JUD 1

1Jisu Khrista kilai ea Jems thaihou Jud hinou—

Ramai nou kupa louyutao süolouzü Puo Ramai vei leshi hinou hrüa buyu ea Jisu Khrista donou pokukhai touyutao hi rüe.

2Khu-leshi, kaonayu ea leshinou phoupeia buyu sü neletao vei souloutheo.

Madayu Dou-apeimaitao

3Leshiyu Asakhemai, Eletao nou koa zha ngaozho-a buyu khailu peiyu vei vanou Enou neletao hi rüre donou te-a buyu hisü, Eye neletao hi Ramai nou Puh maitao hi lühli hinou ea teisa donou peikhai touyu lü sünaye donou soutaosou reihzüa bure donou rüpeire süsho loure. 4Daiolouzü daorainou Ramai nou moe tea mah dukhaiyu, Ramaiye sümoyu puletao vei khu-lou vah donou Eletao Ramai vei zhuvea paomah-paomo peiyu, alia Eletao vei likhuyu Dou-apeio ea Mapao Jisu Khristaye pobayu mai kamaisü kheia Eletao hrohi velou loure.

5Alia neletao nou chi sütaosü sükhaia bukhaiyuma, Enou neletaoye panou lipulou nüwe, süolouzü Mapao nou Israel maitaoye Ejipt teidei hinou khailupa peikhaia thaikhai hisü lülou moyu khemaitaoye sü souhare. 6Alia lah puletao vei buh hinou bumoa puletao vei chekhaoyu buh nasü thaowu-a tayu rakiva maitaoye sü puhnou Dushoyu Chikuyu Teithe süki koumo sasü hakhailai moyu hurainou phuloua khekou teizhi buh hi bekhaire. 7Sübüa Sodom, Gomorrah ea sühai ngheikihi buyu nuhdutao-a khulou souyu ea pfüphao vei zhaido moyu mah vanou puletao nou akhai hayu meivei tudee pfüyu sünanou maikhemai hrülai hi sheetoua tukha peiwe.

8Sütoukhaia, zhaido sübüyu hinou mai haitaonou puletao vei zho ngaoyu hinou lah puletao vasouye sü mah southoupei baiwe; puletaosü Ramai vei khakhehi bubae ea khouko-avanou koa buyu reikouhi buyu taoye sü sou ahrao peiwe. 9Ana rakivamai peichana Maikhel koutea Rashinaye Moses vei pfüphao vanou sao-a veivayu kisü, puhsü Rashinahi sou ahraoyu chinou mah dukhai peire khu habaire, ana “Mapao nou neye züpeitheo!” tea paobaie. 10Ana mai haitaonou puletao nou sükhaimoyu tali hisü paoshi showe; alia tsü hayu rekhaonatao büa puletao nou pfüna tsünou sülouyu na sütaonou puletaoye souhare. 11Puletao donou daizhozhou ngaopisa! Daiolouzü puletao nou Kain nou tayu luduna thaifü loure. Pousha vanou lah puletaosü Balaam nou soumahyu mah nahi duloure alia Korah nou souyu büa puletao nou reih soubvüyu donou puletaoye sü puh kua souhare. 12Puletao nou neletaoye koa ahrao hazhia touzho-shozhoyu sütaonou neletao vei leshi-nühvei chaa taoe; puletaosü lah puletaoye khobaiyu zhaokho maitaoe; puletao hai teikhai nou hüpoa laiyu teirü samoyu teihaoe; alia puletaosü rashithou shimoyu, thai ahai khoyu, maa noupu paipalaiyu kaaki süübetaoe. 13Puletao sü lah puletao vei ahrao nanou dzümala büa houngpayu shishoyu dzü-akhüh nasüe; puletaosü motayu teivuhtaoe; puletaoye donou maiteiyu teizhibuh nasü teisa donou khaidare.

14Alia mai sütao vanou Adam hinou maikha anai chena Enok nou haibüa thaikhai pare donou paoe, “Zhukhaio, Mapao nou Puhvei Sheeyu Rakivamai thetheye koa; 15mai hrülaiye chikure donou, puletao nou ramai loumoyu vahtao soukhai touyu sütao vanou puletao hrülaiye mah dukhai peire donou, alia ramai loumoyu mahmai taonou puh pei hi shi-kha chi paokhai peiyu donou mah dukhai peire donou laire!”

16Mai haitao sü mülealeayu ea nousüyu maitao baie; puletaosü lah puletao nou ashi naye züpayu thaifüa hrübaie; puletaosü lah puletao vanou khaophu soubaie ea puletao lah zhiloure donou kukhe maiye paoshoh baie.

Tukhayu ea Doupeiyu

17Ana, leshiyu Asakhemai, Eletao Mapao Jisu Khrista vei sei-atamai taonou raia neletao hi paopeiyu taosü lipukhaio. 18Puletao nou neletao hi, “Akhai teithe kisü Ramai loumoyu puletao vei ke-zhe züpa thaifüa tayu ea neletaoye konü laiyu maikhe maitao velai” tea paore. 19Sükhe maitaosü neletaoye memesoua dadeyu, pfüphao züpa thaifüa hrüyu ea Rakoye salai moyutaoe. 20Ana leshiyu Asakhemai, neletaowo louzü lah neletao vei sheekayu lü süna hinou soushu palouwo ea Rako Mashi vei khouko hinou veachi paoa bulo, 21alia neletao nou neletaoye teisa ahrihi pove peire Eletao Mapao Jisu Khrista vei zhuvea zhia buyu hinou, neletao lah Ramai leshi hinou bulo.

22Alia leki-ledayu maiye zhuvea peikhaio; 23kukhe maitaoye mei hinou daopaloua puletaoye khaipeikhaio; alia kukhe maitao hisü piyu nou koa zhuvea peikhaio, ana puletao vei ke-zhe züpa nou souhaokhai touyu puletao vei sahnü taosü ngaora loukhaio.

Paoshoyu Veachi

24Neletaoye kao-dulaiyu hinou khopeilou süyu ea neletaoye chaa ha-a ea sasa-a dushoyu Puh nghojühi pove peilou süyu Puh hisü — 25Jisu Khrista vanou Eletao vei likhuyu Ramai, Khailu-apeio hisü, kathe, akukulai, khouko ea du-shosü daoraiki-a, chua ea akhai khailai koutea souloutheo! Amen.

Currently Selected:

JUD 1: POUMBSI

Highlight

Copy