SAM 103
103
Pathian hmangaihna
Davida ta
1Aw ka thlarau,
Lalpa chu fak la,
Ka chhûnga awm zawng zawng hian a hming thianghlim chu fak rawh se.
2Aw ka thlarau, Lalpa chu fak rawh,
A ṭhatna zozai hi theihnghilh suh ang che.
3I bawhchhiatna tinrêng a ngaidam a,
I natna zawng zawng pawh a tidam a,
4I nunna chu khur thûk ata a tlan chhuak a,
Ngilneihna leh lainatnain min hual vêl ṭhîn.
5Thil ṭha tinrêng ka duh tâwk min pe a,
Mupui angin kei pawh ka tuai thar ṭhîn.#103:5 Mupui pakhat chu a tar hnuin a inlip a, a naupang thar leh ṭhîn tih thawnthu a awm, chutiangin a phuahtu hian tleirâwl ṭha leh niin a insawi.
6 Lalpan dik takin thil a ti a,
Hnehchhiahte ro a rêlsak ta.
7Mosia hnênah a duhzâwng a hrilh a,
A thiltihtheihzia Israel-te a entîr kha.
8 Lalpa chu mi lainat ṭhîn, khawngaih thei tak a ni,
Thinnel, ngilneihna ngah a ni. #Jak. 5:11.
9Mi sawisêl chîng tak a ni ngai lo va,
A thinur lah a pai reng ngai hek lo.
10Kan sual angin kan chungah a ti lo va,
Kan bawhchhiatna angin min thungrûl duh hek lo.
11Lei aiin vân a sâng ang hian,
Amah ṭihtute chungah chuan a ngilneihna a sâng a ni.
12Khawchhak leh khawthlang a inhlat ang hian,
Kan khawlohna min dah sawnsak ta daih a ni.
13Pain a fate a lainat ṭhîn ang hian,
Lalpan amah ṭihtute chu a lainat ṭhîn.
14Kan derthâwnzia#103:14 ‘Engtia siam nge kan nih’ tih theih a ni. a hre chiang a,
Vaivut mai kan nih a hre reng a ni.
15Mihring nun hi zawng hlobet ang chauh a ni,
Ram hnim pâr a lo vul ve a,
16Thliin a han chhêm a,
A bo ta daih mai a,
Hmuh tûr a awm tawh lo ang hi a ni.
17 Lalpa ṭihtute tân a ngilneihna a ngai reng a,
A ṭhatna lah an tuchhuan thleng pawhin a ngai reng ṭhîn,
18A thuthlung vawng rengtute leh
A thupêk zâwm ṭhînte tân.
19 Lalpan vânah a lalṭhutthlêng a han rem a,
Engkim chungah ro a rêl ta.
20A thupêkte zâwma, a thute ngaithla ṭhîn,
Vântirhkoh chak takte u, Lalpa chu fak rawh u.
21A rawngbâwla, a duhzâwng ti ṭhîn
Vâna mite u, Lalpa chu fak rawh u.
22A thuhnuaia awm zawng zawng leh
A thilsiamten Lalpa chu fak rawh se,
Aw ka thlarau, Lalpa chu fak rawh.
Currently Selected:
SAM 103: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
