Luku 23

À bɔò Jesu bi Pilati

(Cɔ Matie 27:1-2, 11-14; Maaku 15:1-5; Zãa 18:28-38)

1Nɔ aŋa fei à dede à bɔò Jesu bi Pilati. 2Ŋɔi à lɔsi dulum ku máa à ni, à ba inɛɛu ihɛ̃ í wasi ku kɔ inɛ ŋa si bisi bɛi aa ce a jɛ ilɛ nwa igũ nɔ wa ganji a sãa ilaalu nlai Romu fiai lɛmpoo. Si anyii nŋu má í ya maa kpe araɛ ilaalu, nɔ í ni nŋuu inɛ iyi Ilaaɔ̃ í cicaui. 3Nɔ Pilati í beeɛ í ni, awɔi ì jɛ ilaalui Zuifu ŋa? Nɔ Jesu í jɛaa í ni, awɔi ì fɔɔ. 4Nɔ Pilati í sɔ̃ inɛ ngboi woo weei Ilaaɔ̃ ŋau do zamaau í ni, n kù yɛ taale kãma si mɔkɔu ihɛ̃. 5Amma à la do gbugbã à waa ni, í ya maa kosi inɛ ŋa ijai do cioɛ iyi í ya maa ce nŋa. Hai ilɛi Galileei í sintiɛ nɔ í bɔ si ilɛi Zudee fei í bɛi í to wa ihɛ̃ má nsɛi.

À bɔò Jesu si wajui Herodu*

6Iyi Pilati í gbɔ bɛɛbɛ, ŋɔi í bee í ni, kù jɛ mɔkɔu inɛi Galileei ba. 7Nɔ í gbɔ à ni Jesu wa naai hai si ilɛi bommai Herodu. Ŋɔi í ni a bɔòɛ bi Herodu. Wee waati bɛɛbɛ Herodu mɔ í wa Zeruzalɛmu. 8Ŋɔi à bɔò Jesu bi tɛɛ. Iyi Herodu í yɛ Jesu ŋɔi inɔɛ í dɔ̃ ntɔ ntɔ, si na iyi í jɔ̀ hai ku kpɛi wa dɛ ku yɔɔ, na irii laabaauɛ iyi í gbɔ à ya maa fɔu. Ŋɔi í bi ku cea nŋu maamaake gɔ. 9Ŋɔi í bee Jesu ide nkpɔ nkpɔ amma Jesu kù jɛaa ide kãma. 10Wee inɛ ngboi woo weei Ilaaɔ̃ ŋa do woo kɔ inɛ ŋa si wooda ŋau à wa bɛ, à waa máa dulum do gbugbã. 11Ŋɔi Herodu í jɔ̀ à daa si ibɔ kusĩa gɔ nɔ nŋu do soogeɛ ŋa à waa yaakoɛ nɔ à wasi ku buu. Si anyii nŋu nɔ í jɔ̀ à nyiòɛ bi Pilati má. 12Herodu do Pilati wee mbɛɛ ŋai wo, amma ajɔ nŋu bɛi à dɔ̃.

À yɛ taalei Jesu a ba a kpaa

(Cɔ Matie 27:15-26; Maaku 15:6-15; Zãa 18:39-19:16)

13Pilati í kpe inɛ ngboi woo weei Ilaaɔ̃ ŋa do inɛ ngboi Zuifu ŋa do zamaa nkpɔ má í tɔtɔɔ ŋa. 14Nɔ í sɔ̃ ŋa í ni, ì naam mɔkɔu ihɛ̃ wa ŋa, ì ni wa kɔ inɛ ŋa si bisi bɛi aa ce a jɛò ilɛ nwa igũ. Nɔ wee ǹ beeɛ ideu si waju nŋɛ ihɛ̃, amma n kù yɛ si mɔkɔu ide kãma iyi ì waa yɛò taaleɛ ŋa. 15Nɔ Herodu mɔ kù yɛ siɛ taale kãma. Na ŋɔi í ce í jɔ̀ à nyiòɛ wa ihɛ̃. Mɔkɔu kù ce kurara kãma iyi í to a kpaa. 16Na nŋu, an jɔ̀ a tɛaa kpɔtɔɔ nɔ n jɔ̀ɔ ku nɛɛ. [ 17Wee si jingaui Iku ku kua fei tilasi Pilati í ya jɔ̀ inɛi piisɔ̃ɔ akãi.]

18Ŋɔi aŋa fei à dɔ̃ anu hee lele à waa ni, kpa inɛ ihɛ̃ nɔ i jɔ̀ nwa Barabasi. 19Wee à mu Barabasi à dasiɛ piisɔ̃ɔi wo na kosi iyi í ce si inɔ ilu nɔ í nyi í kpa inɛ gɔ má.

20Ŋɔi Pilati í bee ŋa ide má si na iyi í jɔ̀ í dasi idɔ nŋu ku jɔ̀ Jesu. 21Ŋɔi à dedeò hoya hoya à wasi ku ni, kpakpaɛ si jĩi ku gaau.

22Ŋɔi Pilati í bee ŋa isɛ gbɛɛtasiaɛ í ni, laalɔ yoomai í bɛi í ce. Amu n kù yɛ siɛ ngɔgɔ iyi í to iku. Na nŋu, an jɔ̀ a tɛaa kpɔtɔɔi nɔ n jɔ̀ɔ ku nɛ. 23Amma bɛi Pilati wa fɔ fei, bɛɛbɛ mɔi inɛ ŋau à ya dɔ̃ anu hee lele a maa ni, kpakpaɛ si jĩi ku gaau. Ŋɔi anu ku dɔ̃ nŋau í kãmiaɛ. 24Nɔ Pilati í dasi idɔ nŋu ku ce bɛi à biu. 25Nɔ í jɔ̀ nŋa inɛ iyi à biu, inɛ iyi à dasi piisɔ̃ɔ na kosi do inɛ ku kpau, nɔ í da nŋa Jesu si awɔ a ceaa bɛi à bi.

À kpakpa Jesu si jĩi ku gaau

(Cɔ Matie 27:32-44; Maaku 15:21-32; Zãa 19:17-27)

26Ŋɔi inɛ ŋau à gbã Jesu à waa nɛòɛ. Waati iyi à waa nɛòɛu, ŋɔi à ko mɔkɔ gɔ iyi à ya kpe Simɔɔ, inɛi Sirɛni. Mɔkɔu wa baai hai iko. Ŋɔi à muu à kãa jĩi ku gaauu ku tooò Jesu.

27Nɔ zamaa nla gɔ wa tooɛ. Si inɔ nŋa inaabo gɔ ŋa à wa bɛ à kpata à waa cã kpokpo na iriɛ. 28Iyi Jesu í sinda í cɔ ŋa ŋɔi í ni, iŋɛ inaaboi Zeruzalɛmu ŋa, i maà kpata na irim, amma i kpata na iri nŋɛ do na irii ama nŋɛ ŋa. 29Ntɔ ntɔ, ajɔ wa naa iyi inɛ ŋa aa ni, ilu inɔ didɔ̃i gbɛnda ŋa do inaabo ŋa iyi a kù bí, do inaabo ŋa iyi ama kù mɔmɔ si amɔ nŋa. 30Waati bɛɛbɛi aa maa sɔ̃ iri kuta ŋa a ni, i cuku i bata wa wa ŋa. Nɔ aa sɔ̃ geete ŋa a ni, i bii wa wa ŋa.#23:30 Cɔ Ozee 10:8. 31Ntɔ ntɔ, bii inɛ ŋa à waa cea jĩi tũtũ dimi bɛ ihɛ̃, bɛirei aa na a cea jĩi ngbɛ.

32Waati iyi à waa nɛò Jesu à kooò woo ce laalɔ minji gɔ ŋa mɔ iyi aa kpa ŋa do nŋu ajɔ. 33Ŋɔi à to inya iyi à ya kpe kokoi iriu. Bɛi à kpakpa Jesu si jĩi ku gaauu. Bɛ mɔi à kpakpa woo ce laalɔ minji ŋau, inɛ akã ikpa awɔ njɛɛ, inɛ akã mɔ ikpa awɔ cangaɛ.

34Nɔ Jesu í ni, Baaba, kpa idei dulum du ŋa, domi a kù mà mii iyi à waa ce.

Si anyiɛ sooge ŋau à ta kpasa si jĩnɛɛ ŋa a ba a yɛ iyi inɛ fei á ba. Bɛɛbɛi à ceò ikpɛ̃i jĩnɛɛ ŋau. 35Ŋɔi zamaau í wa bɛ wa cɔɔ. Nɔ inɛ ngbo ŋau à yaakoɛ à waa ni, í faaba inɛ gɔ ŋa. To, kú faaba araɛ bɛ bii nŋui í jɛ inɛ iyi Ilaaɔ̃ í cicau. 36Ŋɔi sooge ŋa mɔ à sɛkɛɛ siɛ aŋa mɔ à koo à waa yaakoɛ nɔ à naa inyi ikã ku mɔ. 37Nɔ à sɔ̃ɔ à ni, bii awɔi í jɛ ilaalui Zuifu ŋa, awɔ takaɛ faaba araɛ. 38Si dee deei antaii iriɛ à kɔɔ à ni, inɛ ihɛ̃i í jɛ ilaalui Zuifu ŋa.

39Inɛ akãi woo ce laalɔ ŋa iyi à kpakpa si jĩi nɔu wa sɔ̃ Jesu ide nfe wa ni, kù jɛ awɔi ì jɛ inɛ iyi Ilaaɔ̃ í cicau ba. To, faaba araɛ nɔ i faaba awa mɔ. 40Amma inɛ akãu mɔ í jɛaa í ni, i kù waa ce njoi Ilaaɔ̃, baa awɔ iyi iŋɛò fei ì waa yɛ ijuukpã akã? 41Bii awai à waa kpã iju bɛɛbɛ, dee deei, domi à waa sã nwa gbesei mii iyi à cei. Amma njɛ kù ce laalɔ kãma. 42Ŋɔi í sinda í sɔ̃ Jesu í ni, waati iyi aa koo i jɛ bommaɛ, ye gigim. 43Nɔ Jesu í jɛaa í ni, ntɔ ntɔ, ǹ wa n sɔ̃ɛi, nnyi mɔm aa wɛɛ do amu lelei Aɔ̃.

Waati iyi Jesu í ku

(Cɔ Matie 27:45-46; Maaku 15:33-41; Zãa 19:28-30)

44Ŋɔi zakai dasã nkpau ilu í kuku si ilɛu fei hee í koo í to isɔ mɛɛtai alɛ. 45Inunu kù waa má inya má. Nɔ ridooi kpasɛ̃i Ilaaɔ̃u í ga í kpɛ̃ minji. 46Ŋɔi Jesu í la do gbugbã í ni, Baaba, ǹ daaɛ hundem si awɔ.#23:46 Cɔ Iri ku kɔ̃ 31:5. Iyi í fɔ bɛɛbɛ nɔ í ku. 47Iyi inɛ ngboi sooge ŋau í yɛ mii iyi í ceu, ŋɔi í saabu Ilaaɔ̃ í ni, ntɔ ntɔ inɛɛu ihɛ̃ kù nɛ taale kãma.

48Nɔ inɛ ŋa mɔ iyi à naa ku cɔ mii iyi á na ku ceu fei à yɔɔ nɔ à sinda à nɛ do inɔ kufɔ nla nla. 49Inɛ ŋa iyi à mà Jesu fei do inaabo ŋa iyi à tooɛ wa hai ilɛi Galileeu, à leekĩ hee jĩijĩ à waa cɔ mii iyi wa ce.

À dasi ikui Jesu balɛ

(Cɔ Matie 27:57-61; Maaku 15:42-47; Zãa 19:38-42)

50-51Mɔkɔ gɔ iyi à ya kpe Zozɛfu, inɛi Arimatee ilu akãi Zuifu ŋau í naa bɛ. Mɔkɔu inɛ dee deei, wa ce jiida, nɔ í wɛɛò kpãa ku cɔ iyi Ilaaɔ̃ á na ku jɛ bommaɛ. Í wa si igbɛi woo kiiti ŋa, amma kù jɛsi ide nŋa iyi à jilɛ a cea Jesu wo. 52Mɔkɔu í bɔ bi Pilati í koo í tɔɔ ikui Jesu. 53Ŋɔi Pilati í jɛaa si, nɔ Zozɛfu í kitaɛ wa hai si antaii jĩi ku gaauu nɔ í biiɛ do acɔ fũfũ titɔ̃ gɔ í bɛi í koo í suu. Í suui si isai kuta gɔ iyi à gbe wo nɔ a kù si inɛ gɔ bɛ titã. 54Wee ajɔi sɔɔlui kusĩmii, iyi hai alɛu ajɔi kusĩmiu á sinti.

55Ŋɔi inaabo ŋa iyi à too Jesu wa hai ilɛi Galileeu à too Zozɛfu nɔ à yɛ balɛu do bɛi à si Jesu fei. 56Ŋɔi à sinda à bɔ ide à koo à ce sɔɔlui ikpo ku dɔ̃ inúnù do tuae ŋa wa.

Si ajɔi kusĩmiu nɔ à sĩmi si bɛi wooda í fɔ.

Currently Selected:

Luku 23: MKL

Highlight

Copy