SHURAI 30

1Rachel nou Jakob hi nahlia napeimoe. Südonou puhnou puh jürai paiye ngaorai-a Jakob hi paoe, “Eye nahmai peio, peimo louzü E thai bailai.”

2Jakob nou Rachel hi raroua paoe, “E Ramaiwu? Neye panou nahmai hrümoyu sü Ramai nou baie.”

3Süthaisü honapai nou paoe, “Akilai Bilhah haihi bue, puhye koa zükhaio, sükulouzü puh vanou E-a nahmai ngaolou shulai.” 4Südonou honapai nou Bilhahye puh cha hi peie, alia Jakob nou honapai sü maipfü soua poloure. 5Bilhah nou pou pfüloua nahpoutu ali naloue. 6Süthaisü Rachel nou paoe, “Ramai nou macha hinou chiku peie, puhnou avei akho sü keipeia Eye nahpoutu ali peie.” Südonou puh zhih sü “Dan” tea saloue. 7Bilhah nou nahmai hrüpuloua nahpoutu ali Jakob hi napu peie. 8Rachel nou paoe, “Enou ajürai paiye khoushoa veivare alia Enou koloure.” Südonou puh zhih sü “Naphtali” tea sapeie.

9Leah hai puhnou nahmai hrüpulai more touyu süloua puh kilaipai Zilpah sü poa ne chapfü soulouwo tea Jakob hi peiwure. 10Süthaisü Zilpah nou Jakob hi nahpoutu ali napeie. 11Leah nou “E rakovei shore” tea paoe. Südonou puh zhih sü “Gad” tea saloue. 12Leah kilaipai nou pua nahpoutu ali Jakob hi napeie. 13Alia Leah nou paoe, “E lesa shore! Daiolouzü naotumai nou Eye asayupai tea kulai.” Südonou puh zhih sü “Asher” (savayu) tea saloue.

14Southou chachiyu teile phaki Reuben nou sühao tayu hinou Mandrak#30.14 mandrak: haina hai tou-nah ngaolou süyu pounghou ali-e tea powe, südonou leshiyu pou soua maikhe mainou louche-a powe. ngaoloua puhpfü Leah hi pove peie. Süthaisü Rachel nou Leah hi “Zhuvea ne nahpoutu Reuben nou pove khaitouyu leshipou nasü chita E-a peio” tea khore.

15Ana Leah nou chila peie, “Nenou akhapuye saolouyu thaia khamo hie tea ne anah poutu vei leshipou-a pota khailai hiwu?”

Rachel nou paoe, “Ne nahpoutu vei leshipou chita peilouzü zhoukhei nenou puhye koa sazüwo.”

16Koukhe sü Jakob nou dou hinou ki hi khaiveyu phaki, Leah nou tapa puhye kuloua paoe, “Ne zhoukhei ahi talou zülai, daiolouzü anah poutu vei leshipou nou neye ngaloure.” Südonou puhnou süzhoukhei Leah hi talou züre.

17Ramai nou Leah akhosü noupeire, alia puhnou nahmai hrüloua Jokob hi nahpoutu angou chena sü napeie. 18Leah nou paoe, “Ramai nou avei ngayu muhsü ahi peie, daiolouzü Enou aqila paisü achapu hi peie.” Südonou puh nahpoutu zhih sü “Issakar” tea saloue. 19Leah nou nahmai hrüdakhai loua Jokob hi nahpoutu arou chena napeie. 20Süthaisü Leah nou paoe, “Ramai nou ahisü shiha veihli peiwure, chuo achapu nou Eye tsükhou peilai, daiolouzü Enou puh hisü nahpoutu arou napeire.” Südonou nahpoutu zhih sü “Zebulun” tea saloue. 21Haithaia puhnou nah naotumai ali naloue, alia puh zhih sü Dinah tea sapeie.

22Süthaisü Ramai nou Rachelye lichopeie, alia puhvei veachi sü noupeia panou nahmai ngaoloue. 23Puhnou nahmai hrüloua nahpoutu ali naloue, alia puhnou paoe, “Chuo ahi chaa peikhai touyu nasü Ramai nou pota peire.” 24Alia puhnou puh zhih sü Josef (peipuwo) tea saloua paoe, “Mapao panou ahi nahpoutu ali pua peitheo.”

Jakob nou Laban hinou Khoyu

25Rachel nou Josef ye nalouyu thai, Jakob nou Laban hisü paoe, “Eye seita peio, sükua panou Eye lah anuh hi ae ateidei hisü khaitawo. 26Enou ne vah kazhou koute vei-a soupeie touyu nenou süwe, südonou Enou vah soua kulouyu achapfü ae anah maitao ahi peio, E talaire.”

27Ana Laban nou puh hi paoe, “Eye panou chi haina paolowo: Ne vanou Eye Ramai nou shiha peie touyu Enou prou souyu hinou süloure. 28Nevei zho sü choloua paokhaio, Enou sütao teitei nou peilai.”

29Jakob nou chila peie, “Enou kabüa neye donou vah soupeie alia nevei kikhaorü khesü Enou khopeia tya kapaloue touyu paomoa nelah süwe. 30Daiolouzü E haihi vemojü nevei kikhaoru khesü daotou bubaie, ana chuo alao ngaopu loure. Avei vahso teitei hisü Mapao nou neye shiha peie. Ana chuo E-a lah akikha donou zhulaiyu teile vere mowu?”

31“Enou neye daidai peilai?” tea Laban nou nouwe.

Jakob nou chila peie, “Hakukhe halia peima veie, ana nenou ae toupei louzü Enou nevei kikhaorü sü khopu peilai. 32Eye panou zhou nevei kikhaorü taosü sühao zhutawo, alia zhaotu atei tya teitei alia chadao khaitouyu nghitu teitei sü azho phasoua doloulai. 33Sükulouzü E hai checheho cheche mosa touyu nenou lapasoua sülousüe. Nenou tave zhuyu phaki avei nghitu hrohinou chadao mouyu, ae zhaotu hinou teimoyu taralia nenou ngaolouzü, sünasü nevei vaoloua baie tea nenou sülousüe.”

34Laban nou paoe, “Veishore, nenou paoyu büa soulowo.” 35Ana süzhou sü Laban nou nghituke chadao pfüyu teitei daikupa khaire alia puhnou zhaotu teiyu teitei daikupa khaiwure. Sükua sütaosü puh nahpoutu taoye panou kholoure. 36Alia puhvei khome ye sü sa-a Jakob vei khome hinou teithe asü dou-a hupoa tare. Laban nou hupoa tashotao Jakob nou khosa-a tae.

37Süthaisü Jakob nou poplar, almond ae plane tea kuyu sübo hriyu taoli poloua heekao khaolai-a sübo sütao hisü kaadzü nyaloure. 38Sübo sütao sü poa zhaotu nou dzü keyu raikhaotao pahi khaipeire, daiolouzü zhaotu ae nghitu nou ve dzü keyu teile hinou pyawe. 39Sükua puletao pah hi sübo chapfüyu zhuloua pyakhaie teutu taosü chapfüa toulouwe.

40Jakob nou zhaotu khesü nghitu hinou buh kua daipa khaire alia Laban vei chadaoyu ae teiyu kikhaorü taosü pah hilo khaire. Sükua Laban vei hi pothou hümoa lah buh kua soupa khailoue.

41Jakob nou pfüphao veih ae hüveitao nou ve dzü kea pyayu phaki sübo nasü panou zhingao loure donou pah hi poa khaipei peiwe. 42Ana hüshitao pah hisü sübo nasü khaipei moe. Sükua kikhaorü hüshi taosü Laban vei soure, alia hübo veitao sü Jakob vei souloure. 43Haibüa Jakob nou kini nishoyu maili souloue, ae zhaotu, nghitu, kilaimai, racho ae rheisüh alao koloure.

Currently Selected:

SHURAI 30: POUMBSI

Highlight

Copy