SAM 42
42
Saltâng ṭawngṭaina
Hla hruaitu tân: Kora pâwlte Hla fing
1Sakhiin luite tui a châk êm êm ṭhîn ang hian,
Aw Pathian, kei pawhin ka ngai êm êm ṭhîn che a ni.
2Ka nun hi Pathian châkin,
Pathian nung châkin a tuihâl a ni.
Pathian hmaa kalin engtikah nge ka inlan ang?
3Ka mittui avângin chaw rêng ka ei thei lo,
Ka hmêlmate lah chuan,
“Khawiah nge i Pathian chu?” min lo ti chhên a.
4Tûn hma ka ngaihtuahin ka lung a chhe hle ṭhîn,
Pathian in pana mipui ka hruai ṭhin te,
Hlim taka fak hla saa kan kût ṭhin laite kha:
5Engtizia nge ka ngui êma,
Ka rilru a hah tâk êm le?
Pathianah chuan ka innghat ang a,
Min chhandamtu hmêl chu hmuin ka la fak ang.
6Aw Pathian, ka rilru a ngui hle mai,
Hermon tlâng te, Mizar tlâng te,#42:6 ‘Mizar tlâng aṭanga luang chhuak, Jordan ruam...’ tih theih a ni.
Jordan ram aṭangte hian ka hre reng ṭhîn a che.
7I tui luang ri hum hum angin,
Tui thûk takte chu a phûl bulh bulh mai a,
I tuifâwn inchhawkte chuan min tuam tâk hi.
8 Lalpan a ngilneihna chu chhûnah a tilang a,
Zânah a fak hlain min awi.
Mi tinungtu Pathian hnênah ka ṭawngṭai ang.
9Pathian, ka lungpui hnênah,
“Engati nge min thlahthlama,
Ka hmêlmate kut tuara ka rûm le?” ka la ti ang.
10Ruh vuak sawmsak ang maia nain
Ka hmêlmaten min diriam a,
“Khawiah nge i Pathian chu?”
Min lo ti chhên bawk si.
11Engtizia nge ka ngui êma,
Ka rilru a hah tâk êm le?
Pathianah chuan ka innghat ang a,
Min chhandamtu hmêl chu hmuin ka la fak ang.
Currently Selected:
SAM 42: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
