SHURAI 24
24
Isaak Chapfü Ngaolouyu
1Chuo Abraham sü chükhao khaore alia Mapao nou puhye ha teitei hinou shiha peie. 2Puh kikha na veishi pei hi dosouyu puh kilai atsükhana hisü Abraham nou paoe, “Ne bah thaikou adeke kohi thouloua ahi chaachou soukhaio.#24.2 Ne bah thaiko...soukhaio: Haibüa chaachou soukhai touyu nahai souda loushie. 3Anah poutu vei chapfü hai Enou hrüa buyu Kanaan mai hinou phoulai moe, 4ana ateidei hi atyarai maitao nou hrüyu buh hinou anah poutu Isaak chapfü phoupeilai tea raki ae deiphao vei Ramai Mapao zhih sa-a chaachou soupeio.”
5Ana kilai nanou puh hi paoe, “Naotupai nou buh haihi athaiphü-a venü molouzü, ne nahpoutu ye nou nenou hrüveyu buh sühisü sei dakhaiho laiwu?”
6Abraham nou puh hi chila peie, “Anah poutuye sühi sei dakhaiho more donou zhulo. 7Apuo ki hinou ae Eye nalouyu nuh hinou Eye haihi savepeiyu nanou alia ahi haibüa vo soupeiyu nanou paoe, ‘Ne tyaonah taohi Enou teidei haina peilai’ tea paohpeiyu rakibu Ramai Mapao puhnou rakivamai ye nejü rai-a seipeilai, alia buh sühinou nenou anah poutu chapfü sü ngaoloulai. 8Ana naotupai nou ne thaifüa haihi venümo louzü, ahi nenou chaachou soukhai touyu nasü neye phuyu hae, ana nenou anah poutuye buh sühi sa-a dakhai ho laimoe.” 9Südonou kilai nanou puh bah thaikou puh paopu Abraham deke kohi thaithouloua Abraham nou paoyu büa soulai tea chaachou soupeie.
10Süthaisü kilai nanou puh paopu vei racho kirou ae sapeina tyatyali puh paopu hinou poloua Nahor nou hrüyu nuhdu Mesopotamia hisü holai tea tapare. 11Puhnou buh sühi vete louyu phaki, nuhdu vakou dzükhao hi puh vei racho panou kou khoukheloue, süsü koukhedao naotumai nou talou dzü pfüyu teile-e. 12Puhnou haibüa veachi paoe, “Oh Mapao, apaopu Abraham Ramai, zhou teithe Eye veilouyu peio alia apaopu Abraham hi nenou apaokhai touyu nasü licho peio. 13Zhukhaio, nuhdu haihi loumainah khenou talou dzü pfülaiyu dzükhao hai hinou Enou la-a bue. 14Enou loumainah ali hi ‘Zhuvea ne dzükhou pfüa nakou E-a panou dzü kelo’ tea paoyu phaki, ‘Kelo, alia Enou nevei racho-a dzü popa peilai’ tea paoyu paisü, ne kilai Isaak donou Mapao nou dolouyu nasü panou soulo. Sükulouzü nenou apaopu hi apaokhai touyu nasü vete peiwe tea Enou süloulai.”
15Puhnou veachi paolou chemo kinou Rebeka sü puh phao hinou dzükhou li pfüa taloure. Puhsü Abraham thaihou Nahor chapfü Milka nou napeiyu Bethuel nahpaie. 16Honapai sü alaosou zhurao veishoyu alia maili noua koa sazü sabu moyu loumainah alie. Puhnou dzükhao hi lou dzükhou louloua tapae. 17Sükisü kilai nanou tukou puh hi, “Zhuvea ne dzükhou hinou Eye panou dzü chita kelo” tea khore. 18“Kelo, apaopuwo” tea thalasou dzükhou sü poa nakouloua puhye dzü peia panou keloure. 19Puhye panou dzü kelou cheyu thaia puhnou paoe, “Nevei rachotao-a panou reikha loumo koute Enou dzü popa peilai.”
20Sükua honapai nou thashoa raikhao hi dzükhou nasü lathoua dzükhao hi lou dzü loupulai tea tudakhai loure. Sübüa puhvei rachotao dzü kechelou mosa honapai nou dzü popa peie. 21Puhnou raokhai timoa honapai ye zhua puhvei veidu nahai Mapao nou soukha peilaiho mosa tea tsüchoa bue.
22Rachotao nou dzü keche louyu thai, puhnou muhtei shoyu sana noubo ali ae sana baosa ahai poloua honapai ye peie, 23alia puhnou honapai hi noue, “Ne thao nah-e ahi paopeio? Alia Etao ve nepuo ki hisü chaoloure buh bulai homoe?”
24Honapai nou puh hisü paoe, “E Nahor chapfü Milka nou napeiyu Bethuel nahpaie. 25Eh ki hi rouvao ae chongha khaibuh alia mai buloure buh-a bue.”
26Kilai nanou pei pfünakou loua Mapao ye thore, 27alia paoe, “Cheche-a apaopu hi apaokhai touyu chi vete peiyu apaopu Abraham Ramai ye paoshowe. Mapao nou Eye süthai sa-a avei paopu kityarai mai hi save thoupeie.”
28Naotupai nou ko teitei sü puh pfüpuo kikha mai hi tuho paoe. 29Laban tea kuyu Rebeka poumai ali bue, puhnou Abraham kilai nanou buyu dzükhao hisü tutare. 30Puhnou sana noubo ae sana baosa sü puh tupai hinou ngaoloukhaie, alia puhnou puh tupai Rebeka vei chipaotao hinou “Mai sünanou ahi paowe” touyutao hai süloukhaie, puhnou tuho mai sünasü dzükhao hi rachotao phi hinou la-a buyu ngaoloue. 31Puhnou paoe, “Mapao vei shiha ngaoyu nare, aki hi tave loushe, daisounou kijü kinou la-a bue? Aki hi neletaoye donou chaore buh alia rachotao panou bure buh souda khaitoue.”
32Südonou homai taonou puh ki hisü tave loure alia Laban nou rachotao kousü pokou peie, alia puh nou rachotaoye panou toure rouvao ae panou bure buh sü ngaopeire, alia puh ae puhye koa salaiyu maitao phi khüre dzü popa peire. 33Süthaisü panou tousore donou touso sü souda chewure, ana Abraham kilai nanou paoe, “Enou ne hi paolai tea nou buyu nasü paoche loumojü, E hatou laimo hie.”
Laban nou paoe, “Paopa khaio.”
34Sühinou puh nou paoe, “E hai Abraham vei kilai-e. 35Avei paopu Abraham hisü Mapao nou shiha alao peia puhye panou toungiyu mai ali souloue. Puh hisü kikhaorü-a, sana raka-a, kilai naotu poutu, racho ae rheisüh-a alao peie. 36Apaopu chapfü Sarah nou chülouyu thainou nahpoutu ali napeie, alia puhvei buyu kini teitei sü puh hi peikhaiwure. 37Apaopu nou Eye panou chaachou ali soua paoe, ‘Anah poutu chapfü soure donou Enou hrüa buyu Kanaan naotumaiye phoulai moe, 38ana apuo vei kikha mai hinou alia avei kityarai mai hinou anah poutu Isaak chapfü phou-a bailai.’ 39Südonou Enou apaopu hisü paoe, ‘Naotupai nou athai füba louzü daisoulai?’ 40Ana puhnou ahi sü paoe, ‘Enou teithetsü puh chi züa buyu Mapao puhnou puh vei rakivamaiye sü neye koa seita peilai alia nenou tapayu vahso nasü panou vete loulai. Avei tyarai mai hinou alia apuo vei kihikha mai hinou anah poutu vei chapfü sü phoulo. 41Nenou taho avei kityarai mai hi paolouzü, ae puletao nou ne hi naotupaiye sü peibayuma nenou ahi chaachou soukhai touyu nasü neye phukhai more.’
42“Enou zhou dzükhao hi velouyu phaki haibüa veachi paoe, ‘Oh Mapao, apaopu Abraham Ramai, zhou teithe Eye panou aleli vetelo, alia apaopu Abraham hi nenou apaokhai touyu nasü licho peio.’ 43Enou dzükhao haihi loumainah taonou talou dzü pfülaiyu hinou la-a bue. Enou loumainah ali hi ‘Zhuvea ne dzükhou hinou Eye panou dzü kelo’ tea paoyu phaki, 44‘Kelo, alia Enou nevei rachotao-a dzü popa peilai’ tea paoyu paisü avei paopu nahpoutu donou Mapao nou souda khaipeiyu napaire tea süloulai. 45Sükua Enou veachi paoche loumoa bukinou, Rebeka sü dzükhou poa taloure, alia puhnou dzükhou louloua tapayu kisü Enou puh hi paoe, ‘E-a panou dzü kelo’ tea khoe. 46Puhnou puh dzükhou sü thalasoua deiphi pokouloua paoe, ‘Kelo, alia Enou nevei rachotao-a dzü popa panou keloulai.’ Enou dzü sü keloure alia rachotao-a panou keloure. 47Süthaisü Enou ‘Ne thao nahge?’ tea noue. Puhnou ‘E Nahor chapfü Milka nou napeiyu Bethuel nahpaie’ tea chila peie. Südonou Enou nghoukha ae baosa puh hi peie. 48Süthaisü Enou apei pfüa nakou Mapao ye tholoue, alia apaopu Abraham Ramai Mapao, Eye ludu acheche hilo süthai sa-a apaopu vei nahpoutu chapfü phoure hisü puh vei kityarai mai nah naotumai ngaopeiyu vanou paoshowe. 49Südonou chuo, nenou apaopu hi kaozü hinou soupeilai toulouzü, ahi paopeio, moe touyuma paopeio, sükulouzü Enou bakha zhoulo talaiho moa bakha nalo talai touyu tsücho loulai.”
50Süthaisü Laban alia Bethuel nou chila peie, “Haibüyu haisü Mapao hinou ve-a baie, südonou ahai puonah nou veiyuma moa shiyuma chi lia paolou hoe. 51Zhukhaio, Rebeka-a haihi bue, saloua tawo, Mapao nou paoyu thaifüa puhye sü panou ne paopu nahpoutu chapfü sü soulo.” 52Abraham kilai nanou puhai puonah vei paila keilouyu thai, deiphi nakouloua Mapao ye khurüe. 53Süthaisü kilai nanou muhteiyu shahu ae sana, alia sabanü khesü popaloua Rebeka hi peie, puh pou mai hie alia puhpfü hia muteina alao peie.
54Süthaisü Abraham kilai alia puhye koa tayu maitao nou touso touloua süzhou kheisü zütare. Puletao nou shona kushu louyu thai, puhnou paoe, “Eye panou apaopu hisü dakhai tawo.”
55Ana Rebeka pou maitao ae puh pfünou nou paoe, “Naotupaiye sü teithe kirou phali Eye panou koa bulouraio.”
56Ana puhnou paoe, “Eye nuchao peiso, daiolouzü Mapao nou avei veidu hainasü panou vete loure, Eye panou apaopu hisü dakhai tabaio.”
57Puletao nou chila peie, “Naotupaiye kuloua noulai hie puhnou daie paolaisa.” 58Puletao nou Rebekaye kuloua noue, “Ne mai hainaye koa tanü homoe?”
“Koa ta-a bailai” tea puhnou chila peie.
59Südonou puletao nou Rebeka alia puh kikha hinou kilai tsümai ali koa panou Abraham kilai ae puhvei maitao sa-a tare. 60Puletao nou Rebekaye haibüa ha peie,
“Etao tupaiye sü panou nahmai thethe pfü soulo theo,
alia ne tyao-nahtao ye panou ngaobamai jünou veilou theo.”
61Süthaisü Rebeka nou soudaloua puh kilaipai koa racho phao hisü taopa loure alia Abraham vei kilaiye koa tapare.
62Chuo Isaak nou Beer-la-hai-roi (Hria abuna nou Eye ngaoyu Dzükhao) hinou tave Kanaan khekou nou buyu Negeb hinou bue. 63Puhnou koukhe sü dou hilo talai tayu phaki rachotao khaiveyu zhingaoe. 64Rebeka nou Isaakye zhingao louyu phaki puhnou rachophao hinou deiphi kouloua, 65puh kilai hisü paoe, “Dou hinou Etao hilo takouyu mai nahai thaoge?”
Kilai nanou paoe, “Apaopu sü honare.” Südonou puhnou pahosah poloua puh pah holoure.
66Kilai nanou Isaak hi puhnou souyu vah veishi paopeie. 67Süthaisü Isaak nou Rebekaye sa-a raichoki puh pfü Sarah nou buyu sahpao hi salou loure alia sükua honapai sü Isaak chapfü souloure, alia puhnou Rebekaye leshitou peie. Sübüa honapai nou Isaakye puh pfü thaitayu thai le sousa peie.
Currently Selected:
SHURAI 24: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
