Luku 22

Inɛ ngbo ŋa à waa busi njɛ a kpa Jesu

(Cɔ Matie 26:1-5; Maaku 14:1-2; Zãa 11:45-53)

1Jingaui Pɛ̃ɛ hai nɛ levɛ̃ɛ iyi à ya kpe jingaui Iku ku kuau í maai wa. 2Inɛ ngboi woo weei Ilaaɔ̃ ŋa do woo kɔ inɛ ŋa si wooda ŋau à waa dɛ kpãa bɛi aa ce a kpaò Jesu, amma à waa ce njoi zamaau.

Zudasi á fita anyii Jesu

(Cɔ Matie 26:14-16; Maaku 14:10-11)

3Ŋɔi Seetam í lɔ idɔi Zudasi iyi à ya kpe Isikariɔti. Zudasiu inɛ akãi mɔcɔ maateeji ŋaui. 4Zudasi í koo í dĩ anu tɔɔsi do inɛ ngboi woo weei Ilaaɔ̃ ŋau do inɛ ngboi woo degbe kpasɛ̃i Ilaaɔ̃ ŋau do yaase bɛi á ce ku da nŋa Jesu si awɔ. 5Ŋɔi inɔ nŋa í dɔ̃ nɔ à ni aŋa aa muaa fia. 6Nɔ Zudasi í jɛsi, nɔ wa dɛ kpãa bɛi á ce ku da nŋa Jesu si awɔ zamaau ku maà ti ku mà.

Jesu í jɔ̀ à ce sɔɔlui jingau

(Cɔ Matie 26:17-25; Maaku 14:12-21; Zãa 13:21-30)

7Ŋɔi ajɔi jingaui Pɛ̃ɛ hai nɛ levɛ̃ɛu í to wa si bii à ya kpa ama angudã ŋa si jingaui Iku ku kua a ceò kuweeu. 8Ŋɔi Jesu í bɛ Piɛɛ do Zãa í ni, i koo i ce sɔɔlui jingaui Iku ku kuau ka jɔɔ ŋa. 9Ŋɔi à beeɛ à ni, iwoi ì bi kaa ce sɔɔluu. 10Ŋɔi í sɔ̃ ŋa í ni, bii ì lɔ inɔ iluu ŋa aa yɛ mɔkɔ gɔ wa so inyi jɔlɔ. I tooɛ. Mɔkɔu á koo ku lɔ kpasɛ̃ gɔ. Kpasɛ̃ bii á lɔu 11i koo i sɔ̃ ilu kpasɛ̃u i ni ŋa, Mɛɛtu í ni ka beeɛ ile bii nŋu á jɛ jingaui Iku ku kua do mɔcɔi nŋu ŋa. 12Mɔkɔu á bɔò ŋɛ si antaii ile kukpɛkɛ gɔ nɔ á nyisi ŋɛ ilaawa nla gɔ iyi à ce sɔɔlui fei ndɛɛ tã. Bɛi aa ce nwa sɔɔlui jingauu ŋa. 13Iyi à nɛ nɔ à koo à ba mii ŋau fei í cei dee dee si bɛi í sɔ̃ ŋau, nɔ à ce sɔɔlui jingauu.

Ijɛ iyi aa ka yeò gigii ikui Jesu

(Cɔ Matie 26:26-30; Maaku 14:22-26; Woo bɛ ŋa 11:23-25)

14Iyi waatiu í to, Jesu do mɔcɔɛ ŋau à bɔ tengi bii à ce sɔɔluu, nɔ à buba à waa jɛ. 15Ŋɔi Jesu í sɔ̃ ŋa í ni, ǹ bi ntɔ ntɔ n ce jingaui Iku ku kuau ihɛ̃i awaɛ ŋa n bɛi n yɛ ijuukpãm nɔu. 16Nɔ ntɔ ntɔ ǹ wa n sɔ̃ ŋɛi, n kaa n jɛ jingau ihɛ̃ má bii kù jɛ si bommai Ilaaɔ̃. 17Iyi í fɔ bɛɛbɛ í tã, ŋɔi í so kɔɔfu í saabu Ilaaɔ̃ nɔ í sɔ̃ mɔcɔɛ ŋa í ni, i gba vɛ̃ɛ iyi í wa si kɔɔfuu ihɛ̃ i mɔ iŋɛ fei. 18Amma ǹ wa n sɔ̃ ŋɛi, hai nsɛi amu n kaa n mɔ vɛ̃ɛ má hee andunya titɔ̃i Ilaaɔ̃ koo toò wa. 19Si anyii nŋu, í so pɛ̃ɛ nɔ í saabu Ilaaɔ̃ titã í bɛi í bububuɛ, nɔ í na ŋa í ni, iyi ihɛ̃i í jɛ aram [iyi ǹ na na iri nŋɛ. I ya coo ŋa i maa yeò gigim. 20Iyi à jɛ à tã ŋɔi í so kɔɔfu má í na ŋa í ni, kɔɔfuu ihɛ̃i í jɛ nyindai akabuu titɔ̃ iyi Ilaaɔ̃ í dĩ do njɛm iyi á nikã na iri nŋɛ si ikum.]

21Amma i cɔ, inɛ iyi á zambam nɔu wee í wa ihɛ̃ awaò à waa jɛ. 22Amu Amai Amanɛ an ku si bɛi Ilaaɔ̃ í jilɔɔ. Amma ijuukpãi inɛ iyi á zambam nɔu á la. 23Ŋɔi à sinti ku bee njɛ à waa ni, yooi á yɔkɔ ku ce dimiɛ si inɔ nwa.

Yooi í jɛ inɛ ngbo

24Ŋɔi kakɔɔ í dede si aninii mɔcɔ ŋau, à waa bee njɛ inɛ iyi á jɛ inɛ ngbo si inɔ nŋa. 25Ŋɔi Jesu í sɔ̃ ŋa í ni, amanlui andunya ŋa à ya maa taa inɛ ŋa amanlu ku jɛi, nɔ inɛ ngbo ŋa iyi à waa nyisi gbugbã nŋa à ya bi a kpe aŋa woo ce jiida ŋa. 26Amma iŋɛ i maà yɛ bɛɛbɛ ŋa. I jɔ̀ inɛ iyi í la í re si inɔ nŋɛ ku baa ku jɛ keeke nŋɛ, nɔ inɛ iyi í jɛ inɛ ngbo kú jɛ amaacɛ nŋɛ. 27Inɛ iyi í buba wa jɛ si antaii taabu do inɛ iyi wa naaò ijɛu wa, yoo nŋai í re. Kù jɛ inɛ iyi wa jɛui? To, amu wee ǹ wa inɔ nŋɛi bɛi inɛ iyi wa naaò ijɛu wa.

28Iŋɛi ì temua do amu si wahalam ŋau ŋa. 29Na nŋu, si bɛi Baaba í jilɛɛm bommau, bɛɛbɛ mɔi amu mɔ ǹ wa n jilɛ nŋɛ 30ku ba i jɛ nɔ i mɔ do amu si bommam ŋa, nɔ i buba si batai amanlu ŋa i kiitiò dimi maateejii Izirɛli ŋau.

Jesu wa fɔ iyi Piɛɛ á jã ku ni kù mà nŋu

(Cɔ Matie 26:31-35; Maaku 14:27-31; Zãa 13:36-38)

31Ŋɔi Jesu í ni, Simɔɔ, Simɔɔ, Seetam í tɔɔ kpãa ku ba ku fɛɛ bɛi iya. 32Amma amu ǹ ce kutɔɔ na iriɛ ku ba naanɛ ku dasiɛ ku maà gaizia. Nɔ awɔ, waati iyi aa kpaasi idɔ má, mua kpaasiɛ ŋa mɔ gbugbã. 33Ŋɔi Piɛɛ í ni, Lafɛ̃ɛ, ǹ tã sɔɔlu awaɛ ka bɔ piisɔ̃ɔ, bii iku mɔi ka ku ajɔ. 34Ŋɔi Jesu í ni, Piɛɛ, ǹ wa n sɔ̃ɛi, idũuyi mɔm, hee ajɛɛ ku maa kɔ, aa jã isɛ gbɛɛta i ni i kù màm.

Taalili do bɔgɔ do taakuba

35Si anyii nŋu ŋɔi Jesu í bee ŋa í ni, si waati iyi ǹ bɛ ŋɛ hai mu taalili do bɔgɔ do baata ì kua ngɔgɔ ŋa? Ŋɔi à jɛ à ni, aawo, a kù kua nkãma. 36Ŋɔi í ni, to, nsɛi, kù jɛ bɛɛbɛ má. Inɛ iyi í nɛ taalili ku soo, bɛɛbɛ mɔi inɛ iyi í nɛ bɔgɔ ku soo. Inɛ mɔ iyi kù nɛ taakuba, ku ta ibɔɛ ku raò. 37Si anyii nŋu má, í sɔ̃ ŋa í ni, ideu ihɛ̃ iyi à kɔ na irim nɔu á cei, si bɛi à ni, à dooaɛ si woo ce laalɔ ŋa.#22:37 Cɔ Ezai 53:12. Kù nɔ kù nɛ bɛi á ce iyi kù ce bɛɛbɛ. 38Ŋɔi mɔcɔ ŋau à ni, Lafɛ̃ɛ, taakuba minji gɔ wee. Nɔ í ni, ka jɔ̀ ide nŋu bɛ.

Jesu wa ce kutɔɔ si geetei Olivie

(Cɔ Matie 26:36-46; Maaku 14:32-42)

39Iyi Jesu í fɔ bɛɛbɛ í tã nɔ í fita hai inɔ iluu í bɔ geetei Olivie si bɛi í nɛ dɔ̃ɔnɛɛ. Nɔ mɔcɔɛ ŋa à waa tooɛ. 40Iyi à to inyau, ŋɔi í sɔ̃ ŋa í ni, i ce kutɔɔ ŋa ku ba i maà dási kulɛlɛ ŋa. 41Si anyii nŋu nɔ í sɛkɛɛ í jɔ̀ ŋa zakai kujĩi kutai awɔ nɔ í gulɛ bɛ wa ce kutɔɔ 42wa ni, Baaba, bii ì bi, aa jɔ̀ wahalau ihɛ̃ ku jĩim. Amma ku maà ti ku jɛ ti idɔɔbim, jɔ̀ idɔɔbiɛ ku ce. [ 43Ŋɔi amaleka gɔ í naa siɛ wa hai lele í naa í muaa gbugbã. 44Si inɔ kufɔ nla nlau wa ce kutɔɔui do gbugbã, nɔ í da koko hee wa tontoo ilɛ. Koko iyi í dau í yɛi bɛi njɛ.]

45Iyi í ce kutɔɔu í tã ŋɔi í dede í bɔ bi mɔcɔɛ ŋau nɔ í koo í ba à waa sĩ njoo do inɔ kufɔ. 46Nɔ í bee ŋa í ni, na mii í ce ì waa sĩ njoo ŋa. I dede i ce kutɔɔ ŋa ku ba i maà dasi kulɛlɛ ŋa.

À mu Jesu

(Cɔ Matie 26:47-56; Maaku 14:43-50; Zãa 18:3-11)

47Iyi Jesu wa fɔ bɛɛbɛ gbakã ŋɔi Zudasi inɛ akãi mɔcɔ maateeji ŋau í to wa do zamaa gɔ. Iyi í to wa í naa wa baabaa Jesu. 48Ŋɔi Jesu í ni, Zudasi, do dimii fɔɔ bɛ ihɛ̃i aa zambaò amu Amai Amanɛ?

49Inɛ ŋa iyi à waa too Jesuu, iyi à yɛ mii iyi wa ce, ŋɔi à bee Jesu à ni, Lafɛ̃ɛ, ka da ŋa do taakubau? 50Ŋɔi inɛ akã nŋa í cafe itĩ njɛi amaacɛi woo wee nlai Ilaaɔ̃u í buu. 51Amma Jesu í ni, i leekĩ, i to bɛɛbɛ. Nɔ í lu itĩi mɔkɔu nɔ í ba iri.

52Si anyii nŋu Jesu í bee inɛ ngboi woo weei Ilaaɔ̃ ŋa do inɛ ngboi woo degbe kpasɛ̃i Ilaaɔ̃ ŋau do inɛ ngboi Zuifu ŋa iyi à naa siɛu í ni, amui ì naa ku mu ŋa do taakuba do golo ŋa bɛi woo ce ile? 53Ajɔ fei ǹ ya n wa si inɔ nŋɛ si inɔ kpasɛ̃i Ilaaɔ̃, nɔ i kù mum ŋa. Amma waatiu ihɛ̃i í jɛ tu ŋɛ do gbugbãi ilu kuku.

Piɛɛ í jã í ni nŋu kù mà Jesu

(Cɔ Matie 26:57-58, 69-75; Maaku 14:53-54, 66-72; Zãa 18:12-18, 25-27)

54Iyi inɛ ŋau à mu Jesu, ŋɔi à bɔòɛ kpasɛ̃i woo wee nlai Ilaaɔ̃u. Nɔ Piɛɛ í wa hee jĩijĩ wa too ŋa wa do anyi. 55Ŋɔi inɛ ŋa à ko ina si aninii bantumai kpasɛ̃u à waa buba bɛ. Nɔ Piɛɛ mɔ í koo í buba bi tu ŋa bɛ. 56Ŋɔi inaabo woo ce icɛ gɔ í yɔɔ wa buba kɔkɔi inau nɔ í kãsiɛ iju í ni, inɛɛu ihɛ̃ mɔ í tako í wa bi Jesu wo. 57Amma í jã í ni, abooyi, n kù màa. 58Iyi í ce sãa má ŋɔi inɛ gɔ í yɔɔ nɔ í ni, awɔ mɔ inɛ akãi inɛ ŋaui. Amma Piɛɛ í ni, mɔkɔɔyi, n kù jɛ inɛ nŋa. 59Si anyii nŋu zakai isɔ akã má, ŋɔi inɛ gɔ í fɔ do gbugbã í ni, ntɔ ntɔ, mɔkɔu ihɛ̃ mɔ í ya wa bi Jesu wo domi nŋu mɔ inɛi Galileei. 60Amma Piɛɛ í ni, awɔ bɛ, n kù mà bɛi ì waa bi i fɔ.

Si bɛi wa fɔ ideu gbakã ŋɔi ajɛɛ wa kɔ. 61Nɔ Jesu í sinda í cɔ Piɛɛ. Ŋɔi Piɛɛ í ye gigii ide iyi Lafɛ̃ɛ í sɔ̃ɔu wo í ni, nnyi hee ajɛɛ ku maa kɔ aa jã isɛ gbɛɛta i ni i kù màm. 62Ŋɔi í fita waduude í koo wa kpata do inɔ kufɔ.

Inɛ ŋa à yaako Jesu

(Cɔ Matie 26:67-68; Maaku 14:65)

63Inɛ ŋa iyi à mu Jesuu à waa buu nɔ à wasi ku cãa. 64À bii wajuɛ à bɛi à beeɛ à waa ni, ce walii. Yooi í cãɛ. 65Nɔ à buu dimii arabu ikã ikã fei.

Jesu í wa wajui igbɛi woo kiiti ŋa

(Cɔ Matie 26:59-66; Maaku 14:55-64; Zãa 18:19-24)

66Iyi iju í má ŋɔi igbɛi inɛ ngboi Zuifu ŋau à tɔtɔɔ nɔ inɛ ngboi woo weei Ilaaɔ̃ ŋau do woo kɔ inɛ ŋa si wooda ŋau à bɔò Jesu bi igbɛi woo kiiti ŋa. 67Nɔ à beeɛ à ni, sɔ̃ wa bii awɔi ì jɛ inɛ iyi Ilaaɔ̃ í cicau. Ŋɔi Jesu í jɛ nŋa í ni, baa bii ǹ sɔ̃ ŋɛ i kaa dasi naanɛ ŋa. 68Nɔ bii ǹ bee ŋɛ ide gɔ i kaa jɛɛm ŋa. 69Amma hai nsɛi amu Amai Amanɛ an bubai si awɔ njɛi Ilaaɔ̃ ilu gbugbã. 70Ŋɔi aŋa fei à ni, debɛi, awɔ Amai Ilaaɔ̃i? Ŋɔi í jɛ nŋa í ni, iŋɛi ì fɔɔ ŋa. 71Ŋɔi à ni, sɛɛda yoomai à waa degbe má. Awa taka nwa à gbɔɔ tã hai si gɛlɛɛ.

Currently Selected:

Luku 22: MKL

Highlight

Copy