SHURAI 23
23
Sarah Thaiyu alia Abraham nou Puhye Vuhre donou Dei Hüyu
1Sarah nou po 127 hrüloue. 2Puhsü Kanaan teidei Kiriatharba (süolouzü Hebron) hinou thaie, alia süvanou Abraham nou kra-a dopfüe.
3Süthaisü Abraham nou puh chapfü thaiphao sü thaowua Hitmai hi taho paoe, 4“Esü neletao hinou shetumai ali soua hrüa bue, achapfüye vuhre donou dei chita Eye zhopeiwo.”
5Puletao nou chila peie, 6“Aduwo, Eletao chi keipei khaio; ne sü Etao hrohinou khouko buyu vemai nahpoutu alie, Etao vei khüh aveih khana nou doloua ne chapfü thaiphao sü poa vuhlo, Etao maita linoua ne chapfüye poa vuhre dei vanou neye nulaimoe.”
7Süthaisü Abraham nou tashu laloua dei sühi hrüa buyu Hit maisou nghoujü nou nakou khoukhü loue, 8alia puh nou puletao hi paoe, “Neletao nou achapfü thaiphao panou haihi vua bailai toulouzü, Zohar nahpoutu, Ephron hi Eye donou chi paokha peio, 9sübüa puh vei dou kai hi buyu Makpelah chuh qulu nasü Eye panou hülouwo. Enou sünasü muhma chekho-a peilai alia neletao nghoujü nou dei sünasü avei souloua maiye vuhyu buh soure donou puh panou ahi zhothou peio.”
10Hitmai puona Ephron-a mai kukhe maitaoye koa chobua bue, alia puhnou Abraham hisü Hit maisou nghoujü hinou chila peie, 11“Aduwo, apai keipeio, maisou nghoujü hinou avei dei sünasü ae chuh qulu nasü ne hi peiwulai, ne chapfü thaiphao nasü poa vuhlo.”
12Abraham nou khurüloua sühi hrüa buyu Hit maisou sühi vejüa buyu maitao nou sülousü pai hinou, 13Ephron hi paoe, “Zhuvea achi keipeio, dei süna vei muh hai Enou peilai, zhuvea popeio. Sükua dei sühisü achapfü thaiphao poa vuhyu buh soulai.”
14Ephron nou chila peie, 15“Aduwo, apai keipei khaio, dei sünasü shahu 400 muh-e, ana ahai kohisü dai bue? Nevei chapfü thaiphao sü poa dei sühi vuhlo.” 16Puhnou paoyu Abraham-a ae touloua Hit maisou nghoujü nou süteithe hinou hupomai nou tayu zhai hinou Ephron nou paoyu shahu 400 nasü choloua popa peire.
17Sükua Mamre teinghi palo buyu Makpelah hi buyu Ephron vei dei alia sühi chuh qulu, dei sühaohi buyu süübe teitei alia na veishi hai, 18nuh süna bomü talouyu Hitmai hrülai nghoujü hinou Abraham vei souloure.
19Süthaisü Kanaan dei hi Mamre (süolouzü Hebron) vei teinghi palo buyu Makpelah hi dei süna vei chuh qulu hi Abraham nou puh chapfü Sarah ye sü poa vuhre. 20Sükua Hitmai hinou hülouyu füdei alia chuh qulu nasü mai vuhyu buh soua Abraham vei soure.
Currently Selected:
SHURAI 23: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
