1 KORINTH 1

Chibai bûkna

1Paula, Krista Isua tirhkoh ni tûra Pathian duhzâwng anga koh leh, kan unaupa Sosthena chuan, #Tirh. 18:17. 2Korinth khuaa Pathian kohhran awm, mi thianghlim ni tûra koh, Krista Isuaa tihthianghlim leh hmun tina kan Lalpa Isua Krista, (anni leh keini Lalpa) hming lam zawng zawng chibai kan bûk e. 3Pathian kan Pa leh Lalpa Isua Krista hnên ata khawngaihna leh remna in hnênah awm rawh se.

Krista malsâwmna

4Pathianin Krista Isuaa khawngaihna a pêk che u avâng hian in chungthu-ah ka Pathian hnênah eng lai pawhin lâwmthu ka sawi ṭhîn. 5Amahah chuan kawng tinrêngin tihhausak in ni a, thu-ah leh hriatna tinrêngah in ṭhang zêl a, 6Krista thu kan hril khân nangmahniah zung a kai nghet ta a; 7tichuan, kan Lalpa Isua Krista lo lan in nghah chhûng hian thlarau lam thilpêk eng mah in tlachham lo va. 8Kan Lalpa Isua Krista nia sawisêlbova awm tûrin a tâwp thlengin a tinghet ang che u. 9A Fapa, kan Lalpa Isua Krista pâwlnaa ko lûttu che u Pathian chu a rinawm a ni.

Kohhrana inṭhenna

10Unaute u, kan Lalpa Isua Krista hmingin ka ngên a che u, in zîngah inṭhenna awm lovin thukhat vua ula, rilru thuhmun leh ngaih dân hmun khat neiin awm khâwm rawh u. 11Ka unaute u, in zîngah inngeih lohna a awm tih Kloii chhûngten mi rawn hrilh a. 12Chu chu ka han sawi ang e: “Kei Paula pâwl ka ni, kei Apolova pâwl ka ni, kei Kifa pâwl ka ni, kei Krista pâwl ka ni,” mi tinin in tih hi. #Tirh. 18:24. 13Krista chu ṭhenin a awm#1:13 Mss ṭhenkhatah, ‘Krista chu ṭhen theih a ni lo,’ tih a ni. em ni? In tân Paula chu khenbeh a ni em ni? A nih loh leh Paula hmingin baptisma in chang em ni? 14Krispa leh Gaia lo chu in zîngah tu mah ka baptis loh avângin ka lâwm a ni. #Tirh. 18:8; 19:29; Rom. 16:23. 15Tuten emaw ka hminga baptisma chang angin an sawi dah ang che u. 16Stefana chhûngte pawh ka baptis tak e. Chûng mite tih loh chu mi dang ka baptis emaw ka hre lo. #1 Kor. 16:15. 17Krista chuan baptis tûrin mi tîr lo va, Chanchin Ṭha hril tûrin mi tîr zâwk a ni si a. Thufing hmanga hril tûrin mi tîr lo, chutilo chu Krista kraws hi engmah lovah an ngai dah ang e.

Krista, Pathian thiltihtheihna leh finna

18Kraws thu chu boral mêkte tân chuan thu âtthlâk a ni, keini chhandam mêkte tân erawh chuan Pathian thiltihtheihna a ni.

19‘Mi fing finna ka tiboral ang a,

Mi thiam thiamna chu ka hnâwl bâwk ang,’

tia ziak a ni. #Isa. 29:14 (LXX). 20Mi fing chu khawiah nge? Dân hremi chu khawiah nge? Tûnlai thila hnial thiam chu khawiah nge? Pathianin khawvêl finna hi thil âtthlâkah a siam ta a ni lâwm ni? #Job. 12:17; Isa. 19:12; 33:18; 44:25.

21Pathian finna chu hei hi a ni, khawvêlin finna hmanga Pathian an hriat theih loh hnuin, kan thu hril âtthlâk hmanga ringtute chhandam hi: chu chu Pathian lâwmzâwng tak a ni si a. 22Juda-te chuan chhinchhiahna thil mak an phût kher a. Grik-te lahin finna ngawt an zawng a;#Mt. 12:38. 23Keini erawh chuan Krista khenbeh thu kan hril a ni, chu chu Juda-te tân chuan dâltu a ni a, Jentail-te tân thil âtthlâk a ni.#Gal. 5:11. 24Nimahsela, Juda pawh ni se, Grik pawh ni se, kohte tân chuan Krista chu Pathian finna leh thiltihtheihna a ni. 25Pathian âtna chu mihring finna aiin a fing zâwk a, a chak lohna pawh mihring chakna aiin a chak zâwk si a.

26Unaute u, a koh dân che u hi ngaihtuah teh u, in zînga tam tak hi tisa lama mi fing in ni lo va, mi thiltithei tak pawh in ni lo va, mi ropui chhûng zînga mi pawh in ni hek lo. 27Nimahsela, Pathian chuan khawvêl mite ngaiha thil âte chu mi fingte tihmualpho nân a thlang a, khawvêla thil chak lote chu thil chakte tihmualpho nân a thlang bawk a; #Jak. 2:5. 28tin, thil awm sate paihthlâk nân khawvêl thil mâwl leh hmusitawmte, thil awm lote#1:28 Mss ṭhenkhatah, ‘thil awm lote,’ tih hi a tel lo. nên lam Pathianin a thlang a. 29Chuvângin, Pathian hmaah chuan tu mah inchhuang thei an awm lo vang. 30Nangni zawng, Pathian zârah, Krista Isuaah chuan in awm ta a; ani chu Pathian hnên ata kan tân finna te, thiam chantîrna te, tihthianghlimna te leh tlanna te a lo ni ta a; 31tichuan, an ziak angin, “Chhuan tûr duh chuan Lalpa chu chhuang rawh se.” #Jer. 9:24; 2 Kor. 10:17.

Currently Selected:

1 KORINTH 1: MIZCLBSI

Highlight

Copy