MAAK 12

Vomrip birna Ynghuwnii

(Met 21.33-46; Luk 20.9-19)

1Aanuwnache Jesu ing eningna ynghuwnii ing thamin itong abasenpa, “Mee yngkheh ing vomrip bir yngkheh tuka, aruvaechaap manghirka, asuurnii yngkhehkho khurka, ama-nache arungnii een yngkheh atu. Amachu vomrip bir aarung ae ningna mansirka atak chuve paam yngkheh ting sisa. 2Aphachu hungvika, ama ing vomrip aanlachu topoh iphanii khaena ameenae yngkheh aarung ae ningting ajechiir. 3Enuw ing ama meechu ruw aeka embin vokhehkho yntanga piru ing embathen. 4Athar vokheh vomrip bir aafhuw ing ameenae reentaang yngkheh eningna ajechiirtah nache enuw ing ama meechu arusae bakhii aeka vokhehkho ningjak piaeka embathen. 5Amana aafhuw ing mee reentaang yngkheh ajechiirtah nareehche enuw ing enthehpa; mee reentaang aanem ae chuve bin aeka amanche mee topoh ae chuve enthehpa. 6Aafhuw ing mee yngkheh adeenjaeh sareeh, amachuve aning amansiihpak asapa chuva, ‘Enuw ing kasapa ichuve iruwpak ing hetuvaatae taka akuurchiimniina ajechiir.’ 7Changvakonchu vomrip bir aarung ae ing enareer ing chong aeka enriir, ‘Havi ampa ruw kuumvachii chuva, huungruw atak i thehtaruw, amanache ama ing thungvachii chaap inuw thungvataruw.’ 8Chukhaenache enuw ing ruw aeka enthehpa, vokhehkho vomrip bir tanii enrenpa.”

9Atii vomrip bir aafhuw ing ynchii tuvaata? Ama ing thengnaka vomrip bir aarung aechu mamaang vaatae, amanche vomrip birchu mee reentaang ningting pivaata. 10Nenuw ing hava ynthiing thiimziih i nenpamahriva?

“Een itu aeng enrimah rung amakharap ingkhe,

athurfhuwrungchu ynsuwhsa;

11Havi Aafhuw ing atuva;

inuw vakhae mik enna chembe ingiknii pakna.”

12Amana enuw ing Jesu chu suwrnungka enchiipa, changvakonchu mee vakhae aechu enchii, akhaechuve Jesu ing thamin atongchu enuw engkhaenava ichii emanghuw tahnava; chutahnache enuw ing Jesu chu ma aeka yngkaesae.

Kesar ningna Ree Ipeeh

(Met 22.15-22; Luk 20.20-26)

13Jesu ing achonglae enuw ing isuwrnii khaena Pharisi mee aere Herot mee ae yngkheh ynnii enjechiirpa. 14Enuw ing vak aeka Jesu ningna enriir, “Oja, nangve ichumvachii amanche achuwkho chiimahchii ichii kemanghuwsa, akhaechuve nangve miksiing mikruung khaemahchii, changvakonchu Thangnang lamchu ichum ing namanchuwsa. Kesar Rom iruwng ningting ree ipeeh aruse rumah?”

15Kenuw ing piva kenchiiva chang-mahka pimahva kenchiiva? Enuw ing isachaang entuchu Jesu ing amanghuw tahnache, eningna ariir, “Ynchii khaena kataklina yngennii vachuw? Seersaam yngkheh henchiruw enkata.”

16Enuw ing seersaam yngkhehchu enghenchipa. Amana Jesu ing ariir, “Havana ynjek i achuw rusae thoh yntinna? Enuw ing Kesar thoh yntinna ta aeka embasang.” 17Amana Jesu ing eningna ariir, “Kesar taava ichiichu Kesar ningting piruw amanche Thangnang taava ichiichu Thangnang ningting piruw.” Amana enuw ing Jesu ningnache inempak ngiksae.

Ihangring khaena Chong Ensii

(Met 22.23-33; Luk 20.27-40)

18 # Nong 23.8 Hangring omah enchii Saduki aeng Jesu ningna theng aeka chong ensii, 19“Oja, Mosi ing kengkhaena abaziih chuve achuw yngkheh eengkuw ynringhakna aupa ing siti deenru ing thiknaka arumeechu manave, anaepa ing naepang endeennii ing buwhreehva chiiva achiisa; 20eengkuw yngkhehna pasar sarii om ae, aupa ing rupanuw yngkheh abuwhpa, amanche siti deenru ing thiksa, 21avomaniinii ing amachu buwhka naepang deenru ing thikreehsa. Vokheh avomanthumnii ningna chenkho aanghakjaeh ing suwhsa, 22avosariinii ingkho siti deenru ing thiksa. Akuurchiimna rupanuw chukho thiksa. 23Atii hang-ring inii nache engkheng hangring ae nacha rupanuwchu achuw rumee ynsuwhva chiiva? Yngkhaena ynchii imbe engkheng ing rupanuwchu embuwhpa. 24Amana Jesu ing eningna ariir, ‘Nenuw ing ynthiing thiimziih vokhehkho Thangnang ruwreng nemanghuwmahchu nenraarmah vakhang?

25Enuw ing ithii tanii enghangring raenche, rakhii niichaechang tumahnii ae vokhehkho rakhii niimahnii ae; changvakonchu thangbaen nache vaarmee ae vaangche ongvaatae. 26Amanche ithii ae hangring khaena Mosi ing abaziih thiimbuwrna ynziihka omchu nenuw ing nenpamah riva, amachuve, Abraham, Isak, vokhehkho Jakop ae Thangnang chuping achiisa.’ 27Thangnang i ithii ae Thangnang mahva, changvakonchu iring ae khaenava; nenuw inempak nenraarsa.”

Aaruungseh Chonghak

(Met 22.34-40; Luk 10.25-28)

28Enuw ing chong hungsii vaansii entuchu thiimthang yngkheh ing siika vokhehkho Jesu ing isajaeh ing abasang aechu amutah nache aningna asii, “Chonghak kaarna ukho ingkhe amaensava?”

29Jesu ing abasang, “Amaensa chuve, ‘Rungaeruw, O Isrel ae, inuw Aafhuw Thangnang yngkheh pangvatah; 30amanche nang ing naafhuw Thangnang chu nabarungriir aangkheng vokhehkho nalaetha aangkheng amanche namanden aang-kheng ing naning mansiihva nachiiva.’ 31Avomaniinii chuve haviva, ‘Nang ing naveenchaang aechu nataksah vaang naning mansiihva nachiiva.’ Havi chungna aaruungseh reentaang chonghak omah.”

32Amana thiimthang inche Jesu ningna ariir, “Oja, nang chumnachii; Aafhuw yngkheh pangvatah tachiika ichum ing nariirpa, vokhehkho Aafhuw mahnaka achuwkho omah nachiipa. 33Amanche nabarungriir aangkheng, nalaetha aangkheng amanche namanden aangkheng ing Thangnang chu naning mansiihva nachiiva, vokhehkho naveenchaang aechu nataksah vaang naning mansiihva nachiiva. Thangnang ting ipifhuw vokhehkho chaatha ipifhuw reentaang aajaeh om chungna havana chonghak ynniimeh inge athurfhuwsehna.”

34 # Luk 10.25-28 Ama mee inche ising ing abasang-chu Jesu ing amutah nache, Jesu ing aningna ariir, “Thangnang lipah thoh nang yndah mahchii.” Aanuwnache Jesu ningna chong siivasii aechu achuw ingkho chehmahsae.

Devit sapa khaena Chong Ensii

(Met 22.41-46; Luk 20.41-44)

35Jesu ing rumniieenna amanchuw ae raenche ama ing ariir, “Khrista i Devit sapava ta-aeka thiimthang aeng ynsaangkhe ariirpae? 36Devit atakrap ing ynthiing laetha ing amanriirsa,

‘Aafhuw ing ki kaafhuw ningna ariir:

Ki ing nang yngensiimah aechu nakhi derna kasiihmahri ae raentaangche,

kabaen tachangne ongla.’

37Devit atakrap ing Aafhuw taka a-eensa, chunuwcha ynsaang khenche asapa vachiiva?” Amana mee inempak ing ariirchu rotha irohpak ing enrungae.

Thiimthang ae khaena Ynriimnii

(Met 23.1-36; Luk 20.45-47)

38Jesu ing amanchuw ae sungnache jinge chii ing ariir, “Rungop ynsuwr niiaeka ynlen engadik vokhehkho kithiirna mee ing ibariimnaka enchii, 39amanche meekongniina ongnii isaseh engadik, amanche kuurva chaapna iruung ongnii engadik, 40muwkhuwnuw ae engeen enruw ensiih vokhehkho achung paamphuwna iseehpak ing enthamsah thiimthang ae khaena ynriimruw. Enuw ing aaruungseh miraar phavaatae.”

Muwkhuwnuw ing Atha Seer

(Luk 21.1-4)

41Jesu ing seer thinnii maensokna ongka mee vakhae ing seer thinnii nache ynsaangkhe seer athasae taka aabuwr. Savang aanem ing seer inem entha. 42Amana muwkhuwnuw sarapak yngkheh vathengka seersaam yngkhepang athasah. 43Amana Jesu ing asebok aechu abuumting ve-eenka eningna ariir, “Ki ing neningna atatak ing kariirnah, havana muwkhuwnuw sarapak inge mee vakhae kaarna seer aanem athasa. 44Akhaechuve enuw vakhae ive endeen inuwzii ing ympahnii ing enthasa, changvakonchu muwkhuwnuw ive adeensahmah romrom ing ringniivachii adeensah aangkheng athapa.”

Currently Selected:

MAAK 12: MOYO

Highlight

Copy