Maaku 13

Jesu wa fɔ idei kpasɛ̃i Ilaaɔ̃ ku lɛgɛ

(Cɔ Matie 24:1-2; Luku 21:5-6)

1Ŋɔi Jesu wa fita wa hai bantumai kpasɛ̃i Ilaaɔ̃ nɔ mɔcɔ akãɛ gɔ í ni, Mɛɛtu, cɔ bɛi kpasɛ̃i Ilaaɔ̃u ihɛ̃ í la nɔ à maa do kuta kusĩa ŋa. 2Ŋɔi Jesu í ni, ì waa yɛ ile nla ŋau ihɛ̃? Kuta baa akã kaa na ku maa lesi njɛ bɛ má, aa kɛkɛɛ mbɛ fei.

Wahala iyi á naa si waatii ankãanyi

(Cɔ Matie 24:3-14; Luku 21:7-19)

3Ŋɔi Jesu í koo í buba si geetei Olivieu wa cɔ ikpa kpasɛ̃i Ilaaɔ̃. Ŋɔi Piɛɛ do Zaaki do Zãa do Anderee à wa bi Jesu aŋa nŋa. Ŋɔi à beeɛ à ni, 4sɔ̃ wa waati iyi mii nɔu bɛ á ce. Nyinda yoomai aa ka yɛ ka ba ka mà iyi waatiu í to.

5Ŋɔi Jesu í jɛ nŋa í ni, i ce laakai ŋa inɛ gɔ ku maà na ku dĩ iju nŋɛ, 6domi inɛ ŋa iyi aa na a maa naa akã akã a maa ni aŋai à jɛ inɛ iyi Ilaaɔ̃ í cicau aa kpɔ. Aa dĩ ijui inɛ nkpɔ. 7Bii ì gbɔ ibai igũ amɛɛ amɛɛ ŋa do baaui igũ ŋa hee jĩijĩ i maà jɔ̀ idɔ nŋɛ ku dede, domi í gbe mii ŋau bɛ fei ku cei. Amma kù nɔ kù jɛ iri ku kpai andunyau bɛ titã. 8Dimi gɔ ŋa aa ya na a maa ja do dimi mmu ŋa, nɔ ilaalu gɔ ŋa mɔ aa maa ja do ilaalu mmu ŋa. Nɔ ilɛ á yaya si ilu gɔ ŋa, nɔ ari á ce. Nŋu bɛ á yɛi bɛi ara kuro sintei bãasĩ ku bɛi ku bí.

9Amma iŋɛ taka nŋɛ i ce laakai. Aa na a mu ŋɛ a koo a na woo kiiti ŋa, nɔ a tɛ nŋɛ kpɔtɔɔ ile bi kutɔtɔɔ ŋa. Nɔ aa bɔò ŋɛ bi ilaalu ŋa do bi ilu ilɛ ŋa na irim ku ba i jɛ nŋa sɛɛda ŋa. 10Amma í gbe a waazoa inɛ ŋa laabaau jiidai Ilaaɔ̃ si dimi fei titã waatii iri ku kpau ku bɛi ku to wa. 11Waati iyi à mu ŋɛ à waa bɔ ku na woo ce kiiti ŋau, i maà ti i biti do ide iyi aa fɔ ŋa, amma bii awaatiu í to i fɔ ide iyi í naa nŋɛ si idɔ. Nɔ ide ŋa iyi aa fɔ ŋa kaa jɛ ide nŋɛ, Hundei Ilaaɔ̃i á fɔɔ. 12Inɛ gɔ ŋa aa zamba ifɔ nŋa ŋa walakɔ igbã nŋa ŋa ku ba a kpa ŋa. Bɛɛbɛ mɔi baa ŋa aa maa cea ama nŋa ŋa. Amu ŋa mɔ aa dede si baa nŋa ŋa ku ba a kpa ŋa. 13Inɛ fei á cé ŋɛi na irim. Amma inɛ iyi í temua hee kɔɔ á ba faaba.

Faajii ide laalɔ iyi í ya bɛjɛ mii ŋa

(Cɔ Matie 24:15-28; Luku 21:20-24)

14Nɔ Jesu í ni má, aa yɛ mii laalɔ iyi wa bɛjɛ mii ŋa tengi bii kù jɔ ku wa ŋa.#13:14 Cɔ Daniɛli 9:27. Inɛ iyi wa cio idei mii laalɔu ku ce laakai ku gbɔɔ sãa sãa. Waati bɛɛbɛ inɛ ŋa iyi à wa ilɛi Zudee a sa a bɔ iri kuta ŋau. 15Nɔ inɛ iyi í wa antaii ile sikifa, bii í kita ilɛ ku ba ku sa ku maà bɔ ngɔgɔ ku so inɔ ileɛ. 16Nɔ inɛ mɔ iyi í wa iko ku maà nyi kpasɛ̃ koo so kumbooɛ má. 17Waati bɛɛbɛ wahalai bãasĩ ŋa do ayawo ŋa á caa. 18I ce kutɔɔ ŋa ku ba ide sãmiu bɛ ku maà jɛ si sukui tũtũ. 19Ntɔ ntɔ, ajɔ nŋu wahala nla nlai á naa iyi a kù yɛ dimiɛ hai sinte waati iyi Ilaaɔ̃ í taka andunya hee ku baa nsɛi. Nɔ a kaa ka yɛ dimiɛ má hee do ajɔ fei. 20Nɔ bii Aɔ̃ Lafɛ̃ɛ kù jilɛ si nŋu ku kaye kukpɔi ajɔu wo inɛ gɔ kaa wɛɛ má. Amma í kayeɛ na irii inɛ ŋa iyi í cicau.

21Waati bɛɛbɛ bii inɛ gɔ í sɔ̃ ŋɛ í ni, i cɔ, inɛ iyi Ilaaɔ̃ í cicau í wa ihɛ̃, walakɔ inɛ mmu gɔ ku ni í wa ihɔ̃, i maà dasi lafɛ̃ɛ naanɛ ŋa. 22Inɛ gɔ ŋa aa na a naa akã akã a maa ni aŋai à jɛ inɛ iyi Ilaaɔ̃ í cicau walakɔ a ni aŋai à jɛ walii ŋa amma iboi. Aa maa ce dobu dobu do maamaake ŋa ku ba a dĩ hee do ijui inɛ ŋa iyi Ilaaɔ̃ í cicau bii aa yɔkɔ. 23To, iŋɛ, i maa ce laakai ŋa. Na ŋɔi í ce ǹ wa n sɔ̃ ŋɛ fei ndɛɛ do njuma.

Kubaai Amai Amanɛ*

(Cɔ Matie 24:29-31; Luku 21:25-28)

24Amma si ajɔ nŋu si anyii wahalau, inunu á kuku inya, cukpa mɔ kaa má inya má, 25leleaɔ̃ ŋa aa cuku wa hai lele, nɔ gbugbãi lele ŋa a yaya. 26Waati bɛɛbɛ inɛ ŋa aa yɛ amu Amai Amanɛ, ǹ wa n naa si kudũi ijĩ do gbugbã nla nla gɔ do amboe. 27Si anyii nŋu, an bɛ amaleka ŋa wa si andunya gonta mɛɛu. Aŋai aa bɔ bii fei a tɔtɔɔ inɛ ŋa iyi ǹ cicau. Aa tɔtɔɔ ŋa si andunyau fei.

Mii iyi jĩi ndii figi wa kɔ inɛ ŋa si

(Cɔ Matie 24:32-35; Luku 21:29-33)

28Jesu í ni, i cɔ mii iyi jĩi ndii figi wa kɔ ŋɛ si ŋa. Bii ì na ì yɛ amaawɔɛ ŋa à sinti ku wu wua kpɔtɔɔ ì ya mà ŋa iyi atɛ í maai wa mbɛ. 29Bɛɛbɛ mɔi, bii ì yɛ mii ŋau bɛ fei wa ce, i mà ŋa iyi kubaai amu Amai Amanɛ kaa kpɛ má, ajɔu í maai wa mɔm. 30Ntɔ ntɔ, ǹ wa n sɔ̃ ŋɛi, kù jɛ inɛi nsɛi ŋa feii aa ku ideu ku bɛi ku ce. 31Lele do ilɛ fei á na ku tã, amma idem ŋa kaa tã pai.

Ilaaɔ̃ nŋu akãi í mà ajɔu

(Cɔ Matie 24:36-44)

32Jesu í sɔ̃ ŋa má í ni, inɛ kãma kù mà waatiu hee má jɛ ajɔ iyi mii ŋau aa ce, baa amaleka ŋa iyi à wa lele, baa amu Amau, í gbe Ilaaɔ̃ Baaba nŋu akã. 33I ce laakai ŋa, nɔ i ya maa cɔ kpãa ŋa, si na iyi í jɔ̀ i kù mà waati iyi ajɔu á to wa ŋa. 34Á yɛi bɛi inɛ iyi wa bɔ ilu nɔ í jɔ̀a woo ce icɛɛ ŋa kpasɛ̃ɛ í na inɛ fei icɛɛ, nɔ í sɔ̃ woo degbe andɛ koofau ku maa cɔ kpasɛ̃u. 35Si na iyi í jɔ̀ i kù mà ŋa mà alɛi ilu kpasɛ̃u á na ku to wa walakɔ idũ laja, walakɔ waatii kukɔi ajɛɛ, walakɔ daadaakɔ, na nŋu, i máa cɔ kpãa ŋa, 36ku ba ku maà naa ku ba ŋɛ ì waa sĩ njoo ŋa, nɔ ku maà naa ku boe ŋɛ. 37Ide iyi ǹ wa n sɔ̃ ŋɛu ihɛ̃, nŋu mɔi ǹ wa n sɔ̃ inɛ fei. I máa cɔ kpãa ŋa.

Currently Selected:

Maaku 13: MKL

Highlight

Copy