ROM 4
4
Entawn atân Abrahama
1Chuti ni se, tisa lama min thlahtu Abrahama thu kha engtin nge kan sawi tâk ang le?
2Thiltih avânga thiam chantîr ni se, Abrahama khân chhuan tûr a nei mahna, amaherawhchu, Pathian hmaah chhuan tûr a nei hauh lo. 3Lehkha Thu-in eng nge a sawi kha? “Abrahama chuan Pathian a ring a, chu a rinna avâng chuan thiam chantîr a ni,” a ti a. #Gen. 15:6; Gal. 3:6; Jak. 2:23. 4Hna thawktu hlawh chu khawngaih thilpêk a ni lo va, bat anga ngaih a ni zâwk. 5Mi sual thiam chantîrtu chu miin a rina, thil tih vâng ni lova thiam chantîra a awm hian, a rinna avângin thiam a chang kan ti a ni. 6Thiltih vâng ni lova Pathianin thiam a chantîrte nihlawhzia Davida pawhin hetiang hian a sawi:
7‘An bawhchhiatnate ngaihdamsaka awma, an sualte thai bova awmte chu an va nihlawh êm! #Sam. 32:1,2.
8Lalpan sual neia a ruat loh chu an nihlawh e,’
tiin.
9Chu malsâwmna chu serh tan tân chauh nge serh tan lohte tân pawh? “Abrahaman a rinna avângin thiam a chang,” tih a ni kan ti a. 10A serh tan hma thu nge a serh tan hnu thu? Engtia ngaih tûr nge? A serh tan hnu ni lovin, a serh tan hma thu a ni zâwk. 11A serh tan hmaa a rinna avâng ngeiin Pathianin thiam a chantîr tih entîr tûrin serh a tan chauh zâwk a ni. Tichuan, serh tan lo mah se rinna avânga Pathianin thiam a chantîrte tân chuan Abrahama chu an thlarau lam pa a ni.#Gen. 17:10. 12Serh tante pa pawh a ni, serh tan an nih mai vâng ni lovin, kan pa Abrahaman serh a tan hmaa a rin ang bawka rinna an neih avângin a ni.
Rinna avânga thutiam hlen thu
13Dân zawm vâng ni lovin, rinnaa thiam chantîr a nih avâng zâwkin Pathian chuan Abrahama hnênah amah leh a thlahte chuan khawvêl hi an rochung dâwn a ni tih thu a tiam a ni. #Gen. 17:4-6; 22:17,18; Gal. 3:29. 14Dân zawm hi roluahtu nihna ni se, rinna hi thil lothlâwn mai a ni ang a, thutiam pawh chu eng mah a ni lo tihna a ni ang. #Gal. 3:18.
15Dân chuan thinurna chu a hring a, Dân awm lo sela bawhchhiatna pawh a awm dâwn si lo. 16Abrahama thlah zawng zawng tân, Dân zâwmtute chauh ni lovin, ama rin anga ringtute tân Pathian thilthlâwnpêk a nihzia tilang tûrin rinna avângin a ni, Abrahama hnênah thu a tiam ni, #Gal. 3:17. 17‘chi tam tak paah ka siam ta che,’ tih ziak ang khân, a rin Pathian, mitthite tinung lehtu, thil awm lote awmtîrtu hmuhah chuan; ani chu kan zavaia pa a ni. #Gen. 17:5. 18Beisei tûr a awm loh pawhin beiseiin a ring tlat a; tichuan, chi tam tak pa a lo ni ta, ‘I thlahte chu khiti zât khi an la ni ang,’ tih ziak ang khân. #Gen. 15:5. 19Kum za dâwn lai a ni tawh a, a taksa ngaihtuah chuan mitthi ang mai a ni tawh a, Sari pawh chu fa nei rual a ni tawh lo tih a hre reng chungin, a rinna a chuai chuang lo va, #Gen. 17:17. 20rinna tlachhamin Pathian thutiam chu a ringhlel lo va, a rinna a chak tial tial a; tichuan, Pathianin a chawimawi ta zâwk a ni. 21Thutiamtu chuan a tiam tawh chu a hlen thei ngei ang tih a ring tlat a. 22Chuvâng chuan alâwm, a rinna avânga thiam chantîr a ni an tih ni.
23Hei hi ama chungthu sawina atân maia ziak a ni lo. 24Keiniho, kan Lalpa Isua mitthi zîng ata kaithotu ringtute, rin vânga thiam chang tate tân pawh hian ziak a ni. 25Isua chu kan bawhchhiatnate avângin tihhlum a ni a, thiam kan channa tûra kaihthawh a ni bawk. #Isa. 53:4,5.
Currently Selected:
ROM 4: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
