ROM 12

Kristaa nun thar

1Chuvângin, unaute u, Pathian khawngaihna avâng hian, inthawina nung leh thianghlim, Pathian lawm tlâk ni tûrin, in taksa chu a hnêna hlân tûrin ka ngên a che u, chutiang chu in rawngbâwl dân tûr tak a ni e. 2Tûnlai khawvêl awm dân ang hi ṭâwm suh u; in nun phung chu, in rilru tihthara awmin, tihdanglam ni vek rawh se; tichuan, Pathian duhzâwng, ṭha leh lawm tlâk leh ṭhat famkim chu in hrethiam thei ang.

3Pathian mi pêk khawngaihna avâng hian in zînga tu mah inngaihlu lutuk lo tûrin ka ngên a che u. Pathianin mi tin hnêna rinna a pêk ang zêlin mahni phu tâwk rilru pu rawh u. 4Taksa pum khatah pêng hrang tam tak kan nei a, pêng zawng zawngin thawh hrang an nei ṭheuh;#1 Kor. 12:12-26. 5chutiang bawkin keini pawh tam tak ni mah ila, Kristaah chuan taksa pumkhat kan ni a, kan za hian taksa pêng anga inzawm tawn ṭheuh kan ni. 6Khawngaihna min pêk ang zêlin thilthlâwnpêk hrang hrang kan dawng ṭheuh a ni; thu hril lam a nih chuan, kan rinna ang zêlin hril ila,#1 Kor. 7:7; 12:4-11; 1 Pet. 4:10,11. 7rawngbâwl lam a nih chuan, ṭhahnemngai takin bâwl ila, zirtîr lam a nih chuan zirtîr ila; 8mi thlamuan tûr a nih chuan theihtâwp chhuah ila; petu chuan phal takin pe sela, rorêltu chuan taima takin rêl sela, puih ngai puitu chuan hlim takin pui rawh se.

Kristiante nun dân tûr

9Hmangaihna chu vervêkna tel lovin ni rawh se. Sual chu hua ula, a ṭha chu pawm tlat rawh u. 10Unau inlainat angin inlainat tawn ula, inchawimawi tawn uar rawh u. 11Inthlahdul hauh lovin rilru phûr takin Lalpa rawng chu bâwl rawh u. 12Beiseina chuan tilâwm che u sela, tihduhdah in tuar pawhin chhel takin tuar ula, eng lai pawhin ṭawngṭai rawh u. 13Unau tlachhamte chu chhawmdâwl ula, mikhual lawm chîng rawh u. 14A tiduhdahtu che u chu malsâwm ula, ânchhia lawh suh u. #Mt. 5:44; Lk. 6:28. 15Lâwmte chu lâwmpui ula, ṭapte chu ṭahpui rawh u.#Sam. 35:13. 16Angkhat vekin inen ula, intivei suh u, mi tête pâwl zâwk rawh u.#Thuf. 3:7. 17Sual chu sual vêkin thungrûl lo ula, mi zawng zawng ngaiha mawi ngaihtuah zâwk rawh u. 18Nangni chuan in theihtâwpin mi zawng zawng nên inrem tum rawh u. 19Duh takte u, phuba la suh ula, Pathian thinurna kian zâwk rawh u. “ ‘Phuba rêng rêng keima lâk tûr a ni, keiman ka thungrûl ang,’ Lalpan a ti,” tih ziak a ni si a. #Lev. 19:18; Deut. 32:35; Heb. 10:30. 20Chuvângin, i hmêlma a rilṭâm chuan ei tûr pe rawh, a tuihâl chuan in tûr pe rawh; chutianga i tih chuan a zak êm êm dâwn a ni. #Thuf. 25:21,22 (LXX); Mt. 5:44; Lk. 6:27. 21Sual ngam chein awm suh la, ṭhatnain sual chu ngam zâwk rawh.

Currently Selected:

ROM 12: MIZCLBSI

Highlight

Copy