TIRHKOHTE 24

Paula thubuai

1Ni nga hnuah chuan puithiam lalber Anania leh upa ṭhenkhatte chu ukil pakhat Tertula hruaiin an lo thleng a, Paula chu Ramawptu hmaah an khing ta a.

2Paula an koh chhuah hnu chuan Tertula chuan an khinna thu a han sawi ta a: “Felik zahawm ber, nangma zârah thlamuang takin rei tak kan lo awm ta a, i finna avângin he rama mite tân hian thil ṭha lo tak tak te chu, 3kawng tinrêngin hmun tinah siam ṭhat a lo ni ta hi ṭha kan ti a, kan lâwm takmeuh a ni. 4I tân ninawm ka nih loh nân tawi têin ka han sawi ang e, khawngaih taka min ngaihthlâksak tûrin ka ngên a che. 5He pa hi mi hnawksak tak, ram tina Juda zawng zawng zînga buaina tichhuaktu, Nazaret pâwl hotu ber a ni tih kan hria a. #Tirh. 17:6. 6Tempul pawh tihbawlhhlawh a tum a, kan man ta a ni.#24:6 Mss ṭhenkhatah, ‘kan dân angin a chungthu rêl kan tum a; 7 mahse, sipai hotu lalber Lusia a lo kal a, min lâk luihsak a; tin, a hêktute chu i hmaa kal tûrin thu min pe a ni,’ tih a tel. #Tirh. 21:28. 8Nangmah ngeiin chhâl la, kan hêkna zawng zawng hi a hnên aṭangin i hre chiang thei ang,” a ti a. 9Juda-te pawhin a hêkna chu an lo thlâwp a, ‘chutiang chu a ni’ an lo ti a.

Felika hmaa Paula thiam thu sawi

10Ramawptu chuan thu sawi tûra a han mitmei veleh Paula chuan, “He chite rorêltuah hian kum tam tak i ṭan tawh avângin ngaihṭha takin ka thiam thu ka sawi dâwn a ni. 11Jerusalem-a Pathian be tûra ka han kal chu ni sâwm leh ni hnih lo liam a la ni lo tih i hre thei ang. 12Tempulah emaw, sunagog-ah emaw, khawpui khawi laiah mah mi ka hnial leh buaina siam tûra mi ka fuihpawrh tu man an hre lo. 13Tûna an mi hêkna pawh hi a bulbâl i hnêna sawi tûr eng mah an hre hek lo vang. 14Thil pakhat ka hrilh ang che. ‘Pâwl hrang,’ an tih Kawng thu angin min thlahtute Pathian ka be ṭhîn a, Dân leh zâwlneite Lehkhabu ziak zawng zawng ka ring tho va. 15Pathian ka ring a, mi fel leh fel lote thawhlehna a awm ka ring bawk a; chu chu anmahni ngei pawhin an ring ve si a.#Dan. 12:2; Jn. 5:28,29. 16Chuvângin, eng lai pawha Pathian leh mihring hmaa sawisêl kai lo, chhia leh ṭha hriatna thiang neih ka tum hrâm hrâm ṭhîn a ni.

17“Kum tam tak ka thang bo hnuah, ka chipuite chhawmdâwlna pe tûr leh inthawina hlân tûrin Jerusalem-ah ka han kal a. 18Chutianga ka ti lai chu Tempulah mi hmu a; mahse, mipui punkhâwmna a awm lo va, buaina a awm hek lo. #Tirh. 21:17-28. 19Asia rama mi Juda ṭhenkhat an awm ve a, chûngte chuan ka chunga thu pawi an neih chuan hetah lo kalin i hmaah mi hêk rawh se. 20A nih loh leh heta lo kalte hian Sanhedrin hmaa ka din lai khân eng nge ka tihsual an sawi tûr a ni; 21an hmaa ka din laia he thu kam khat, ‘Mitthi thawhlehna thu-ah vawiin hian in hmaah chhâlin ka awm a nih hi,’ ka tih kha a nih nghâl loh chuan,” a ti a. #Tirh. 23:6.

22Felika chuan Kawng thu chu a lo hre hle tawh a, “Sipai hotu lalber Lusia a lo thlen thlâk hunah i thu ka la ngaihtuah ang e,” a ti a, an thu chu a dah ta rih a.

23Paula chu zalên deuhva awmtîra, a ṭhianten a rawng an bâwlsak pawh khap lova vêng tûrin sipai za hotu chu thu a pe a.

Felika leh Drusili hmaah Paula

24Tin, ni eng emaw zât hnuah Felika chu a nupui Drusili, Juda mi hruaiin a lo kal a, Paula chu a kohtîr a, Krista Isua rinna thu a sawi chu a ngaithla a. 25Thiam chantîrna thu te, insûm theihna thu te, rorêlna lo awm tûr thu te Paulan a sawi lai chuan Felika chuan hlauhawm a ti hle a, “Kal leh ta rih la, hun remchâng ka neih hunah ka la rawn ko vang che,” a ti a. 26Paulan tangka a pêk a beisei tel bawk a; chuvângin, a ko fo va, a be ṭhîn a ni.

27Kum hnih a vei hnu chuan Felika chu Porkia Festan a thlâk a. Felika chuan Juda-te tihlâwm a duh a, Paula chu lung inah a hnutchhiah ta a.

Currently Selected:

TIRHKOHTE 24: MIZCLBSI

Highlight

Copy