Maaku 12

Mɔndai gaanɔɔma laalɔ ŋa

(Cɔ Matie 21:33-46; Luku 20:9-19)

1Si anyii nŋu, Jesu í lɔsi ku sɔ̃ ŋa ide do mɔnda. Í ni, inɛ gɔ í ce ikoɛ, í lɔ si jĩi ndii rezɛ̃ɛ ŋa nɔ í ce kaa í kaakoɛò. Nɔ í ce bi ku fɔ̃ inyii isoɛ. Nɔ í cã tafa bi ku degbe ikou. Ŋɔi í so gaanɔɔma ŋa í dasi ŋa si ikou a maa logooɛ, í bɛi í bɔ ilu koo kpɛ bɛ. 2Waati iyi jĩi ŋau à so à to ku ka ŋɔi í bɛ woo ce icɛ gɔ bi gaanɔɔma ŋau koo gba iyi í jɛ ti nŋu wa. 3Ŋɔi à muu à cãa nɔ à leleɛ í nɛ awɔ ngbɛ. 4Nɔ ilu ikou í bɛ woo ce icɛ mmu má bi tu ŋa. Ŋɔi à bu nŋu mɔ nɔ à cãa si iriɛ. 5Nɔ í bɛ amanɛ mɛɛtasia nɔ à cãa à kpaa. Bɛɛbɛi à cea inɛ nkpɔ má. À cã inɛ gɔ ŋa nɔ à kpa inɛ gɔ ŋa mɔ. 6Nsɛi í gbe amaabíi ilu ilɛu iyi í bi jiida jiida. Nŋui í bɛ do ankãanyi í ni, aa jirima amam. 7Amma waati iyi amaɛu wa to, woo ce icɛ ŋau à fɔ aŋa duusɔ̃ɔ à waa ni, i cɔ inɛ iyi á na ku jɛ tubuu. Ka kpaa nɔ tubuu ku baa ku jɛ tu wa. 8Ŋɔi à muu à kpaa nɔ à soo à koo à nyɔɔ do alalai kaau.

9Ŋɔi Jesu í ni, to, bɛbɛi bɛirei ilu ikou takaɛ á ce nŋa. Á koo ku kpa ŋai nɔ ku dɛ inɛ mmu ŋa ku dasi ŋa ikou. 10To, i kù cio ideu ihɛ̃ si kukɔi idei Ilaaɔ̃ ŋa ba. Í ni,

kuta iyi woo ma ŋa à kɔ̀siu

nŋui í baa í jɛ kuta sintei icui ileu.

11Aɔ̃ Lafɛ̃ɛi í coo, nɔ í mu wa biti.#12:11 Cɔ Iri ku kɔ̃ 118:22-23.

12Iyi Jesu í fɔ bɛɛbɛ í tã ŋɔi inɛ ngboi Zuifu ŋau à waa dɛ Jesu ku mu, domi à mà na irii aŋai í kpa mɔndau. Amma si bɛi à waa ce njoi zamaau, ŋɔi í jɔ̀ à jɔ̀ɔ à nɛ.

Fiai lɛmpoo ku sã

(Cɔ Matie 22:15-22; Luku 20:20-26)

13Ŋɔi inɛ ngboi Zuifu ŋau à bɛ Farisi gɔ ŋa do inɛi Herodu gɔ ŋa bi Jesu a koo a lea taai ide. 14Iyi à to bi tɛɛ nɔ à sɔ̃ɔ à ni, Mɛɛtu, à mà iyi ì ya fɔ ntɔ. Bɛɛbɛ mɔi i kù waa ce njoi inɛ gɔ, domi i ci ya cɔ ijui amanɛ ŋa, amma ì waa kɔ inɛ ŋa si idei Ilaaɔ̃ do ntɔ. Í sĩa ka sãa ilaalu Sezaa fiai lɛmpoo? Mà ka maà sãa. 15Amma Jesu í mà muafiti nŋa, nɔ í ni, bɛirei í ce ì waa leem taai ide ŋa. I naam kpɛkɛlɛ akã wa n cɔ ŋa. 16Ŋɔi à naa akã wa. Nɔ Jesu í bee ŋa í ni, fotooi yooi í wa si kpɛkɛlɛu ihɛ̃ nɔ irii yooi à kɔ si. Ŋɔi à jɛaa à ni, ti Sezaai. 17Ŋɔi Jesu í sɔ̃ ŋa í ni, to, i sãa Sezaa iyi í jɛ tɛɛ ŋa. Nɔ i sãa Ilaaɔ̃ mɔ iyi í jɛ tɛɛ ŋa. Ŋɔi inɛ ŋa à biti ntɔ ntɔ do yaase bɛi í fɔò ide.

Idei kujĩi iku ŋa

(Cɔ Matie 22:23-33; Luku 20:27-40)

18Ŋɔi Sadusi gɔ ŋa à naa bi Jesu. Aŋai à ya maa ni iku ŋa a kaa jĩ. Iyi à to wa bi Jesu ŋɔi à beeɛ à ni, 19Mɛɛtu, tako wo Moizi í kɔ nwa í ni, bii inɛ gɔ í ku í jɔ̀ aboɛ, nɔ nŋu do aboɛu a kù nɛ ama, ifɔɛ ku so jaaɔ̃u ku ba ku bía igbãɛ ama.#12:19 Cɔ Wooda ku kɔsi 25:5. 20Wee inɛ mɛɛje gɔ ŋa à wɛɛ iyi à jɛ amai baa akã. Igbã nŋa í so abo nɔ í ku, nŋu do aboɛ a kù nɛ ama. 21Ŋɔi inɛ minjisiau í so jaaɔ̃u nɔ nŋu mɔ í ku, kù ba ama. Ŋɔi inɛ mɛɛtasiau mɔ í ce bɛɛbɛ má. 22Nɔ aŋa mɛɛje iyi à so abou fei à kú, baa inɛ akã nŋa kù ba ama. Si anyi nŋa, ŋɔi abou mɔ í na í ku. 23To, ajɔ iyi iku ŋa aa na a jĩ, aboi yoo nŋai á jɛ, si bɛi aŋa mɛɛjeu fei à soo aboi. 24Ŋɔi Jesu í jɛ nŋa í ni, ì waa rara ŋai si na iyi í jɔ̀ i kù mà gbugbãi Ilaaɔ̃ ŋa hee má jɛ mii iyi kukɔi ideɛ wa fɔ. 25Ntɔ ntɔ, si waati iyi iku ŋa aa na a jĩ, waati bɛɛbɛ inɛmɔkɔ do inaabo ŋa a kaa so njɛ má, amma aa yɛi bɛi amaleka ŋa. 26Iyi í jɛ ti idei kujĩi iku ŋa, Moizi í kɔ si tiaɛ tengi bii wa fɔ idei ama jĩi nɔu. Tengi bɛi Ilaaɔ̃ í sɔ̃ɔ ide gɔ. Í ni nŋu Aɔ̃ Lafɛ̃ɛi Aburahamui, do ti Izaaki, do ti Zakɔbu.#12:26 Cɔ Kufita 3:6. I kù cio ideu bɛ ŋa? 27Bii Ilaaɔ̃ í ni nŋu í jɛ Lafɛ̃ɛi inɛ gɔ ŋa iyi à kú, iyi bɛ wa nyisi iyi inɛ ŋau à wɛɛ baa bii à ku. Ntɔ ntɔ, Ilaaɔ̃ kù jɛ Lafɛ̃ɛi iku ŋa, Lafɛ̃ɛi inɛ ŋa iyi à wɛɛi. Debɛi i kù yɛ iyi ì wa si kurara nla nla ŋa?

Wooda* iyi í re

(Cɔ Matie 22:34-40; Luku 10:25-28)

28Ŋɔi inɛ akãi woo kɔ inɛ ŋa si wooda ŋau í gbɔ kakɔɔ iyi à waa ceu. Nɔ í yɛ iyi Jesu í jɛa Sadusi ŋau í ce ncɛɛ. Ŋɔi í bɔ bi Jesu í beeɛ í ni, si wooda ŋau fei, yoomai í re. 29Ŋɔi Jesu í jɛaa í ni, wooda iyi í reu wee. I de itĩ i gbɔ, iŋɛ inɛi Izirɛli ŋa. Ilaaɔ̃ Lafɛ̃ɛ nwa, nŋu akãi í jɛ Lafɛ̃ɛ. 30Bi Aɔ̃ Lafɛ̃ɛɛ do idɔɛ fei, do lasabuɛ fei, do gbugbãɛ fei.#12:30 Cɔ Wooda ku kɔsi 6:5. 31Minjisiau wee. Bi inɛ mmu ŋa bɛi ì bi araɛ.#12:31 Cɔ Kuwee 19:18. Wooda gɔ kù wɛɛ iyi í re bɛɛbɛ má. 32Ŋɔi woo kɔ inɛ ŋa si woodau í sɔ̃ Jesu í ni, í sĩa Mɛɛtu. Ide iyi ì fɔu ntɔi. Ilaaɔ̃ akãi í wɛɛ, nɔ Lafɛ̃ɛ gɔ kù wɛɛ má bii kù jɛ nŋu akãu. 33Amanɛ ku bi Ilaaɔ̃ do idɔɛ fei, do lasabuɛ fei, do gbugbãɛ fei, nɔ ku bi inɛ ŋa bɛi í bi araɛ, inɛ nŋu bɛi í sĩa í re kuwee iyi à ya jo si ina fei sãa sãa do kuwee ŋa iyi à gbe fei. 34Iyi Jesu í yɛ í jɛ do lasabu jiida, ŋɔi í sɔ̃ɔ í ni, í gbe keeke i jɛsi Ilaaɔ̃ ku jɛ ilaaluɛ.

Si anyii nŋu, inɛ kãma kù jɛ ku bee Jesu ide gɔ má.

Davidi* do inɛ iyi Ilaaɔ̃ í cica*

(Cɔ Matie 22:41-46; Luku 20:41-44)

35Si anyii nŋu, Jesu í wasi ku kɔa inɛ ŋa si cio inɔ bantumai kpasɛ̃i Ilaaɔ̃ nɔ í bee ŋa í ni, bɛirei í ce woo kɔ inɛ ŋa si wooda ŋau à ni inɛ iyi Ilaaɔ̃ í cicau tɔkui ilaalu Davidii. 36Davidi takaɛ í fɔ do gbugbãi Hundei Ilaaɔ̃ í ni,

Aɔ̃ Lafɛ̃ɛ í sɔ̃ Lafɛ̃ɛm í ni,

buba do ikpa awɔ njɛm ihɛ̃,

hee n ce mbɛɛɛ ŋa bi ku lesi isɛɛ.#12:36 Cɔ Iri ku kɔ̃ 110:1.

37Nɔ Jesu í ni má, to, bii Davidi takaɛ wa kpoo Lafɛ̃ɛ, bɛirei á ce ku jɛ tɔkuɛ má.

I mu ara nŋɛ do woo kɔ inɛ ŋa si wooda* ŋa

(Cɔ Matie 23:1-36; Luku 20:45-47)

Nɔ zamaa nkpɔ gɔ wa gbɔ idei Jesu do inɔ didɔ̃. 38Wa sɔ̃ ŋa si cioɛu wa ni, i mu ara nŋɛ do woo kɔ inɛ ŋa si wooda ŋau, aŋa iyi à ya bi a maa dabii do ibɔ jaba ŋau nɔ à bi inɛ ŋa a ya ce aŋa fɔɔ do jirima si bantuma. 39À ci ya bi kaa kitãi inɛ ngbo ŋa ile bi ku ce kutɔtɔɔ, do inya sinte bi ku ce jingau ŋa. 40À ya takii jaaɔ̃ ŋa a gba mii ndu ŋa ŋa fei, nɔ à ya maa ce kutɔɔ sisɔ ku ba a yɛ ŋa nŋu akã. Na ŋɔi í jɔ̀ ijuukpã nŋa á la ku caa.

Idei fia iyi abo jaaɔ̃ gɔ í dasi

(Cɔ Luku 21:1-4)

41Ŋɔi Jesu í koo í buba kɔkɔi kpakoi kɔlɛti wa cɔ bɛi inɛ ŋa à waa dasi fia. Ilu fia gɔ ŋa à dasi fia nkpɔ. 42Ŋɔi jaaɔ̃ ilu are gɔ mɔ í naa, ŋɔi í dasi kpɛkɛlɛ keeke minji gɔ ŋa iyi kù re baa dala. 43Ŋɔi Jesu í kpe mɔcɔɛ ŋau í sɔ̃ ŋa í ni, ntɔ ntɔ, jaaɔ̃ ilu areu í dasi fia si kpakoi kɔlɛtiu ihɛ̃ í re inɛ fei, 44domi aŋa fei, iyi í lesi antaii fia nŋa ŋai à dasi, amma abou baa do iyi í jɛ ilu are, í dasii andi iyi í nɛ fei, nkãma kù gbea iyi á maa wɛɛò má.

Currently Selected:

Maaku 12: MKL

Highlight

Copy