MATHAIA 22
22
Lawi chaw tehkhin thu
(Lk. 14:15-24)
1Mipui hnênah tehkhin thuin Isuan thu a sawi leh a, 2“Vânram chu lal tu emaw, a fapa tâna mo lawmna ruai ṭheh nên chuan tehkhin theih a ni. 3Ruai ṭheh tûra a sâwmte chu ko khâwm tûrin a bawihte a tîr a; mahse, an lo kal duh lo va. 4Ani chuan bawih dangte a tîr leh a, ‘Ka sâwmte hnênah khân, ngai teh u, ruai chu ka peih ta a, ka bâwngpate leh ran châwm thaute ka talh a, engkim peih a ni ta e; ruai ṭheh tûrin lo kal tawh rawh u, ti rawh u,’ a ti a. 5Nimahsela, an lo ngaihsak lo va, an kalsan ta mai a, a ṭhen an feh a, a ṭhen an sumdâwnnaah an kal a. 6Mi dangte chuan a bawihte chu an man a, zahthlâk takin an sawisa a, an tihlum ta mai a. 7Lal chu a thinrim ta a, a sipaite a tîr a, chûng tualthattute chu a tiboral a, an khua pawh a hâlsak ta a.
8“Tin, a bawihte hnênah chuan, ‘Ruai chu peih a ni ta, ka sâwmte erawh kha chu lo tel tlâk an ni lo. 9Chuvângin, kawng pêng ṭhuamahte kal ula, mi in hmuh apiang ruai ṭheh tûrin va sâwm rawh u,’ a ti a. 10Tichuan, bawihte chu an chhuak a, kawngahte chuan an kal a, an hmuh apiang, mi sual leh mi ṭhate pawh an hruai khâwm ta vek a; tichuan, mo lawmna in chu ruai kîltutein a lo khat ta a.
11“Lal chu ruai kîltute en tûra a lo luh chuan inneihna thuam inbel lo mi pakhat a rawn hmu a; 12a hnênah, ‘ṭhiana, engtizia nge inneihna thuam inbel lova heta i lo luh le?’ a ti a. Ani chu a ngawi ta reng a. 13Lal chuan a rawngbâwltute hnênah, ‘A kut leh ke phuar ula, pâwn thimah paih chhuak rawh u, chutah chuan an ṭap ang a, hâ an ṭhial ang. #Mt. 8:12; 13:42,50; 24:51; 25:30; Lk. 13:28. 14Sâwmte chu tam tak an ni a, thlante erawh chu tlêm tê an ni,” a ti a.
Kaisara hnêna chhiah chawi
(Mk. 12:13-17; Lk. 20:20-26)
15Chumi lai chuan Farisai-ten a thu sawia an man theih dân tûr an sawi ho va. #Mk. 3:6; 8:15. 16An zirtîrte chu Heroda pâwla mite nên a hnênah an tîr a; anni chuan, “Zirtîrtu, mi dik tak i ni a, tihtakzetin Pathian thu i zirtîr ṭhîn a, pawisak chuan tu mah i nei si lo va. 17Chuvângin, engtin nge i ngaih min hrilh teh khai, Kaisara hnêna chhiah chawi tûr kan ni nge ni lo?” an ti a.
18Isuan an sualzia chu a lo hria a, “Mi vervêkte u, engah nge mi ṭawng awhtîr in tum? Chhiah tangka chu mi han entîr teh u,” a ti a. 19A hnênah duli an rawn la a. 20Ani chuan an hnênah, “Hei, tu lem leh tu hming nge chuang hi?” a ti a. 21Anni chuan, “Kaisara,” an ti a. Ani chuan an hnênah, “Chuti a nih chuan, Kaisara thil chu Kaisara pe ula, Pathian thil chu Pathian pe ta che u,” a ti a. #Rom. 13:7.
22Chu chu an hriatin mak an ti hle a, amah chu an kalsan a, an kal ta daih a.
Thawhleh thu
(Mk. 12:18-27; Lk. 20:27-40)
23Chumi ni vêk chuan Sadukai-ho, thawhlehna a awm lo tite chu a hnênah an lo kal a,#Tirh. 23:8. 24“Zirtîrtu, Mosian, ‘Fa nei lovin mi thi sela, a unauvin a nupui chu rochungin a unau tân chi a thlahsak tûr a ni,’ a ti a. #Deut. 25:5. 25Aw le, kan zîngah unau mipa pasarih an awm a, a upa berin nupui a nei a, chi thlah lovin a thi a, a nupui chu a nau tân a hnutchhiah a; 26chutiang bawkin pahnihna pawh, pathumna pawh, pasarihna thlengin a ni a. 27Chu mite thih hnu chuan hmeichhia pawh chu a thi ta a. 28Tichuan, thawhlehnaah chûng mi pasarihte zînga tu nupui ber nge ni ang; an za-in an nei ṭheuh si a?” tiin an zâwt a. 29Isuan a chhâng a, “Lehkha Thu leh Pathian thiltihtheihna in hriat loh avângin in kal sual ṭhîn a ni. 30Thawhlehnaah chuan nupui pasal an innei dâwn tawh lo va, vâna vântirhkohte ang mai an ni zâwk dâwn a ni. 31Mitthi thawhlehna thu-ah chuan Pathianin, ‘Kei hi Abrahama Pathian, Isaka Pathian, Jakoba Pathian ka ni,’ tia in hnêna a sawi kha in chhiar ngai lo vem ni? 32Ani chu mitthi Pathian a ni lo va, mi nung Pathian a ni zâwk,” a ti a.#Exod. 3:6; Lk. 7:30; 11:45; 14:3. 33Mipui chuan chu chu an hriatin a thu zirtîr chu mak an ti hle a.
Thupêk ropui ber
(Mk. 12:28-34; Lk. 10:25-28)
34Sadukai-te chu a chhâng dang tih Farisai-te chuan an hriatin an inhmu khâwm a. 35An zînga Dânhremi#22:35 Mss ṭhenkhatah ‘Dânhremi’ tih hi a tel lo. pakhatin amah fiah nân, #Lk. 10:25-28. 36Zirtîrtu, Dânah hian eng thupêk hi nge ropui ber?” tiin a zâwt a. 37Ani chuan, “Lalpa i Pathian chu i thinlung zawng zawngin, i nunna zawng zawngin, i rilru zawng zawngin i hmangaih tûr a ni. #Deut. 6:5. 38Chu chu thupêk ropui leh pawimawh ber chu a ni. 39A dawttu, a anpui chu, ‘Nangmah i inhmangaih angin i vêngte hmangaih rawh,’ tih hi a ni.#Lev. 19:18; Mt. 19:19; Rom. 13:9; Jak. 2:8. 40Chûng thupêk pahnihah chuan Dân leh zâwlneite thu zawng zawng a inkhaikhâwm vek a ni,” a ti a.
Mesia chungchâng zawh fiahna
(Mk. 12:35-37; Lk. 20:41-44)
41Farisai-te kal khâwm chu Isuan thu a zâwt a, 42“Krista chu eng angin nge in ngaih? Tu fapa nge ni?” a ti a. Anni chuan, “Davida,” an ti a. 43Ani chuan an hnênah, “Davidan engtizia nge thlarauva sawiin ani chu, ‘Lalpa,’ a tih si?
44‘Lalpa chuan ka Lalpa#22:44 Lalpa tih hmasa hi Pathian a ni a, a hnuhnûng hi Mesia a ni. hnênah,
Ka ding lamah lo ṭhu rawh,
I hmêlmate i ke hnuaiah ka han dah ang e,’ a ti si a. #Sam. 110:1; Tirh. 2:34,35; Heb. 1:13; 10:13.
45Davidan ani chu, ‘Lalpa,’ a tih si chuan, engtin nge a fapa mai a nih theih?” a ti a.
46Tu man kam khat mahin an chhâng thei lo va, chumi a chin chu tu man thu dang rêng rêng an zâwt ngam tawh hek lo.
Currently Selected:
MATHAIA 22: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.