Luku 11

Idei kutɔɔ

(Cɔ Matie 6:9-13; 7:7-11)

1Ajɔ nŋu gɔ Jesu wa ce kutɔɔ bii gɔ. Iyi í tã ŋɔi mɔcɔ akãɛ í ni, Lafɛ̃ɛ, kɔ wa si bɛi aa ka ya ce kutɔɔ, bɛi Zãa í kɔ mɔcɔɛ ŋa si. 2Ŋɔi Jesu í sɔ̃ ŋa í ni, bii ì waa ce kutɔɔ ŋa i ya ni,

Baaba, jɔ̀ inɛ fei ku mà iyi awɔi ì jɛ inɛ kumá.

Naa i jɛ bommaɛ.

3Mu nwa ijɛi ajɔ fei nwa.

4Kpa idei dulum du wa,

domi awa mɔ à ya ka kpa idei kurara iyi inɛ ŋa à ce nwa.

Maà ti i jɔ̀ ka dasi kulɛlɛ.

5Nɔ í sɔ̃ ŋa má í ni, á yɔkɔ ku jɛ nsɛi inɛ gɔ nŋɛ í ba inɛ njoo idũ laja. Bii kù nɛ ijɛ iyi á naa, á bɔ bi kpaasiɛi ku ni, wɛ̃ɛm pɛ̃ɛ mɛɛta wa, 6domi kpaasim gɔ í naa bi tom hai ilu gɔ. Nɔ wee n kù nɛ ngɔgɔ iyi an naa. 7Kpaasiɛu á yɔkɔ ku jɛaa hai inɔ ile ku ni, maà mantem, amu ǹ sɔkɔ tã, amu do amam ŋa fei à waa sũ. N kaa n yɔkɔ n dede n naɛ pɛ̃ɛ. 8Ǹ wa n sɔ̃ ŋɛi, baa bii kù bi ku dede ku náa si na iyi í jɔ̀ í jɛ kpaasiɛ, á yɔkɔ ku dede ku naa bukaatai mii iyi í bi fei si na iyi í jɔ̀ wa manteɛ. 9Na nŋu, ǹ wa n sɔ̃ ŋɛi, i ya tɔɔ ŋa, aa mu nŋɛ. I ya dɛdɛ ŋa aa ba ŋa. I ya cã gambo ŋa, aa cĩ nŋɛ. 10Ntɔ ntɔ, inɛ iyi wa tɔɔ fei, Ilaaɔ̃ á muaa. Inɛ mɔ iyi wa dɛdɛ, Ilaaɔ̃ á jɔ̀ ku ba. Inɛ mɔ iyi í nɔ wa cã gambo, Ilaaɔ̃ á cĩaa. 11Yooi í wa si inɔ nŋɛ ihɛ̃ iyi [bii amaɛ í tɔɔɛ pɛ̃ɛ á so kuta ku naa. Bɛɛbɛ mɔi inɛ kãma kù wɛɛ iyi] bii amaɛ í tɔɔɛ cɛ̃ɛ á so njo ku naa, 12walakɔ bii í tɔɔɛ njɛi ajɛɛ ku so cencee ku naa. 13Iŋɛ iyi ì ya ce laalɔ ŋa ì mà mii jiida ku na ama nŋɛ ŋa, mà irei. To, Ilaaɔ̃ Baa nŋɛ iyi í wa lele kaa ce ku re zaka bɛɛbɛ? Kaa so Hundeɛ ku na inɛ ŋa iyi à waa tɔɔɛ?

Jesu í jɛa inɛ ŋa iyi à máa ide

(Cɔ Matie 12:22-30; Maaku 3:22-27)

14Si anyii nŋu, à naa Jesu mɔkɔ gɔ wa. Mɔkɔu í nɛ inɛi inɔɔko gɔ iyi í jɔ̀ ci ya fɔ ide. Nɔ Jesu í lele inɛi inɔɔkou. Iyi inɛi inɔɔkou í fita ŋɔi mɔkɔu í lɔsi ide ku fɔ, nɔ zamaa fei í biti. 15Amma inɛ gɔ ŋa à ni, inɛ ngboi inɛi inɔɔko ŋa iyi à ya kpe Bɛɛlizebui í mua Jesu gbugbã wa leleò inɛi inɔɔko ŋa. 16Nɔ inɛ gɔ ŋa mɔ à waa bi a cã idɔɛ a cɔ. Nɔ à sɔ̃ɔ à ni ku ce maamaake ku nyisi iyi gbugbãɛ wa naai hai lele. 17Si bɛi Jesu í mà lasabu nŋa ŋɔi í ni, bomma iyi inɛɛ ŋa à waa ja aŋa duusɔ̃ɔ, bommau á na ku kpɔò bomma nɔ kpasɛ̃ɛ ŋa a cuku. 18Bɛɛbɛ mɔi bii Seetam wa ja do araɛ, bɛirei bommaɛ á ce ku bɔ waju. Ǹ ni bɛɛbɛi si na iyi í jɔ̀ ì waa ni ŋa do gbugbãi Bɛɛlizebui ǹ wa n leleò inɛi inɔɔko ŋa. 19Bii do gbugbãi Bɛɛlizebuui ǹ wa n leleò inɛi inɔɔko ŋa, to, do gbugbãi yooi mɔcɔ nŋɛ ŋa mɔ à waa leleò ŋa. Na ŋɔi í ce aŋa taka nŋa aa nyisi iyi ì rara ŋa. 20Amma bii do gbugbãi Ilaaɔ̃i ǹ wa n leleò inɛi inɔɔko ŋau, nŋu bɛ wa nyisi iyi Ilaaɔ̃ í sinti ku jɛ bommaɛ si anini nŋɛ.

21Bii ilu gbugbã jiida gɔ í nɛ jĩnɛi igũ nɔ wa degbe kpasɛ̃ɛ, amaniɛ á wɛɛi si laakai. 22Amma bii ilu gbugbã gɔ mɔ iyi í roo í naa í kãmiaɛ, njɛ á ko jĩnɛi igũ iyi wa naanɛui fei nɔ ku ce ikpɛ̃i amaniu mɔ.

23Inɛ iyi kù jɛ tom, mbɛɛm nii. Inɛ iyi kù waa bam ku tɔtɔɔ, wa fangaaɛi.

Kunyii inɛi inɔɔko wa má

(Cɔ Matie 12:43-45)

24Ŋɔi Jesu í kpa nŋa mɔndau ihɛ̃ í ni, bii inɛi inɔɔko í fita si inɛ, í ya maa dabii si gbaa ŋai ku maa dɛ bi ku sĩmi. Bii í kua, ŋɔi í ya ni, an nyi inya nwom hai bii ǹ fita wai. 25Waati iyi í nyi nɔ í ba inɛɛu í yɛ bɛi ile ngbɛ iyi à kpã à teeseɛ sãa sãa, 26á koo ku dɛdɛ kpaasi laalɔ ŋa iyi à roo wa má bɛi aŋa mɛɛje, a na a lɔ si inɛɛu a maa wa bɛ. Waati bɛɛbɛ kuwɛɛi takoi inɛɛu á tia baa ti ankãanyiɛ má.

Inɔ didɔ̃ ntɔ

27Waati iyi Jesu wa fɔ bɛɛbɛ, abo gɔ í dɔ̃ anu hai inɔ zamaau í ni, ilu inɔ didɔ̃i inɛ iyi í so asĩɛ, nɔ ì mɔmɔ amɔɛ. 28Ŋɔi Jesu í jɛaa í ni, í tia i ni ilu inɔ didɔ̃ ŋai inɛ ŋa iyi à waa gbɔ idei Ilaaɔ̃, nɔ à waa ceò icɛ.

Inɛ ŋa à bi maamaake

(Cɔ Matie 12:38-42)

29Si bɛi zamaau wa kɔ̃ɔsi ŋɔi Jesu í ni, inɛi nsɛi ŋa inɛ laalɔ ŋai. À waa tɔɔ maamaake, amma maamaake gɔ kù wɛɛ iyi aa nyisi ŋa, bii kù jɛ ti faajii walii Zonasi. 30Si bɛi Zonasi í jɛ nyinda bi inɛi Ninivu ŋa, bɛɛbɛ mɔi amu Amai Amanɛ an jɛ nyinda bi inɛi nsɛi ŋa. 31Si ajɔi kiitiu inaabo ilaalui ilɛi Seba á dede si inɛi nsɛi ŋa ku yɛ taale nŋa, si na iyi í jɔ̀ hai jĩijĩi í dede í naa ku gbɔ idei bisii Salomɔɔ ilaalu nlau. Nɔ wee nsɛi, mii gɔ í wa ihɛ̃ iyi í nɛ bɛɛrɛ í re Salomɔɔ. 32Si ajɔi kiitiu inɛi Ninivu ŋa aa dede si inɛi nsɛi ŋa a yɛ taale nŋa, si na iyi í jɔ̀ à kpaasi idɔ nŋa na waazoi Zonasi. Nɔ wee nsɛi, mii gɔ í wa ihɛ̃ iyi í nɛ bɛɛrɛ í re Zonasi.

Inya kumái ara

(Cɔ Matie 5:15; 6:22-23)

33Inɛ gɔ ci ya má fitila ku singaɛ, [walakɔ ku biiɛ do caka,] amma à ya jilɔɔi bi ku lesi fitila ku ba inɛ ŋa iyi à waa lɔ wa a maa yɛ inya kumá. 34Ijuɛi í jɛ fitilai araɛ. Bii ijuɛ wa nɛ baani, araɛ fei í wa si inya kumái. Amma bii kù waa nɛ baani, araɛ mɔ fei í wa si ilu kukui. 35Na nŋu, ce laakai ku ba inya kumá iyi í wa si araɛu ku maà ce ilu kuku. 36Bii araɛ fei wa nɛ inya kumá, nɔ baa ikɔ̃ akãɛ gɔ kù wa si ilu kuku, fei ndɛɛ á maa mái bɛi waati iyi fitila í má siɛ inya.

Jesu í yɛ taalei Farisi* ŋa do woo kɔ inɛ ŋa si wooda* ŋa

(Cɔ Matie 23:1-36; Maaku 12:38-40)

37Iyi Jesu í fɔ ideu í tã, ŋɔi Farisi gɔ í kpoo ku jɛ kpasɛ̃ɛ. Nɔ í koo í buba kpasɛ̃i Farisiu, aŋaò à waa jɛ. 38Ŋɔi Farisiu í cɔɔ í biti do iyi kù wɔɔ í bɛi wa jɛ. 39Amma Lafɛ̃ɛ í sɔ̃ɔ í ni, iŋɛ Farisi ŋa, í yɛ ŋai bɛi inɛ ŋa iyi à ya wiɛ anyii kɔɔfu do jɛɛ ŋa nɔ a jɔ̀ inɔɛ riisi. Inɔ hai sĩa do takiii wa kɔ̃ nŋɛ. 40Iŋɛ hai nɛ yaase ŋa, inɛ iyi í taka anyii ara, lafɛ̃ɛ si í ce inɔɛ mɔ? 41Í sĩa i na ilu are ŋa mii iyi í wa si inɔ jɛɛ do kɔɔfu, nɔ mii fei á má nŋɛ.

42Amma ijuukpãi á jɛ tu ŋɛ, iŋɛ Farisi ŋa, si na iyi í jɔ̀ ì ya na Ilaaɔ̃ akã si mɛɛwa fei si nyaui ayɛ nŋɛ ŋa. Do nŋu fei, i kù waa ce jiida nɔ i kù waa nyisi kubii Ilaaɔ̃ ŋa. Iyi bɛi í jɔ i ya ce nɔ i maà gbɛjɛ iyi í gbe ŋa.

43Ijuukpãi á jɛ tu ŋɛ, iŋɛ Farisi ŋa, si na iyi í jɔ̀ si ile bi ku ce kutɔtɔɔ ŋa kitãi inɛ ngbo ŋai ì ya bi ŋa, nɔ ì ya bi a ce ŋɛ fɔɔ do bɛɛrɛ nla nla si bantuma ŋa. 44Aa yɛ ijuukpã ŋa domi ì yɛ ŋai bɛi balɛ ŋa iyi inɛ gɔ kù waa yɛ. Si antai nŋai à waa nɛ a kù nɔ a kù mà#11:44 Si antai nŋai à waa nɛ a kù nɔ a kù mà Bi Zuifu ŋa, balɛ ku nɛ̀ si taale nla nlai domi bii ì nɛ si balɛ í yɛ bɛi ì so riisi mbɛ..

45Ŋɔi woo kɔ inɛ ŋa si wooda gɔ í sɔ̃ɔ í ni, Mɛɛtu, bii ì waa fɔ bɛɛbɛ, awa mɔi ì waa bu.

46Ŋɔi Jesu í jɛaa í ni, ijuukpãi á jɛ tu ŋɛ, iŋɛ woo kɔ inɛ ŋa si wooda ŋa mɔ, domi ì waa kãa inɛ ŋa aso kugaabu ku so ŋa, nɔ iŋɛ taka nŋɛ i ci ya lesi baa amaawɔ nŋɛ. 47Aa yɛ ijuukpã ŋa, si na iyi í jɔ̀ walii ŋa iyi bala nŋɛ ŋa à kpa wo, iŋɛi ì waa teese balɛ nŋa ŋa. 48Ì waa nyisi ŋa iyi ì jɛsi mii iyi bala nŋɛ ŋau à ce, si na iyi í jɔ̀ aŋai à kpa walii ŋau, nɔ iŋɛi ì waa teese balɛ nŋa ŋa. 49Ŋɔi í jɔ̀ Ilaaɔ̃ í fɔ si bisiɛ í ni, an bɛ walii ŋa do woo bɛ ŋa si anini nŋa. Aa kpa inɛ gɔ ŋa nɔ a kpã inɛ gɔ ŋa mɔ iju. 50Na nŋu, ijuukpãi woo kpa walii ŋau fei hai sintei andunya si iri nŋɛi á jɛ. 51Iŋɛi aa yɛ ijuukpãi ku kpai Abɛli hee ku koo si Zakari iyi à kpa si afei bi kuweeu do kpasɛ̃i Ilaaɔ̃. Ntɔ ntɔ, ǹ wa n sɔ̃ ŋɛ, ijuukpãi mii ŋau bɛ fei si inɛi nsɛi ŋau ihɛ̃i á baa ku jɛ si.

52Ijuukpãi á jɛ tu ŋɛ, iŋɛ woo kɔ inɛ ŋa si wooda ŋau, domi i kù bi ntɔi idei Ilaaɔ̃ ku mà ŋa, nɔ inɛ ŋa iyi à bi ku màɛ iŋɛi ì waa ganji ŋa ŋa.

53Iyi Jesu í fɔ bɛɛbɛ í tã ŋɔi í fita hai bɛ. Ŋɔi idɔi woo kɔ inɛ ŋa si wooda do Farisi ŋau í kɔ̃ nɔ à wasi ku manteɛ do ide ku bee si gãmɛi ide nkpɔ, 54à waa leaò taai ide ku ba a muu si ide gɔ.

Currently Selected:

Luku 11: MKL

Highlight

Copy