LUK 2

Jesu Jungom

1Hava apha sungne laaruw paam aphamsiirna mee masing iteennii khaena Agastas Kesar ing chonghak abathenpa. 2Changlae kuirinius ing Sairia aafhuw ynsuwhka apaanii raenche masing iteen ahaarpava. 3Chukhaenache mee vakhae ing akhuw akhuwting ruming ynziihnii khaena yngkaesae.

4Changlaenche Josep kho Galili na om Nazaret ichii khuwruung tanii Judia na om Devit khuwruung Bethlehem iphanii ing hungkaesa; akhaechuve atak i Devit tuti taniiva; 5chukhaenache juwr akhuw vasah aven rupumna nae areen Meri thoh-che ruming ynziihnii khaenache hungtungsae. 6Enuw ing amana engongraenche naepang jungomvachii aaniichu ahenphapa.

Jaocheer aere Vaarmee ae

7Amanche sanuw inche ahaarpa asapa yngkhehchu abaringpa vokheh-kho naepangchu peen ing iromka khutheeng nache amanjaarpa, akhaechuve eensungna entungnii apham omahsa.

8Changlae ama paam nache jao icheer aechu enjao cheer aeka Jaenna iriih ae. 9Amana Aafhuw vaarmee yngkheh ing eningnache yndangsa, vokhehkho Aafhuw alaar isa inche entaklina aenka, enuw inempak ynchiksae. 10Changlaenche vaarmee ing eningna ariir, “Nenuw ynchik mahruw! akhaechuve enruw, mee aangkheng khaena inempak rotharohnii isa chong ki ing neningna kajenreensa; 11atanii iniine Devit khuwruung nache nenuw eekarpeeh Aafhuw chu jungomsa, atak i Khrista Aafhuw chuva! 12Chukhaenache nenuw ing nemanghuwnii khaena aandangnii chuve, nenuw ing naepangchu peen ing ynrom naka khutheeng nache ijaarchu tuwhva nenta.”

13Aphanache thangbaen tanii vaarmee aruwr aenche yndang aeka Thangnang chu la ing emanpah:

14“Thangnang chu yngkaangseh ing manpahtaruw vokhehkho laaruw paamna aning amanthung mee ae ningnache idae omchu ynsuwhrasiing!”

15Vaarmee aeng thangbaen ting engangri aanuwnache, jao icheer aenche yngkheh yngkheh ynriirsae, “Inuw vakhae ing Bethlehem ipha ing simanuwka Aafhuw ing ariir chongchu va-entaruw.”

16Chukhaenache enuw ing ynneh-pak ing vasiaeka, enuw ing Meri re Josep chu envatuwhpa vokhehkho naeduungchu khutheeng nache emanjaarchu emupa. 17Enuw ing emutah nache eningna ariir chong-chu engaansiipa; 18vokhehkho jao icheer aeng enriir chongchu mee vakhaeng ensiitah nache enruwriimsa. 19Changvakonchu Meri ing abarungriirna mandenka havana isuwh khaene abarungriir sungna athinjaehpa. 20Jao icheer aenche eningna ariirchu ensiipa vokhehkho emu khaenache enuw ing Thangnang chu la ing manpah aeka ynrisae.

Jesu Ruming Iphuw

21 # Luk 1.31 Amanche inii neeriih ahungvi inuwnache vinchiip nong tuaeka ajae ven rupumna venchimah rirae vaarmee ing naepang ruming i Jesu tava nenchiiva taka ariirchu emanreenpa.

Jesu Rumniieen ting Enruw

22Mosi vajeer chonghak inuwzii ing engkhaena ynthiingnii iniichu ahenphapa. Chukhaenache enuw ing naepang chu Aafhuw ningting ipeehnii khaena enruwpa. 23Aafhuw vajeer chonghak inuwzii ing, “Ahaarpa abaring sapa vakhaechu Aafhuw ningting pivachiipae, 24vokhehkho Aafhuw vajeer chonghak inuwzii ing vathuw ruwbuwkheh, changmahka khunu iduung ruwbuwkhehchu chaatha ing ipeehnii khaena vaksae.”

25Changlaenche aruming Simion ichii mee yngkheh Jerusalem nache ong, ama mee inge Isrel mee ae barung ngamnii emphamahri raen-taang ichum ynthiing ing ahahsah vokhehkho Thangnang chu icheepjaeh ing amanden ama ataklinache laetha ynthiing ing hesip. 26Chukhaenache laetha ynthiing ing aningna ajeer chuve, Thangnang sapa Khrista chu namumahri raentaang nang ithii mumahtanii. 27Chutahnache laetha ynthiing ing ongniika rumniieen tingche varuwhsa amanche ama ing vajeer chonghak inuwzii ing naepang khaene nong itupeehnii khaena ampa re amnuw inche naepang Jesu chu aningting envepeehpa, 28ama ing naepangchu vedomka Thangnang chu manpahka ariir:

29“Aafhuw nang ing najeer chongreep inuwzii ing,

atiive Aafhuw nang ing idaejaeh ing ymbathenpachii,

30mee vakhae kaarnache nang ing thoraang yntupeehchii

31manlaenpeeh phaniichu kamikrap ing kamusahpa,

32reentaang mee ae ningnache irengchu amandangnii khaena Isrel namee ae nache nalaar isachu najenreenpa.”

33Havi khaene naeduung ampa re amnuw aenche ama chongchu ensiitahna inempak enruwriimsa; 34Simion inche enuwchu bor piaeka Aafhuw amnuw Meri ningnache ariir, “Enla, naepang havi Isrel sungna maangnii vachii vokhehkho mee aanem karnii khaena Thangnang ing aateerva. Atak i mee ae ing enrumah buwtinnii Thangnang taniichu ynsuwh vaata; 35amanche embarungriir sungtaniichu mandang vaata. Amana nabarungriirna ijachaam laangchem yngeepak ing ynsinvaang tavaata.”

36Aser sungkhur tanii phanuel ichii sanuw aruming Anna ichii jaepharnuw om; (ama afhuwsar thohche kum sarii pang paarhak aeka 37aanuwnache kum sommiriih arii manrii ipha ing muwkhuwnuw ing ong.) Ama ing siim jaen maaru atongthoh ynruw ing thamsaka rumniieenchu bathen samah. 38Aphanache Jerusalem ting hangka Thangnang chu amanpah vokhehkho eekarpeeh Aafhuw khaenache ahah ae Jerusalem na ong mee ae ningnache inempak ichong.

39 # Met 2.23 Enuw ing Thangnang chonghak inuwzii ing nongruw vakhaechu manchichir aeka engongnii Galili khuwruung Nazaret tingche yng-kaesae. 40Naepang Jesu chu hungruungka vokhehkho inempak hungpirsa, iveerkho hungveersa; amanche Thangnang tungsiih ajaarchu ataklinache omsa.

Jesu Anaepanglaennii

41Atii ampa amnuw aenche kum kumna manlaennii kuurva entuchaknii Jerusalem tingche isichak ae. 42Jesu inche kum suum ariinii ahenpha-raenche enuw ing isichak ae vaangkhe kuurva aanvaenii khaenache vasisae; 43kuurvachu achinuw tingche enuw ing enghunganri tahnache, naepang inche Jerusalem nache ongsa. Amachu ampa re amnuw inche manghuwmahsae. 44Enuw ing emanden chuve naepang havi aarang ae kaarna ynvae varom ta aeka inii nikheh entheh lam sisae, changlaenche enuw ing ensung-khur engaanghuwfhuw ae kaarna ynvaenamo ta aeka enjongtah nache tuwhmahsae; 45chukhaenache enuw ing Jerusalem ipha ing siaeka envajongpa. 46Amanche Jesu chu inii nithum aanuwting rumniieen nache Jehudi ae aanchuw mee ae kaarna ongka enchong arungae, vokhehkho eningna chong hungsii vesiika ong ing entuwhpa. 47Ama ing ising iveerpak ing abasang chongchu asii vakhae mee aenche ngiksae. 48Ampa re amnuw aenche atakchu emutah nache inempak ngik aeka amana amnuw inche aningna ariir, “Kasiti, nang ing kenuwchu jinge manchiichii i yngkhaenava? Enla, nangpa thoh kenuw ing kenvajong vachii.”

49Amana Jesu ing eningna ariir, “Nenuw ing kichu ynchii khaena ynjong vachuw? Ki kapa eennache ongva kachiiva ichii nenuw nemanghuw mahva?” 50Ama ing eningna ariir chongchu enuw ing manghuwchehmah ae.

51Amana enuw thohche Nazaret tingche yngkae aeka amanche en-chongriir dernache ongsa; hava vakhae i amnuw inchembe abarungriir sungna icheep ing athinjaehpa. 52Jesu inche losing nakho, hakchaang nakho, Thangnang vokhehkho mee ae ajaarnache hungruung sehsehsa.

Currently Selected:

LUK 2: MOYO

Highlight

Copy