoye kou daoloua neletao hi ‘Neletao vei paopu thaoe? Neletao daiki velai? Kikhaorü haitao hai thaoveie?’ tea nouyu phaki, 18neletao nou haibüa paolo: ‘Ne kilai Jakob veie.’ Puhnou haitao hai puh jürai Esau hi sapeina soua peire donou seitawe ae Jakob-a Etao thailo na-a laire.” 19Puhnou khome kukhe maitao teitei hia sükua “Esau ye kou daoyu phaki paolo tea paodou peie, 20alia ne kilai Jakob-a Etao thailo laire tea paolo.” Haikua kikhaorü haitao hai puhye peilouzü puh jüpa soulousüe alia Enou puhye ve daoyu phaki amah khaipei shulai tea Jakob nou tsücho loure. 21Puhvei sapeina taosü raia seitawua süzhou khei puhnou buh sühi chaore.
Jakob nou Ramai ye Peniel hinou Povayu
22Süzhou khei puhnou kushuloua puh chapfü ahai, qilapai ahai, ae puhnah maitao kiali saloua Jabbok rei kacho loure. 23Puhnou puletaoye saloua rei na kacho peire ae puhvei na teitei-a sa-a rei kacho peire, 24ana puh likhu buh sühisü bubaire.
Süthaisü maili nou ve teithemo koute puhye pova-e. 25Mai sünanou Jakob ye lolou hore touyu süloua puhye sü teikhao rao khoula peire. 26Süthaisü mai sünanou paoe, “Teithe pare, Eye panou tabaio.”
Ana Jakob nou chila peie, “Eye shiha peimo louzü neye panou talai moe.”
27“Ne zhih thaoe” tea mai nanou noure. Puhnou “Jakob” tea chila peie.
28Mai sünanou paoe, “Ne zhih Jakob tea kupu khailai more. Nenou Ramai-a ae mai-a povare alia nenou koloure. Südonou ne zhih sü chu thainou ‘Israel’ tea kulai.”
29Jakob nou paoe, “Ne zhih-a ahi paokhaio.”
Ana puhnou “Ne daisounou azhih sünüwe?” tea paowua puhnou buh sühinou Jakob ye shiha peie.
30Jakob nou paoe, “Enou Ramai ye ngaore ana E chua hria buhie.” Südonou buh sünasü “Peniel” tea puhnou sapeie. 31Jakob sü teikhao layu donou laokhao khao-a Peniel hinou tapayu phaki teinghi pare. 32Südonou chukoute Israel mainou teikhao rao hi buyu souke nasü toumoe, daiolouzü Jakob ye khoula peiyu sü teikhao rao sühie.
Currently Selected:
SHURAI 32: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
