Luku 9

Jesu í bɛ mɔcɔ maateeji ŋau

(Cɔ Matie 10:5-15; Maaku 6:7-13)

1Jesu í kpe mɔcɔ maateejiɛ ŋau í tɔtɔɔ ŋa í mu nŋa gbugbã do yiiko a leleò inɛi inɔɔko ŋa fei nɔ a jɔ̀ bɔ̃ɔ ŋa a ba iri. 2Ŋɔi í bɛ ŋa a koo a waazo idei bommai Ilaaɔ̃ nɔ a jɔ̀ bɔ̃ɔ ŋa a ba iri. 3Nɔ í sɔ̃ ŋa í ni, i maà so nkãma si isɛɛnɛ nŋɛu, baa golo hee má jɛ bɔgɔ, walakɔ ijɛ, walakɔ fia, nɔ i maà so baa ibɔ minjisia ŋa. 4Kpasɛ̃ bii ì sɔ ŋa, i ya wa bɛ hee i koo i fita hai ilu bɛ ŋa. 5Ilu bii à kɔ̀ ku gba ŋɛ, i fita hai ilu bɛ ŋa nɔ i gbugbã nŋa ilùlùi baata nŋɛ ŋa ku jɛ nŋa sɛɛda iyi kiitii Ilaaɔ̃ á naa si ŋa. 6Mɔcɔ ŋau à dede à dabii si ilɛɛko ŋau, à waa sisiò laabaau jiidau nɔ à jɔ̀ bɔ̃ɔ ŋa à waa ba iri bii fei.

Laakaii Herodu* í dede

(Cɔ Matie 14:1-12; Maaku 6:14-29)

7Wee Herodu ilu ilɛu, í gbɔ mii iyi Jesu wa ce fei, nɔ laakaiɛ í dede. Kù mà baa bɛi á lasabu má si na iyi í jɔ̀ inɛ gɔ ŋa à waa ni Zãai í jĩ hai si balɛ, 8inɛ gɔ ŋa mɔ à ni Elii walii nlaui í naa má, nɔ inɛ gɔ ŋa mɔ à ni inɛ akãi waliii tako ŋaui í jĩ hai si balɛ má. 9Nɔ Herodu í ni, ǹ jɔ̀ à bu irii Zãa. To, inɛ ihɛ̃ iyi ǹ ya n maa n gbɔ baauɛ iyi wa ce dimii mii ŋau bɛ, yooi. Ŋɔi wa dɛ ku yɔɔ.

Jesu í wò inɛmɔkɔ dubu miiu (5.000)

(Cɔ Matie 14:13-21; Maaku 6:30-44; Zãa 6:1-14)

10Nɔ mɔcɔ maateeji ŋa iyi Jesu í tako í bɛ ŋau à baa bi tɛɛ à waa sisiaa mii ŋa iyi aŋa à ce fei. Nɔ Jesu í gbã ŋa ikã í bɔò ŋa ikpa kɔkɔi ilu gɔ iyi à ya kpe Bɛsaida. 11Ŋɔi inɛ ŋa à gbɔ ikpa bii à wa nɔ zamaa nkpɔ gɔ í da hãmɛ nŋa bɛ. Nɔ Jesu í gba ŋa wa sɔ̃ ŋa idei bommai Ilaaɔ̃, nɔ í jɔ̀ inɛ ŋa iyi a kù waa nɛ baani à ba iri.

12Iyi inunu wa lɔ ŋɔi woo bɛ maateeji ŋau à sɛkɛɛ siɛ à sɔ̃ɔ à ni, jɔ̀ inɛ ŋau à nɛ inɔ ilu walakɔ ilɛɛko ŋa à dɛ bii aa sũ do mii iyi aa jɛ, domi si gbabuai à wa ihɛ̃. 13Ŋɔi Jesu í sɔ̃ ŋa í ni, iŋɛ taka nŋɛ i na ŋa ijɛ a jɛ mɛɛ. Amma à ni, pɛ̃ɛ iyi à nɛ kù re ara miiu do cɛ̃ɛ minji. Mà ì bi awa taka nwa kaa ra ijɛ iyi inɛ fei á jɛi. 14Wee si inɔi inɛ ŋau inɛmɔkɔ ŋa à to zakai amanɛ dubu miiu (5.000). Ŋɔi Jesu í sɔ̃ mɔcɔɛ ŋau í ni, i jɔ̀ a buba wuaa ikã ikã amanɛ ciitaa ciitaa. 15Nɔ à ce bɛɛbɛ à jɔ̀ aŋa fei à buba. 16Ŋɔi Jesu í so pɛ̃ɛ miiuu do cɛ̃ɛ minjiu nɔ í wu iju lele í saabu Ilaaɔ̃ nɔ í bububuɛ í na mɔcɔɛ ŋau a kpɛ̃a zamaau. 17Iyi à kpɛ̃a zamaau, nɔ aŋa fei à jɛ à yo. Nɔ à ko iyi à jɛ í gbeu kɔlɔ maateeji í kɔ̃.

Piɛɛ í ni Jesu í jɛ inɛ iyi Ilaaɔ̃ í cica*

(Cɔ Matie 16:13-19; Maaku 8:27-29)

18Ajɔ nŋu gɔ Jesu do mɔcɔɛ ŋa à nya ara nŋa ikã nɔ wa ce kutɔɔ. Nɔ í bee ŋa í ni, yooi inɛ ŋa à ya ni ǹ jɛ. 19Nɔ à jɛaa à ni, inɛ gɔ ŋa à ya ni awɔ Zãa woo dasi inyii. Inɛ gɔ ŋa mɔ à ya ni awɔ Elii walii nlai takoui. Inɛ gɔ ŋa mɔ à ya ni awɔ inɛ akãi waliii tako ŋaui iyi í jĩ wa hai si balɛ. 20Ŋɔi í bee ŋa í ni, iŋɛ mɔ ni, yooi ì ni ǹ jɛ ŋa. Ŋɔi Piɛɛ í ni, awɔi ì jɛ inɛ iyi Ilaaɔ̃ í cicau. 21Ŋɔi Jesu í sɔ̃ mɔcɔ ŋau do kugaabu í ni a maà na a sɔ̃ inɛ gɔ.

Jesu wa fɔ idei ikuɛ do kujĩɛ

(Cɔ Matie 16:20-28; Maaku 8:30-9:1)

22Nɔ Jesu í sɔ̃ ŋa má í ni, amu Amai Amanɛ, kù nɛ bɛi á ce iyi n kù yɛ ijuukpã ntɔ ntɔ. Inɛ ngboi Zuifu ŋa do inɛ ngboi woo weei Ilaaɔ̃ ŋa do woo kɔ inɛ ŋa si wooda ŋa aa kɔ̀sim a kpam, amma an jĩ hai si balɛ si ajɔ mɛɛtasia. 23Nɔ í sɔ̃ aŋa fei í ni, inɛ iyi wa bi ku toom, ku jɔ̀ idɔɔbii araɛ nɔ ku so jĩi ku gaauɛ#9:23 jĩi ku gaauɛ Inɛ ŋa iyi à kua wooda gɔ ŋa, inɛi Romu ŋa à ya kpa ŋai si jĩi ku gaau. Nɔ inɛ iyi à yɛ taaleɛu nŋui í ya so jĩi nɔu ku bɔò hee tengi bii aa kpaau. ku toom wa. 24Nɔ inɛ iyi wa bi ku ba kuwɛɛɛ do idɔɔbiɛ kaa baa. Amma inɛ iyi í nyɔ kuwɛɛɛ na irim, lafɛ̃ɛi á baa do ntɔ. 25Aranfãani yoomai amanɛ í nɛ bii í ba amanii andunya fei, nɔ í kua kuwɛɛɛ. 26Nɔ í ni má, inɛ iyi wa ce anyɔi amu Amai Amanɛ, walakɔ wa ce anyɔi idem, amu mɔ an ce anyɔi lafɛ̃ɛ waati iyi an nyi wa. Nɔ waati iyi an nyi wa, an nyi wai do amboem do ti Baam do ti amaleka ŋa ajɔ. 27Ntɔ ntɔ, inɛ ŋa iyi à wa ihɛ̃ si nsɛi, gɔgɔ nŋa ŋa aa yɛ bommai Ilaaɔ̃ wa naa a bɛi a ku.

Arai Jesu í daana

(Cɔ Matie 17:1-8; Maaku 9:2-8)

28Iyi Jesu í fɔ ideu í tã, iyi í ce zakai ajɔ mɛɛjɔ ŋɔi í kpe Piɛɛ do Zãa do Zaaki à koo à gũ antaii iri kuta gɔ ku ba ku ce kutɔɔ. 29Iyi wa ce kutɔɔ ŋɔi wajuɛ í kpaasi dimi ikã, nɔ jaaɛɛ í fũuta pai pai. 30-31Ŋɔi gbakã Moizi do Elii à faata wa do amboe à waa baa ide ku fɔ. À waa fɔ idei ikuɛ iyi á kú Zeruzalɛmu ku jɔ̀ò andunyau ihɛ̃. 32Wee Piɛɛ do kpaasiɛ ŋa à waa siiko ntɔ ntɔ, amma iyi iju nŋa í má à yɛ amboei Jesu nɔ à yɛ amanɛ minji ŋa iyi à waa leekĩ bi tɛɛu. 33Waati iyi inɛ ŋau à waa jɔ̀ Jesu, Piɛɛ í sɔ̃ɔ í ni, Mɛɛtu, á sĩa ka maa wa ihɛ̃. Jɔ̀ ka ce ilei acɔ mɛɛta, akã titɛɛ, akã mɔ ti Moizi, akã mɔ ti Elii. Í ni bɛɛbɛi si na iyi í jɔ̀ kù mà mii iyi wa fɔ.

34Si bɛi wa fɔ ideu, bukɔɔ í naa í bii ŋa. Iyi mɔcɔ ŋau à yɛ bukɔɔu wa bii aŋa ŋɔi njo í mu ŋa. 35Nɔ à gbɔ ide ku fɔ gɔ hai si bukɔɔu í ni, inɛ ihɛ̃i í jɛ Amam. Nŋui ǹ cica. I ya gbɔ ideɛ ŋa. 36Si anyii ide ku fɔu, Jesu nŋu akãi à yɛ bɛ. Ŋɔi si waatiu bɛ mɔcɔ ŋau à coko a kù sɔ̃ inɛ kãma mii iyi à yɛ.

Jesu í faaba ama gɔ iyi í nɛ inɛi inɔɔko

(Cɔ Matie 17:14-18; Maaku 9:14-27)

37Iju kumáɛ iyi à kita wa hai antaii iri kutau, zamaa nla gɔ í naa í ko Jesu. 38Ŋɔi si inɔi zamaau mɔkɔ gɔ í dɔ̃ anu hee lele í ni, Mɛɛtu, cɔ ama inɛmɔkɔ akãu ihɛ̃i ǹ nɛ. Ǹ wa n tɔɔɛ i faabaɛ 39domi inɛi inɔɔko gɔ í ya dede siɛi. Nɔ waati iyi í dede fei, anu akã amau í ya dɔ̃ anui. Nɔ inɛi inɔɔkou í ya gbugbãɛi jiida, nɔ ku jɔ̀ amau ku maa ce antɔ foko ku maa mɛɛ araɛ, nɔ kufitaɛ í ya gaabu. 40Ǹ tɔɔ mɔcɔɛ ŋa a leleaa, amma à mɔngɔ. 41Ŋɔi Jesu í ni, iŋɛ inɛ laalɔ hai dasi naanɛ ŋa, hee waati yoomai an wa inɔ nŋɛ. Mà hee waati yoomai an maa n temuaò ŋɛ. Ŋɔi í sɔ̃ mɔkɔu í ni, naaò amaɛu wa ihɛ̃. 42Nɔ wa kooòɛ. Iyi í toɛ wa kɔkɔi Jesu ŋɔi inɛi inɔɔkou í kɛkɛɛ ilɛ í gbugbãɛ jiida. Amma Jesu í fɔ si inɛi inɔɔkou ide do gbugbã ŋɔi í fita nɔ amau í ba faaba. Nɔ Jesu í sindoa baaɛ. 43Inɛ ŋa iyi à wa bɛ fei à biti do bɛi gbugbãi Ilaaɔ̃ í la í to.

Jesu í nyi wa fɔ idei ikuɛ do kujĩɛ má

(Cɔ Matie 17:22-23; Maaku 9:30-32)

Si bɛi aŋa fei à wɛɛò bitiu bɛɛbɛ do mii iyi Jesu wa ce fei, ŋɔi Jesu í sɔ̃ mɔcɔɛ ŋa í ni, 44iŋɛ, i de itĩ i gbɔ ide iyi ǹ wa n sɔ̃ ŋɛu ihɛ̃ sãa sãa ŋa. Aa mu amu Amai Amanɛ a daa inɛ ŋa si awɔ. 45Amma mɔcɔɛ ŋau a kù gbɔ yaasei ideu. Ilaaɔ̃i í jɔ̀ ideu kù má nŋa titã, ku ba a maà gbɔ yaaseɛ. Nɔ wee à waa ce njoi yaasei ideu ku bee Jesu má.

Yooi í jɛ inɛ ngbo

(Cɔ Matie 18:1-5; Maaku 9:33-37)

46Ajɔ nŋu gɔ mɔcɔ ŋau à waa ce kakɔɔ ku ba a mà inɛ iyi í re si inɔ nŋa. 47Wee Jesu í mà lasabui idɔ nŋa, ŋɔi í so ama keeke gɔ í leekĩɛ kɔkɔɛ, 48nɔ í sɔ̃ ŋa í ni, inɛ iyi í gba amau ihɛ̃ na irim, amu takam nii í gba. Inɛ mɔ iyi í nɔ í gbam, inɛ iyi í bɛm wai í gba. Inɛ iyi í kere í re si inɔ nŋɛ, nŋui í re iŋɛ fei.

Inɛ iyi kù jɛ mbɛɛ nŋɛ inɛ nŋɛi

(Cɔ Maaku 9:38-40)

49Ŋɔi Zãa í ni, Mɛɛtu, à yɛ inɛ gɔ í ya maa lele inɛi inɔɔko ŋa do iriɛ, nɔ à kɔ̀a, domi kù wa inɔ nwa, kù waa tooɛ. 50Ŋɔi Jesu í jɛa í ni, i maà kɔ̀a ŋa, domi inɛ iyi kù jɛ mbɛɛ nŋɛ, inɛ nŋɛi.

Inɛ ŋa à kɔ̀ ku gba Jesu si ilui Samari gɔ

51Wee waati í maai wa si bii Jesu á jɔ̀ andunya ku nyi lele má, ŋɔi í dasi idɔ mam mam nŋu ku bɔ Zeruzalɛmu. 52Nɔ í bɛ inɛ gɔ ŋa a cuaa ku ba a koo a ceaa sɔɔlui bi ku sũ. Ŋɔi inɛ ŋa iyi í bɛ ŋau à to ilui Samari gɔ, 53amma inɛi ilu bɛ ŋa a kù jɛ ku gbaa si na iyi í jɔ̀ Zeruzalɛmuui wa bɔ. 54Iyi Zaaki do Zãa à gbɔ bɛɛbɛ, ŋɔi à beeɛ à ni, Lafɛ̃ɛ, ì bi ka jɔ̀ ina ku kita si ŋa wa hai lele ku kpa ŋa? 55Amma Jesu í sinda í la si ŋa do gbugbã. [Í ni, i kù mà iyi ì waa fɔ ŋa mɔm. 56Amu Amai Amanɛ n kù naa ku kpa amanɛ ŋa, bii kù jɛ n faaba ŋa.]

Nɔ à bɔ ilu mmu gɔ má.

Inɛ ŋa iyi à bi Jesu ku too

(Cɔ Matie 8:19-22)

57Si bɛi à waa nɛ ŋɔi inɛ gɔ í naa í sɔ̃ Jesu í ni, an tooɛ bii ì waa bɔ fei. 58Ŋɔi Jesu í sɔ̃ɔ í ni, mɛɛmu ŋa à nɛ kolo ŋa, nɔ baa yɛi ŋa mɔ à nɛ bi ku sũ. Amma amu Amai Amanɛ n kù nɛ bii an koo n sũ n sĩmi. 59Nɔ í sɔ̃ inɛ mmu gɔ í ni, toom wa. Amma inɛɛu í ni, jɔ̀ n koo n si baam wa titã. 60Ŋɔi Jesu í sɔ̃ɔ í ni, jɔ̀ iku ŋa a si iku nŋa ŋa, amma awɔ, koo sisi laabaau jiidai bommai Ilaaɔ̃ bii fei. 61Nɔ inɛ gɔ í sɔ̃ɔ má í ni, an tooɛ Lafɛ̃ɛ, amma jɔ̀ n koo n tɔɔ inɛm ŋa sukudɔ̃ wa titã. 62Nɔ Jesu í sɔ̃ɔ í ni, inɛ iyi í lesi awɔɛ si kaakoi kɛtɛ nɔ í sinda í cɔ anyi, kù jɔò bommai Ilaaɔ̃.

Currently Selected:

Luku 9: MKL

Highlight

Copy