SEI-ATAMAI VAHTAO 4

Pitar ea Johan ye Tsüme hi Save Layu

1Alia Pitar ea Johan nou maikhemai taohi chipao-a buyu hinou napaomai taoli, Rathoki khoyu maitao peichana, ea Sadukimaitao sü sühi tave loure. 2Puletao sü sei-atamai sühainou maikhemai taohi Jisu hai athai hinou hridashu loure tea paodou pei-a thaimai-a hrida shulai tea zhopaoh peiyu donou le vamosho loure. 3Südonou puletao nou puhaiye niloua thainaisho koute hukha hi thoukhaire, daiolouzü teile süki sü koukhe loure. 4Ana chipao süna choulouyu mai alaosou louche loure; alia maikhemai sütao pei phouyu kisü mai thengou pha pare.

5Alia thainaisho kisü Jihudimai peichamaitao, tsümaitao ea razhai dou-apeimaitao sü Jerusalem hinou tave dzüloure. 6Alia sühisü napao peichana Anna, Kaipha, Johan, Alekjandar, alia napao peichana vei kukhe tarai maitao sü ve bue. 7Sühinou puletao nou puhaiye panou puletao nghojü hi laloua puhaihi noue: “Dai khouko nou moa thaoh zhih hinou nehainou haisü souwe?”

8Sükisü Pitar nou Rako Mashinou phouloua puletao hi paoe, “He maikhe maiye süthai-apei maitao ea tsümaitao, 9Ehye zhou teithe phi shomai alihi vah avei soupeiyu vanou kakua mai hainaye souveiloue tea noulouzü, 10neletao hrülai ea Israel maitao hrülainou haihai süloukhaio, süolouzü neletao nou kros vanou veatheayu ana Ramai nou athai hinou souhri shulouyu Nazareth hi Jisu Khrista vei zhih hinou mai haina sü veiche khouloua neletao nghojünou la-a bue. 11Jisu hai sheeyu larübvü hinou,

‘Neletao ki souyu maitao nou lulaiyu chuh nasü kainghou vei matsü tsülai chuh süna daloure,’

tea paoyu nasüe.

12Alia khailu loure sü kukhe maitali hi-a hae, daiolouzü Ehye khailu peilousü vuzüyu raki khehi maikhemai hrohi peikhai touyu zhih kukhe alia hae.”

Pitar ea Johan ye Hukha hinou Phapeiyu

13Sükisü puletao nou Pitar ea Johan vei khuveiyu sü ngaoloua, alia puhaisü larü sümoyu maitamai libaie touyu süloukhaie puletao sü khupa loure; alia puhaisü Jisu ye koa laiwe touyu sü puletao nou süloure. 14Ana veilouyu mai sünanou puhaiye koa la-a buyu sü ngaoloua puletao nou halia moe tea paolou hore. 15Südonou puletao nou puhaiyenou tsüme dzüyu buh hinou vakouhi tapare chi lüpeiwu-a puletao lah alinou lihi phaloua, 16sübüa paoe, “Mai haina hai hisü Eletao nou dai soulai? Daiolouzü puhai nou khupa vah aduli souloure touyu sü Jerusalem hi hrüa buyu maikhemai hrülainou süloure, alia süsü Eletao-a motou louhoe. 17Ana ko süsü maikhemai hrohi panou paodoupu talou more donou Eletao nou puhaiye sü maitalihia zhih hainasü paodou putaso tea soupi-a tukhawu laikhe.”

18Südonou puletao nou puhaiye kuda khailoua Jisu zhih hinou hatalia paokhai more moa doupei more donou tukhatsü peire. 19Ana Pitar ea Johan nou puletao hi chila peie, “Ramai chi züyu jünou neletao chi züyu nanou Ramai nghojünou züho zümosa neletao lah chikukhaio; 20daiolouzü Ehwo Ehnou ngaoyu ea chouyu nasü paomo shalouhoe.” 21Alia maikhemai donou puletao nou puhaiye tudee peiloure dolia phouhaloua puhaiye soupipu peiwu-a phapeire; daiolouzü maikhemai hrülainou pa-a buyu sütao vanou Ramaiye sholoure. 22Daiolouzü khupasoua souvei louyu mai sünasü po raidai lah pare.

Lüloumai taonou Veachi Paoyu

23Alia Pitar ea Johan ye phapeiyu thaisü puhai nou puhai mehi khaiveloua napao adumai taonou ea tsümai taonou paoyu chi teitei sü puletao hi paongao peire. 24Alia puletao nou süsü choulouyu kisü puletao lesü alikhei souloua Ramai hinou paikua veachi paoe: “He Aku Kulai Mapao, nenou raki, deiphao, zaidu ea sütaohi buyu hrülaiye sü soupeie! 25Nenou Eh puo-pao, nevei kilai David mü hinou Rako Mashiye panou haibüa paoe:

‘Tahrüh kukhe mainou daidonou rarouwe,

alia maikhe mainou daidonou hako tsü chowe?

26Mapaowo ea puhvei Razhepu pei hisü,

deiphao hi vemai taonou tashu laloure,

ea teidei khomai taonou tave dzüloure.’

27“Daiolouzü chechenou Herod ea Pontia Pilat nou tahrüh kukhemai ea Israel maitaoye koa nenou Razhepu soupeiyu sheeyu nevei kilai Jisu pei hi aetou nümoa nuhdu haina hinou tave dzüloure. 28Sükua ne khouko ea nevei tsüdonou rai-a palai tea chodayu teitei souloure donou puletao nou tave dzüloure. 29Alia chuo, Mapao puletao nou soupiyu hisü zhupeikhaio, alia ne kilai taohi nevei chipao sü khuveishoa paoloure donou soukha peikhaio. 30Sounou souvei peiloure donou nebah sü lapeikhaio, alia sheeyu ne kilai Jisu zhih hinou sheetao ea khupa vahtao souloure donou soukha peikhaio.”

31Alia puletao nou veachi paocheyu kisü, puletao nou vedzüa buyu buh nasü nguloure; alia puletao hrülai sü Rako Mashinou phoupeiloua Ramai Chipao sü khuvei-a paoshu tare.

Lüloumai taonou Kini koa Seiyu

32Chuo lüloumai hrülai sü tsü-le alikhei souloure alia puletao maitalinoua lah puhvei buyu na talisü lah puhveie tea paokhai more, ana puletao vei buyu teitei sü maisouvei soua seibaire. 33Alia Mapao Jisu nou hrishu louyu vanou sei-atamai taonou khouko dushoa zhopaoh soue ea zhuvea dushoa puletao hrülai pei hi kou loupeie. 34Puletao hrohi sü toujü shojü mai alia hae, daiolouzü füdei moa ki buyu mai taonou sütaosü zholoua sühinou ngaolouyu pousha taosü pove 35sei-atamaitao bah hi thoupeie; alia maili linou molou shilaiyu thaifüa mai hrülai hisü zhihpeie.

36Sübüa Kupra hinou veyu Levi tamai, sei-atamai taonou Barnabas tea kuyu (süvei ko louzü, le soudu peiyu nahpoutu toue) Josef nou 37puhvei doufü ali zholoua pousha süsü pove sei-atamaitao bah hi thoupeie.

Currently Selected:

SEI-ATAMAI VAHTAO 4: POUMBSI

Highlight

Copy