3 JOHAN 1
1
1Atsüna hinou —
Enou acheche hinou leshiyu Gaias hi rüwe.
2Enou leshiyu Asa, neye panou hata hinou kaozhou veia bure donou alia nevei rakonou veia buyu büa nevei pfüphaoa panou veia bure donou Enou veachi paoa bue. 3Daiolouzü Khristamai thaihou jürai kamainou taveloua nevei acheche hrü vanou zhopaoh souyuki Esü daizhozhou lesasa, süolouzü chekhaoa ne hai teisanou acheche hinou ta-a bue. 4Anah maitao nou acheche hinou hrüa bue tea choulouyu süna jünou dukouyu Avei asah kukhe hare.
Gaiasye Paoshoyu
5Leshiyu Asa, nenou nevei Khristamai thaihou jüraitao hi ea koulihsoua shevai-shesü maitaohi soupeia buyu vah tali hinou ne sü daizhozhou chechesa. 6Puletao nou nevei leshi vanou hai hi buyu lüloumaimehi zhopaoh peire. Ramaiye sousa peire zhaido hinou leshia puletao vei veihdu nasü nghojü hilo takoure donou soukha peikhaio. 7Daiolouzü puletao nou lüloumo maitao hinou soukhayu halia pomoa tapayu sü puh zhih donou baie. 8Südonou Eletao-a acheche hinou koa vahsou zhoyumai soure donou sükuyu maitaoye Eletao-a soukha züe.
Diotrephes alia Demetria
9Enou lüloumaime hi jüshoyu seiko ali rüve, ana puh lah aduna sounüyu Diotrephes nou Enou süthai peiyu sü popei bae. 10Südonou Enou velouzü, puhnou soua buyu süolouzü shi-kha chinou Eletao pei hi puhnou raochichi-a buyu teiteisü popa ngaopeilai. Alia sükoutea khamoa puhnou thaihou jürai maitaoye-a shepei bae, alia puletaoye shepei nüyu maitaoye-a puhnou nuwe ea puletaoye lüloumaime hinou hutawe.
11Leshiyu Asa, ashi zhaisü douso, ana avei zhainasü doulo. Avei souyu puhsü Ramai hinou ve; ashi souyu puhsü Ramaiye ngaolou mohie.
12Mai hrülainou ea acheche sünanou-a Demetria vanou zhopaoh avei peiwe. Eletao-a puh vanou zhopaoh avei peiwe ea Eletao vei zhopaohsü chekhaoe touyu sü nelenou süwe.
Akhai Khurüyu Chidoh
13Enou nehi rüre alaosou bue, ana Enou sünasü rüsüünou ea larüdzünou seia rükhailai moe. 14Enou neye thala-a daoresü rei-a bue, alia zhu kheihaonou tavedaoa koa Ahai chi phalai.
15Kaonayu sünou nehi bupeiyu souloutheo.
Haihi buyu ne samaitao nou nehi khurüyu chidoh seivewe. Eletao samai alili hi khurüyu chidohsü pola peikhaio.
Currently Selected:
3 JOHAN 1: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.