2 PITAR 3
3
Mapaowo Khaivere Apaopeiyu
1Leshiyu Asakhemai, chuwo haina hai Enou neletao hi rüwuyu Seiko ahai chena süe. Seiko haihai hinou neletao hi chi haitao paopeia panou neletao lekhehi tsü avei paloure Enou tewe. 2Sheeyu rachi paolamai taonou dao rainou paopa khaitouyu chipaotao ea neletao vei Sei-atamaitao nou neletao hi peikhai touyu Mapao ea khailu-apeio vei chikhatao hai Enou neletaoye panou licholou nüwe. 3Raikai-a, neletao nou sülou vuzü molouzü shie, süolouzü, akhai teithetao hisü, lah puletao vei ke-zhe züpa thaifüa hrüyu mai kamai velai, puletao nou neletaoye konüa, 4haikua paolai, “Puhnou velai tea apaopei khaitoue, puhnou apaopei mowu? Puh kahi bue? Eh puopao maisü thaita khaire, ana deiphao soushu-arai kua chu koutesü ha teitei hai kheihao-a bubaie!” 5Dao raiki hinou Ramai nou chikha pei-a rakitao ea deiphao hai soupeie touyu vei acheche nasü puletao nou süh-a bulukhu chopei bae. Deiphao hai dzü hinou ea dzü vanou soupeie, 6alia dzü vanou süolouzü dzüdu veloua dao raiki deiphao nasü souhare. 7Ana chu buyu rakitao ea deiphao hainawo louzü panou meinou souhawure donou Ramai vei chikha sünanou pokhaiwure. Sütaosü ramai loumoyu maikhe maitaoye chikuyu ea souhawumo teithe koute donou pokhaire.
8Ana leshiyu Asakhemai, haina hai ngaipeiso! Süolouzü, Mapao nghojühiwo nai teithe ea po theli hai takuyu hae; puhye donou hai haisü kheihao baie. 9Kamainou shosho soubaie tea chokhai-a, Mapaowo louzü puhnou apaopei khaitouyu soupeire hisü shosho soumoe. Süjüwo, puhnou neletaoye koa shamea peiwe, daiolouzü puhnou maitaliye hai panou souhawuyu sü züpa moe, ana maikhemai hrülaiye panou puletao mah hinou le dalouyu sü züpawe.
10Ana Mapao vei Teithe hai avaomai kua velai. Teithe sükisü rakitaosü kho chihshoyu alinou koa habailai, ratei hi buyu nataosü meisou hinou chahalai, alia deiphao ea sühi buyu nateitei habailai. 11Na haitao veishi hai haibüa souha laiyu donou, neletaosü kakuyu mai soulaisa? Neletao vei hrümaisü shee vuzülai ea Ramai hi popeilai, 12sübüa neletao nou Ramai teithesü kholai ea süsü panou thala-a vere donou neletao nou soutaosoua telai, daiolouzü sükisü rateitaosü meinou dei-a souhawulai, alia rateihi nataosü meisou nou chahawulai. 13Ana Eletaowo Ramai nou apaopei khaitouyu süolouzü: acheche hrümaiye koa hrülaiyu ratei ashu ea deiphao ashu sünaye khoa bue.
14Südonou, Asakhemai, neletao nou Teithe sünasü khoa buyu hisü, Ramai nghojünou sheetoua ea chaalia ha-a ea puhye koa kaona-a buloure donou soutaosou telo. 15Eletao Mapaowo nou shamea peiyuhai puhnou neletaoye khailu loure donou teile kao avei peiwe tea cholo. Sübüa Eletao nou leshiyu Eh thaihou jürai Paul nou-a Ramai nou puh hi peikhai touyu ratsü süna thaifüa neletao hi rüpeie. 16Puhvei seiko pfüphou hisü chipao haitao pao-a, kheihaobüa rüe. Puhvei seikotao hisü süre tateiyu taoli louwe, sütaosü tsühamai ea lichemo maitao nou kukhe sheeyu larübvütao hia souyu kua kao-zü moa paodou peiwe. Südonou puletao nou lah puletao pei hi ha-kare povewe.
17Ana Asakhemai, neletaowo haisü rai-a süloure. Südonou neletaoye zhai hayu maitao vei kao-zü moyu sünanou süthaipoa talou more donou ea chu neletao vei khailu louyu buh haina hinou kaotalou more donou, neletao leikei-a bulo. 18Ana Eletao Mapao ea khailu-apeio Jisu Khrista vei zhuvea ea tsü hinou tobai soumoa dushulo. Puh hisü chua, akhainou khaikoute-a adushosü souloutheo! Amen.
Currently Selected:
2 PITAR 3: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
