MAAK 11

Aacheh ing Jerusalem Ivaruwh

(Met 21.1-11; Luk 19.28-40; Jhn 12.12-19)

1Enuw ing Jerusalem envepha phana, Oleep Bungna om Bet-phage vokhehkho Bethani nache Jesu ing asebok meenii ae ningna jinge taka achiir ae, 2“Nenuw nemaana khuw yngkheh omnase vakruw amana nenvaruwh chakthoh, achuw ingkho aongniimahri lola ati yngkheh hengangkhiih muvanenta; amachu bajoh nuwna henruwruw.” 3Achuw yngkheh ing neningna, havi ynchii khaena nenruwva ta ae nave, “Aafhuw ing ithupak nong khaena sichinnii ningka jebathen vakata achiinah taruw.”

4Enuw ing vak aeka, lam kuurna om een yngkhehna lola ati yngkheh ynphuwpchu muaeka embajohpa. 5Amana ihengiir mee aenche eningna ensii, “Nenuw ing lola ati nenbajoh kha ynchii khaenava?”

6Jesu ing eningna ariir vaangkhe embasang tahnache enuw ing enrupa. 7Amana lola atichu enuw ing Jesu ningting henruw aeka, ataklina peen tha aeka amana Jesu ing lola taklinache hangongsa. 8Amana mee aanem ing lamna enpeen hentha aeka vokhehkho mee areh aenche ruwrae tanii thingbah ana saeh aeka lamna entha. 9Changlae Jesu amaana hesi vokhehkho aanuw ahenjii aeng jinge uung ae, “Hosana, Aafhuw rumingna itheng atak i bor aphava! Aang-kaangsehna, Hosana! 10Aafhuw rumingna inuw vakhae apa Devit Iruwng lipah ijuwngchu Thangnang ing isa bor apeeh ynsuwhrasiing, aangkhengsehna Hosana.”

11Amana Jesu ing Jerusalem ting varuwhka rumniieen sungting varuwhsa; vokhehkho ama ing akuur-paang aangkheng aabuwr nuwna, apha ajungthirtah nache, suum ariinii ae thoh ynruw ing Bethani ting huungsae.

Jesu ing Thachang bur Siraap Apeeh

(Met 21.18-19)

12Enuw ing atuknuwche Bethani tanii ing enghungsi raenche, Jesu aven chaamsa. 13Ama ing thachang bur ana ompoh yngkhehchu laarkhehna ajemutah nache laanglam ynla vatamo taka ava en. Changvakonchu ama ing avephatah nache ana mahnaka yntanga mumahsa, akhaechuve tha-chang ynlavachii aanii tha phamahrisa. 14Chutahnache Jesu ing thachang bur tingche ariir, “Achuw ingkho athar vokheh naanla isah phamah rasiing.” Achongchu asebok aeng ensii.

Jerusalem Rumniieen Amanthiing

(Met 12.12-17; Luk 19.45-48; Jhn 20.13-22)

15Enuw ing Jerusalem hungtung aeka, amana rumniieen sungtingche Jesu varuwhka peehchae aajuwr vokhehkho aanrii mee aechu ithur abasenpa, seersaam repniii vokheh-kho khunu aajuwr ae ongniichu abaruppehpa; 16amana achuw ingkho rumniieen sungna peehchae ireen, ichi chehmahsa. 17Amana mee aechu ama ing amanchuwpa: Havi ynziihka om vasahva, “Ka eenchu mee aangkheng khaena ithamsahnii een vachiiva changvakonchu nenuw ing lamruw ae kuw nemanguurpa.”

18Amana aanchung jaethiim aere thiimthang aenche ensiitahna Jesu havi ynsaangkhe manta manuwka thehtaruw ichii emanjong, akhaechuve enuw ing Jesu chu enchii, vokhehkho ama ing amanchuw ae nache mee aangkheng ngiksa. 19Khuri ajungvitah nache enuw ing khuwruungchu embathenpa.

Thachang bur Ichong

(Met 21.20-22)

20Enuw ing ziing nache enghung-sirae thachang burchu arajung ipha ing ichong emupa. 21Chutahnache Pitar ing Jesu chong ynsiika Jesu ningna ariir, “Aafhuw, enla, nang ing thachang bur taklina siraap napeehtah nache thachang burkha chongsa.”

22Jesu ing aningna abasang, “Thangnang chu thacharuw.” 23#Met 17.20; 1 Kor 13.2Ki ing neningna atatak ing kariirnah, “Achuw yngkheh ing havana bung tingnge ymphernana chifhuw ting bukra tanaka abarungriirna ching-niiru ing suwhrem vaata ichii ing thacha nave, athacha inuwzii ing suwhvaata. 24Chukhaenache neningna kariirnah, nenuw ing nemandenchu phakenta tatanuwka niih tanuwve phavanenta. 25#Met 6.14,15Amanche nenuw ing nenthamsah raenche thangbaenna ong nenpa inche isii ikha nenraar omchu yngkuhpeehnii ing, achuw yngkheh taklina nenungaeniimah omnave kuhpeehruw. 26Nenuw ing kuhpeehmah tanuwve, thangbaenna ong nenpa ingkho isii ikha nentuchu ikuhpeeh mahnii.”

Jesu Aatuaricheh khaena Chong Ensii

(Met 21.23-27; Luk 20.1-8)

27Enuw ing athar vokheh Jerusalem ting vathengsae. Amana Jesu ing rumniieen sungna hungsi vaasi aturae, aanchung jaethiim ae, thiimthang ae vokhehkho upa aenche Jesu ningting vak aeka 28aningna ensii, “Ynchii aatuaricheh ing havana nong vakhae i natuva, vokhehkho achuw ing aatuaricheh ipika havana nong vakhae i natuva?”

29Jesu ing eningna ariir, “Ki ingkho neningna chong yngkheh siikachuw abasangruw amanache ki ing ynchii aatuaricheh pha ingka havana nong vakhae i katuva ichiichu riirpehva kata. 30Johon ing baptais atukha thangbaen taniiva changmahka mee ae taniiva?”

31Amana enuw ing enareerna chong ynsiisae, “Thangbaen taniiva tamanuwve ama ing ynchii khaena Johon chu nenthacha mahva itavaata? 32Vokhehkho mee ae taniiva tata enchiireeh incha, enuw ing mee vakhaechu enchii pareeh, akhaechuve mee aangkheng ing Johon chu jaephar remva ichii ing enthacha.” 33Chu-tahnache enuw ing Jesu ningna embasang, “Kenuw manghuwmah ung.” Jesu ing eningna ariir, “Ki ingkho utanii aatuaricheh pha ingka hava nong vakhae i katuva ichiichu neningna riirmahning.”

Currently Selected:

MAAK 11: MOYO

Highlight

Copy