Luku 10

Jesu í bɛ amanɛ kitaò fɛɛwa do minji

1Si anyii nŋu, Lafɛ̃ɛ í cica amanɛ kitaò fɛɛwa do minji mmu má, í bɛ ŋa minji minji a cuaa si ilu ŋa fei do bii nŋu takaɛ á nɛ ku bɔ fei. 2Nɔ í sɔ̃ ŋa í ni, amaajɛ iyi í to ku da í kpɔ, amma woo da ŋau a kù kpɔ. Na nŋu, i tɔɔ ilu ikou ku bɛ inɛ ŋa iyi aa ce icɛu wa. 3I dasi kpãa ŋa, ǹ wa n bɛ ŋɛi bɛi ama angudã ŋa si inɔi mɛɛmu kugaabu ŋa. 4I maà so taalili hee má jɛ bɔgɔ, walakɔ baata, nɔ i maà ya leekĩ kpãa i maà ce inɛ gɔ fɔɔ ŋa. 5Kpasɛ̃ bii ì lɔ ŋa i tako i sɔ̃ ŋa ŋa i ni, Ilaaɔ̃ ku mu nŋɛ laakai ku sũ. 6Bii ilu laakai ku sũ gɔ í wa bɛ, laakai ku sũ nŋɛ á to siɛ. Bii kù wɛɛ mɔi á nyi wa si ŋɛi. 7Kpasɛ̃ bii à gba ŋɛu, kpasɛ̃ bɛi aa maa wa ŋa, sɔnda do inyi iyi à na ŋɛ fei i ya gba i jɛ ŋa, domi inɛ kaa máa ce icɛ iyi kù waa jɛ. I maà ya lɔ kpasɛ̃ do kpasɛ̃ ŋa. 8Ilu iyi ì lɔ fei ŋa bii à gba ŋɛ, ijɛ iyi à na ŋɛ i ya jɛ ŋa. 9I sɔ̃ inɛi ilu ŋau i ni, bommai Ilaaɔ̃ í maai si ŋɛ. Nɔ bɔ̃ɔ ŋa iyi à wa bɛ i jɔ̀ a ba iri ŋa. 10Amma ilu bii ì lɔ nɔ a kù gba ŋɛ, i bɔ bantumai iluu nɔ i ni, 11wee à waa gbugbã nŋɛ hee do ilùlùi ilu nŋɛ iyi í wa si kutɛ nwa ŋa. Do nŋu fei, i mà ŋa iyi bommai Ilaaɔ̃ í maai wa. 12Nɔ Jesu í ni má, an sɔ̃ ŋɛ iyi si ajɔi kiitiu, ijuukpãi inɛi Sodomu ŋa ilu nlai takou, á tia do ti inɛi ilu ŋau.

Inɛi ilu ŋa iyi à kɔ̀ ku dasi Jesu naanɛ

(Cɔ Matie 11:20-24)

13Nɔ Jesu í ni má, inɔ kufɔ nla nlai á jɛ tu ŋɛ, iŋɛ inɛi Kɔrazɛ̃ɛ ŋa. Iŋɛ mɔ inɛi Bɛsaida ŋa inɔ kufɔ nla nlai á jɛ tu ŋɛ. Maamaake ŋa iyi à ce si ilu nŋɛ ŋau ihɛ̃, bii í jɛ si ilui Tii do Sidɔ̃ɔi à coo wo, bii í wa inɛi ilu ŋau aa dĩ saaki a kpataò na irii dulum du ŋa nɔ a kpaasi idɔ hai ku kpɛ. 14Na ŋɔi í jɔ̀ ǹ wa n sɔ̃ ŋɛ iyi si ajɔi kiitiu ijuukpãi inɛi Tii do Sidɔ̃ɔ ŋa á tia tu ŋɛ. 15Iŋɛ mɔ, inɛi Kapɛranumu ŋa, ì waa tamaa ŋa aa so ŋɛ hee lelei? Aawo, aa kɛkɛ ŋɛi hee bi kuwai iku ŋa.

16Nɔ í sɔ̃ mɔcɔɛ ŋa í ni, inɛ iyi í gbɔ ide nŋɛ, idem nii í gbɔ. Inɛ mɔ iyi í kɔ̀si ŋɛ, amui í kɔ̀si. Inɛ mɔ iyi í nɔ í kɔ̀sim, inɛ iyi í bɛm wai í kɔ̀si.

Kubaai amanɛ kitaò fɛɛwa do minji ŋau

17Amanɛ kitaò fɛɛwa do minji ŋa iyi Jesu í bɛ ŋau à baa do inɔ didɔ̃ nɔ à ni, Lafɛ̃ɛ, hee do inɛi inɔɔko ŋa fei à ya jirima wa na iriɛ. 18Nɔ Jesu í sɔ̃ ŋa í ni, ǹ yɛ Seetam wa cuku wa hai lele bɛi kuŋɔi ijĩ. 19Ntɔ ntɔ ǹ mu nŋɛ yiiko i tɛɛsɛò njo ŋa do cencee ŋa hee do gbugbã iyi Seetam mbɛɛu í nɛ fei, nɔ nkãma kaa yɔkɔ ku mɛɛ ŋɛ. 20Do nŋu fei, i maà jɔ̀ inɔ nŋɛ ku dɔ̃ si na iyi í jɔ̀ inɛi inɔɔko ŋau à waa jirima ŋɛ, amma i jɔ̀ inɔ nŋɛ ku dɔ̃ si na iyi í jɔ̀ à kɔ iri nŋɛ ŋa lelei Aɔ̃.

Inɔi Jesu í dɔ̃

(Cɔ Matie 11:25-27; 13:16-17)

21Si waati akãu, inɔi Jesu í dɔ̃ jiida jiida do gbugbãi Hundei Ilaaɔ̃ nɔ í ni, Baaba, awɔ iyi ì jɛ Lafɛ̃ɛi lele do ilɛ, ǹ wa n saabuɛ do iyi ì singaa ilu bisi do woo mà ŋa mii ŋau ihɛ̃ nɔ ì nyisi amu ŋa. Í sĩa Baaba, si na iyi í jɔ̀ bɛɛbɛi ì bi.

22Baam nii í daam mii fei si awɔ. Inɛ kãma kù mà amu Amau bii kù jɛ Baau. Nɔ inɛ kãma kù mà Baau bii kù jɛ amu Amau do inɛ ŋa iyi ǹ bi n nyisi ŋa.

23Ŋɔi Jesu í sinda si mɔcɔɛ ŋau í sɔ̃ ŋa í ni, ilu inɔ didɔ̃i inɛ iyi ijuɛ wa yɛ mii iyi ì waa yɛ ŋa. 24Ntɔ ntɔ an sɔ̃ ŋɛ, walii do amanlu nkpɔ à bi aŋa a yɛ mii ŋa iyi ì waa yɛ ŋa, a kù nɔ a kù yɔɔ. À bi aŋa a gbɔ iyi ì waa gbɔ ŋa, a kù nɔ a kù gbɔɔ.

Mɔndai inɛ jiidai Samari* gɔ

25Ajɔ nŋu gɔ woo kɔ inɛ ŋa si wooda gɔ í dede ku cã idɔi Jesu nɔ í ni, Mɛɛtu, bɛirei an ce n baò kuwɛɛ hai tã. 26Ŋɔi Jesu í beeɛ í ni, mii à kɔ si woodau. Ide mii ì ya cio si. 27Ŋɔi í jɛ í ni, bi Aɔ̃ Lafɛ̃ɛɛ do idɔɛ fei, do gbugbãɛ fei, do lasabuɛ fei,#10:27 Cɔ Wooda ku kɔsi 6:5. nɔ i bi inɛ mmu ŋa bɛi ì bi araɛ.#10:27 Cɔ Kuwee 19:18. 28Ŋɔi Jesu í ni, ide iyi ì jɛ í sĩa. Ce bɛɛbɛ, aa ba kuwɛɛ.

29Amma mɔkɔu wa bi ku na araɛ ntɔ, nɔ í beeɛ í ni, yooi í jɛ inɛ mmu bi tom. 30Nɔ Jesu í sɔ̃ɔ í ni, mɔkɔ gɔ í kita wa hai Zeruzalɛmu wa bɔ Zeriko, ŋɔi í koo í dasi awɔi ile ŋa. Ile ŋau à coo ile à cãa, nɔ à nɛ à jɔ̀ɔ bɛ í kasãm. 31Wee woo weei Ilaaɔ̃ gɔ wa too kpãau wa. Iyi í yɛ mɔkɔu, ŋɔi í gbe í lɔ. 32Bɛɛbɛ mɔi inɛ gɔ si dimii Levii í to inyau. Iyi í yɔɔ nɔ í gbe í lɔ. 33Amma inɛi Samari gɔ mɔ wa bɔ ilu. Iyi í to bɛ ŋɔi í yɛ mɔkɔu nɔ araare í muu. 34Nɔ í sɛkɛɛ siɛ í jɔaa ikpo do atɛ̃ vɛ̃ɛ si agbɛi kumɛɛ ŋau nɔ í dũu. Si anyiɛ nɔ í lesiɛ si gbankɛlɛi nŋu takaɛ í bɔòɛ bi ku sɔi inɛ njoo ŋa nɔ í gbɔaa. 35Iju kumáɛ, nɔ í so fiai icɛi ajɔ minji, í na inɛ ngboi bi ku sɔi inɛ njoo ŋau, nɔ í ni, gbɔa inɛɛu ihɛ̃. Iyi ì jɛ í lesi na iriɛ, an sãaɛ waati iyi an baa. 36Ŋɔi Jesu í ni, si amanɛ mɛɛta ŋau bɛ, yoo nŋai ì tamaa í jɛ kpaasii inɛ iyi í dasi awɔi ile ŋau. 37Ŋɔi inɛɛu í ni, inɛ iyi í ce araareɛu. Ŋɔi Jesu í ni, debɛi, awɔ mɔ, koo ce bɛɛbɛ.

Jesu í bɔ bi Maata do Maari

38Ajɔ nŋu gɔ Jesu do mɔcɔɛ ŋau à waa nɛ nɔ à to ilu gɔ. Wee inaabo gɔ í wa ilu bɛ, à ya kpoo Maata. Nŋui í gba ŋa si kpasɛ̃ɛ. 39Abou í nɛ ifɔ gɔ iyi à ya kpe Maari. Ifɔu wa bubai kɔkɔi Lafɛ̃ɛ wa gbɔ ideɛ. 40Amma Maata nŋu í wasi ku mante araɛ do caka ku tɛkɛ. Ŋɔi í naa í ni, Lafɛ̃ɛ, kù jɛɛ si ide kãma iyi ifɔm í jɔ̀ɔm icɛu amu akã? Sɔ̃ɔ i ni ku naa ku sobim. 41Ŋɔi Lafɛ̃ɛ í jɛaa í ni, Maata, Maata, ì jɔ̀ zigiɛ wa da nɔ ì waa mante araɛ na mii nkpɔ. 42Amma bukaatai mii akãi amanɛ í nɛ. Nŋui Maari njɛ í cica bɛ, nɔ inɛ kãma kaa gbaa siɛ má.

Currently Selected:

Luku 10: MKL

Highlight

Copy