TIRHKOHTE 23

1Paula chuan rorêltute chu a han en chiang a, “Unaute u, vawiin thleng hian Pathian hmaa ka awm dânah, ka chhia leh ṭha hriatnaah mahni inthiam lohna eng mah ka nei lo,” a ti a. 2Puithiam lalber Anania chuan Paula kianga dingte hnênah, “A ka kha bensak rawh u,” a ti a. 3Paula chuan, “Nang, bang hnawih vârpa. Pathianin a bêng zâwk ang che. Dân anga mi ngaihtuah tûrin i ṭhu a, dân lo anga mi ben tûr i ti maw?” a ti a.#Mt. 23:27,28; Ezek. 13:10-15; Lev. 19:15. 4A kianga dingte chuan, “Puithiam lalber i hau vei maw?” an ti a. 5Paula chuan, “Puithiam lalber a ni tih ka hre lo va ni, ‘In hnam rorêltu chungah thu ṭha lo sawi suh,’ tih ziak a ni si a,” a ti a. #Exod. 22:28.

6Paulan a ṭhen Sadukai te, a ṭhen Farisai te an ni tih a hria a, Sanhedrin-ah chuan a au va, “Unaute u, kei pawh Farisai ka ni a, Farisai fapa#23:6 ‘Fapa’ tih hi, ‘fir,’ tihna a ni zâwk mah. pawh ka ni. Mitthi thawhleh beiseina thu-ah rorêlna hmaah ka ding a nih hi,” a ti a. #Tirh. 26:5; Fil. 3:5. 7Chu chu a sawi zawh chuan Farisai-te leh Sadukai-te chu an inhnial a, Sanhedrin mite chu an inṭhen ta a. 8Sadukai-te chuan, “Thawhlehna rêng a awm lo, vântirhkoh te, thlarau te pawh a awm hek lo,” an ti a. Farisai-te erawh chuan chûng chu an ring si a. #Mt. 22:23; Mk. 12:18; Lk. 20:27. 9Tichuan, an râwl a ring ta hle a, Farisai lama mi Dân zirtîrtu ṭhenkhat an ding a, an ṭang ta tlat a, “He mi chungah hian thil dik lo eng mah kan hmu lo ve, Thlarauvin emaw, vântirhkohvin emaw an bia a ni mahna,” an ti a. 10An inhnial nasat deuh deuh avângin, sipai hotu lalber chuan Paula chu an pawh sawm a hlau va, zuk kala, an zîng ata Paula la chhuaka, kulhbînga hruai tûrin sipaite chu thu a pe a.

11Chumi zân chuan Lalpa chu Paula kiangah a lo ding a, “Huai takin awm rawh; Jerusalem-a ka thu i hril ang bawk hian, Rom khuaah pawh i hril tûr a ni,” a ti a. #Tirh. 18:9; 19:21; 26:16,23.

Juda-ten Paula an phiar

12A tûk zîngah chuan Juda-te chu Paula phiarin an inkhâwm a, an thah hma chu eng mah eia in lo tûrin chhia an chham a. 13Chutianga phiartute chu sawmli aia tam mah an ni. 14Puithiam lalte leh upate hnênah an kal a, “Paula kan thah hma chuan eng mah ei lo tûrin chhia kan chham ta vek a ni. 15Chuvângin, tûnah nangni leh rorêltuten a thu chiang lehzuala ngaihtuah tum angin, Paula chu in hnêna hruai thla tûrin sipai hotu lalber hnênah han sawi rawh u; a lo thlen thlâk hmaa that tûrin kan inpeih reng a ni,” an ti a. 16Nimahsela, Paula farnua fapain thah tuma an lo chân rûk tûr thu chu a lo hria a, a han kal a, kulhbîng chhûngah a lût a, Paula a hrilh a. 17Paula chuan sipai zahotu zînga pakhat a ko va, “He tlangvâl hian sipai hotu lalber hnênah thu eng emaw sawi tûr a nei e,” a ti a. 18Tichuan, sipai hotu lalber hnênah chuan a va hruai a, “Mi tâng, Paula khân mi ko va, he tlangvâl hi i hnêna rawn hruai tûrin mi ngên a, i hnênah thu eng emaw sawi tûr a nei a ni âwm e,” a ti a. 19Sipai hotu lalber chuan a kutah a vuan a, a kai hrang a, a rûkin, “Eng nge mi hrilh tûr i neih chu?” a ti a. 20Ani chuan, “Paula thu hi chiang lehzuala ngaihtuah tûr angin naktûkah Sanhedrin hmaa hruai chhuk tûrin Juda-ten dîl che an remti tlâng a. 21Nimahsela, an thu lo awih suh ang che. An zînga mi sawmli aia tamin an châng reng a, chu mite chuan an thah hma chu eng mah eia in lo tûrin chhia an chham a. Tûnah hian i thu nghâkin inpeih sa-in an awm reng a ni,” a ti a. 22Sipai hotu lalber chuan tlangvâl chu a kaltîr a, “Hêng thu hi mi hrilh tih tu hnênah mah sawi suh ang che,” a ti tlat a.

Ramawptu Felika hnênah Paula

23Sipai za hotu pahnih a ko va, “Kaisari-ah zânin dâr kuaa kal tûrin sipai zahnih leh sakawr chungchuang mi sawmsarih leh fei keng mi zahnih buatsaih rawh u. 24Tin, Paula chuanna tûr sakawrte buatsaih bawk ula, him takin Ramawptu Felika hnên in thlen tûr a ni,” a ti a.

25Hetiang hian lehkha a ziak a.

26“Klaudia Lusian ramawptu zahawm ber Felika chibai a bûk e.#Lk. 1:3.

27He mi hi Juda-ten an man a, an thah dâwn laiin sipaite hruaiin ka zuk kal a, Rom mi a ni tih ka hriatin ka chhan chhuak a. 28Tin, tihhlum an duh chhan hriat ka duh a, an Sanhedrin hmaah ka hruai a. 29An Dân engahte emaw hêk a ni tih ka hmu a; nimahsela, thihna khawp meuh emaw, tânna khawp meuh emaw eng mah a tih ka hre thei si lo. #Tirh. 23:6. 30Juda-ten thah tumin an phiar ru tih miin mi hrilh veleh i hnênah ka rawn tîr ta nghâl a ni: a hêktute pawh a chunga thu pawi an neih apiang i hnêna sawi tûrin ka hriattîr tawh e,” tiin.

31Chutichuan, sipaite chuan thupêk angin a zân a zânin Paula chu an hruai a, Antipatri khua an thleng a. 32A tûkah chuan sakawr chunga chuang mite chu Paula hruai zêl tûrin an kal a, sipai dangte chuan an kîrsan a, kulhbîng lamah an haw leh ta a. 33Anni chuan Kaisari chu an thleng a, Ramawptu hnênah lehkha chu an pe a, Paula pawh a hmaah an dintîr a. 34Ramawptu chuan a chhiar zawhin, khawi lama mi nge a nih a zâwt a, Kilikia rama mi a ni tih a hre ta a. 35“Nangmah hêktute an lo thlen hunah i thu ka ngaihtuah ang,” a ti a; Heroda ina#23:35 Heroda in, vêngtu sipaiho awmna, Grik ṭawng lamah Praitorian tih a ni. daha vên tûr thu a pe a.

Currently Selected:

TIRHKOHTE 23: MIZCLBSI

Highlight

Copy