LUK 3

Baptis Johon Nong Ahenbasen

(Met 3.1-12; Mk 1.1-8; Jhn 1.19-28)

1Tiberius Kesar ing hungpaar kumsuum ariirunga ahenpha raenche, Pontius Pilaat ing Judia paamna lipah aapuh ing ong, amanche Herot ing Galili na iruwng vika lipah apuh, vokhehkho anaepa Philip ing Ituria re Trakonitis paam iruwng ivi, Lisanias ing Abileni ae iruwng vika ipaar, 2amanche Annas re Kaiphas ae ing aanchung jaethiim ivi ae. Apha changlaenche paamfhuw nache Sakharia asapa Johon ningna Thangnang ynthiing chongchu thengsa; 3ama ing isii tanii ikarnii khaena, vokhehkho barungriir huungnii khaena baptais turuw ichii chongchu Jordan chifhuw kuurna ong mee chaap nache atongpa. 4Jaephar Isaia thiimbuwr na ynziih vasah omna:

“Paamfhuw nache iruur yngkheh ing uungka ariirnah:

Nenuw ing Aafhuw khaena lamchu seemruw,

ama asinii khaenache lamchu manchiimruw.

5Iphae chaapchu vemansip vaata,

Lamthing bung, isiing, iruung chaap vakhae manphae vaata,

vokhehkho lam yngkuwr chaap vakhae manchiim vaata,

amanche ynchung iphae lam chaap vakhae korpeh vaata;

6vokhehkho mee vakhae inche Thangnang manlaenpeehchu muvaatae.”

7 # Met 12.34; 23.33 Johon aningna baptais itunii khaena mee inempak itheng ae ningnache ama ing ariir, “Baruwr tuti ae! Achuw ing barung siknii thengvachii tanii taenruw taka ynriirpeehva? 8#Jhn 8.33Nenuw ithar barungriir nenreennii ing turuw, kenuw Abraham kendeensa tanuwna nenbarungriir sungna mandenjaeh mahruw; akhaechuve Thangnang ing rung inempak vaange Abraham siti ahenbasuw chehsa. 9#Met 7.19Ataraen rapkho thing vakhae rajungna rii ynlorka omna; chukhaenache aanla isamah thing chaapchu ynfhuwr naka mi sungting ynrenvaata.”

10Mee aenche aningna ensii, “Changvaniive kenuw ing ynchii tuva kenchiiva?”

11Ama ing eningna abasang, “Rungop asae ynniimeh adeen inche adeen sahmah ae ningnache yngkheh pirasiing; amanche thaemin adeen inche adeenmah aechu pirasiing.”

12 # Luk 7.29 Ree akhuum mee topoh aenche aningting baptais itunii khaena vak aeka riir, “Oja, kenuw ing ynchii tuva kenchiiva?”

13Amana eningna ariir, “Iripham isuwhchak nakhe manthimahruw.”

14Laarchang mee aenchenkho aningna ensiipa, “Kenuw incha ynchii tuva kenchiiva? Ama ing eningna abasang, nenuw achuw yngkheh peehchae tikho siihnuwna rimahruw, achuw ningnakho ichummah miraar pimahruw, amanche nenruthamen nenpha nakhe pensaruw.”

15Mee aenche en aeka enriir, havi Johon va changmahka Khrista chupentah ta aeka mee vakhae ing embarungriir sungna emandenrae, 16Johon ing eningna abasang, “Ki ing nenuwchu chii thoh baptais kaman-tunahchuw; changvakonchu kachungna athiseh ing ipirsehchu jungthengna, ama akheerkhaang aruwnoh rapkho ynjoh matik chasamah ing; ama ing nenuwchu ynthiing laetha re mi thohche baptais imantuvaata. 17Ama ing aruwvuw minchu isa ing manthiingpeh naka saangchu aatomting athinnii ing sisah akiklina omna; changvakonchu arasii chaap chuve ithiimahdeh mi sungtingche bathuvaata.”

18Chukhaenache jinge ichii ing mee ae ningnache emanghuwnii khaena isa chongchu amanchuwpeeh ae. 19#Met 14.3,4; Mk 6.17,18Changvakonchu Herot iruwng ing anaepa rumee Herodias taklina isamah nong atuchaap khaena Johon ing aachah ae nache aanvae tahnache, 20Herot ing Johon taklina abarung sikka kaeshum nache akhumpa.

Jesu ing Baptais Atu

(Met 3.13-17; Mk 1.9-11)

21Atii mee vakhae ing baptais enturaenche Jesu ingkho baptais tuka athamsahrae thangbaen ymmongsa, 22#Met 3.17; Mk 1.11; Luk 9.35amanche ynthiing laetha inche khunu vaang ataklina jungchuksa, vokhehkho thangbaen tanii iruur yngkheh thengsa, “Nang i kaning namansiihpak kasapa vachii; naningna ki inempak pensakning.”

Jesu Ahungsuwhnii

(Met 1.1-17)

23Jesu ing anong ahenturae atak kum somthum vakhae ahenpha. Jesu i mee ae inchembe Heli sapa Josep sitiva ichii ing emanden, 24Heli inge Mathat sapava, Mathat inge Levi sapava, Levi inge Melki sapava, Melki inge Janna sapava, Janna inge Josep sapava, 25Josep inge Matathia sapava, Matathia inge Amos sapava, Amos inge Nahum sapava, Nahum inge Esli sapava, Esli inge Nagai sapava, 26Nagai inge Mat sapava, Mat inge Matathias sapava, Mathias inge semein sapava, semein inge Josep sapava, Josep inge Juda sapava, 27Juda inge Juanan sapava, Juanan inge Resa sapava, Resa inge Zarubabel sapava, Zarubabel inge Seltijer sapava, Seltijer inge Neri sapava, 28Neri inge Melki sapava, Melki inge Adi sapava, Adi inge Kosam sapava, Kosam inge Almadan sapava, Almadan inge Er sapava, 29r inge Joshua sapava, Joshua inge Elijar sapava, Elijar inge Jorim sapava, Jorim inge Mathat sapava, Mathat inge Levi sapava, 30Levi inge Simion sapava, Simion inge Juda sapava, Juda inge Josep sapava; Josep inge Jonam sapava, Jonam inge Alijakim sapava, 31Alijakim inge Maleja sapava, Maleja inge Menna sapava, Menna inge Matatha sapava, Matatha inge Nathan sapava, Nathan inge Devit sapava, 32Davit inge Jesse sapava, Jesse inge Obed sapava, Obed inge Boaz sapava, Boaz inge Salmon sapava, Salmon inge Nashon sapava, 33Nashon inge Aminadat sapava, Aminadar inge Arni sapava, Arni inge Hebron sapava, Hebron inge Peres sapava, Peres inge Jihuda sapava, 34Juda inge Jakop sapava, Jakop inge Ishak sapava, Ishak inge Abraham sapava, Abraham inge Terha sapava, Terha inge Nahor sapava, 35Nahor inge serug sapava, Serug inge Reju sapava, Reju inge Peleg sapava, Peleg inge Eber sapava, Eber-inge Shela sapava, 36Shela inge keinan Sapava, keinan inge Alpha sapava, Alpha Shem sapava, Shem inge Noah sapava, Noah inge Lemeks sapava, 37Lemeks inge Methushela sapava, Mathusela inge Enok sapava, Eanok inge Jaret sapava, Jaret inge Mahalaleel sapava, Mahalaleel inge kenan sapava, 38kenan inge Emos sapava, Amos inge Seth sapava, Seth inge Adam sapava, Adam inge Thangnang sapa chuva.

Currently Selected:

LUK 3: MOYO

Highlight

Copy