Luku 14

Jesu í jɔ̀ bɔ̃ɔ gɔ í ba iri

1Si ajɔi kusĩmi gɔ Jesu í bɔ ku jɛ kpasɛ̃i inɛ ngboi Farisi gɔ. Wee inɛ gɔ ŋa mɔ à wa bɛ, à waa cɔɔ do laakai. 2Mɔkɔ gɔ í wa bɛ, wa leekĩ wajui Jesu. Mɔkɔu wa ce bɔ̃ɔi ara ku wu. 3Ŋɔi Jesu í bee woo kɔ inɛ ŋa si wooda do Farisi ŋau í ni, wooda í wɛɛ a jɔ̀ inɛ gɔ ku ba iri si ajɔi kusĩmi? Mà kù wɛɛ. 4Ŋɔi à coko. Nɔ í lesi awɔɛ si bɔ̃ɔu í jɔ̀ inɛɛu í ba iri nɔ í ni ku nɛ. 5Nɔ í bee ŋa í ni, yoo nŋɛi, bii amaɛ walakɔ bii kɛtɛɛ í dasi lɔgɔ, kaa nyaa gbakã baa bii í jɛ ajɔi kusĩmii. 6Ŋɔi a kù yɔkɔ a kù jɛaa ideu.

Tengi bii í jɔ i buba bii à kpeɛ ku jɛ

7Iyi Jesu í ce laakai í yɛ inɛ ŋa iyi à kpe ku jɛ ŋau à wasi ku cica kitãi waju ŋa iyi à nɛ bɛɛrɛ ŋau nɔ í sɔ̃ ŋa í ni, 8bii à kpeɛ bi ku ce abɔdɔ̃, maà buba si kitãi waju ilu bɛɛrɛ ŋau. Á yɔkɔ ku jɛ à kpe inɛ gɔ iyi í reɛ do bɛɛrɛ. 9Nɔ inɛ iyi í kpe iŋɛ feiu á na ku ni, dede i mua mɔkɔu ihɛ̃ kitãu bɛ. Waati bɛɛbɛi aa dede do anyɔ i koo i buba si kitãi anyi ihɔ̃. 10Amma bii à kpeɛ ku jɛ, koo buba si kitãi anyi ku ba bii inɛ iyi í kpeɛu í to wa ku ni, baakɔɔm, dede i naa wa waju. Waati bɛɛbɛi aa jɛ ilu bɛɛrɛ nla si wajui inɛ ŋa iyi iŋɛò ŋa ì waa buba ŋau fei. 11Ntɔ ntɔ inɛ iyi í so araɛ lele à ya kayeɛi. Inɛ mɔ iyi í kaye araɛ à ya soo lelei.

12Nɔ Jesu í sɔ̃ inɛ iyi í kpoo ku jɛu mɔ í ni, bii ì waa kpe inɛ ŋa ku jɛ walakɔ jingau, maà ti i kpe kpaasiɛ ŋa, walakɔ igbãɛ do ifɔɛ ŋa, walakɔ nyaanzeɛ ŋa, walakɔ kpaasi ilu fiaɛ ŋa, ku ba aŋa mɔ a maà kpeɛ a sã gbese. 13Amma bii ì waa kpe inɛ ŋa ku jɛ, kpe ilu are ŋa, do wɛɛgɛ ŋa, do ilu kutɛ akã ŋa do fɛɛju ŋa. 14Bii ì ce bɛɛbɛ aa jɛ ilu inɔ didɔ̃ si na iyi í jɔ̀ inɛ nŋu ŋau a kaa ba ngɔgɔ iyi aa sãɛò gbese. Ilaaɔ̃i á sãɛ gbese si waati iyi inɛ dee dee ŋa aa jĩ hai si balɛ.

Mɔndai ijɛ nla

(Cɔ Matie 22:1-10)

15Iyi à gbɔ ideu, ŋɔi inɛ akãi inɛ ŋa iyi aŋaò ŋa à waa jɛu í sɔ̃ Jesu í ni, debɛi ilu inɔ didɔ̃i inɛ iyi á jɛ si bommai Ilaaɔ̃. 16Ŋɔi Jesu í kpa nŋa mɔnda í ni, mɔkɔ gɔ í ce ijɛ nla nla nɔ í kpe inɛ nkpɔ. 17Iyi awaatii kujɛu í to ŋɔi í bɛ woo ce icɛɛ koo sɔ̃ inɛ ŋa iyi í kpeu ku ni, i naa wa ŋa, domi sɔnda fei í jĩa tã. 18Amma aŋa fei à lɔsi gaafara ku tɔɔ. Inɛ sinteu í ni, ǹ ra iko, tilasi, í gbe n koo n cɔɔ. Ǹ wa n tɔɔɛ ku ceem suuru. 19Inɛ mmu mɔ í ni, ǹ ra kɛtɛ ku logoo ŋai kɔ̃ɔ miiu, nɔ ǹ wa n bi n dĩ nŋa n ceò icɛ n cɔ. Ǹ wa n tɔɔɛ ku ceem suuru. 20Nɔ inɛ mmu gɔ mɔ í ni má, nsɛii ǹ so abo. Na ŋɔi í jɔ̀ n kaa n ba n naa.

21Ŋɔi woo ce icɛu í sinda í koo í sɔ̃ lafɛ̃ɛɛ gaafara iyi inɛ ŋau fei à tɔɔ. Ŋɔi idɔi lafɛ̃ɛu í kɔ̃, nɔ í sɔ̃ woo ce icɛɛu í ni, koo i bɔ si bantuma ŋa nsɛi nsɛi do si kpãai inɔ iluu, kpeem ilu are ŋa wa do wɛɛgɛ ŋa do fɛɛju ŋa do ilu kutɛ akã ŋa. 22Ŋɔi woo ce icɛu í koo. Iyi í baa nɔ í ni, lafɛ̃ɛ, iyi ì dasim nɔu ǹ coo tã. Wee inya í gbe má. 23Ŋɔi lafɛ̃ɛu í sɔ̃ɔ má í ni, bɔ si kpãai ilɛɛko ŋa do kpãai iko ŋa, jɔ̀ inɛ ŋa a lɔ wa baa do kumante, kpasɛ̃m de ku kɔ̃. 24Ntɔ ntɔ, an sɔ ŋɛ, inɛ ŋa iyi ǹ tako ǹ kpeu baa inɛ akã nŋa kaa tiɛ ijɛu ihɛ̃ má.

Mii amanɛ á ce ku bɛi ku jɛ mɔcɔi Jesu

(Cɔ Matie 10:37-38)

25Ajɔ nŋu gɔ Jesu wa nɛ nɔ zamaa nla nla gɔ wa tooɛ. Ŋɔi Jesu í sinda í sɔ̃ ŋa í ni, 26inɛ iyi í naa bi tom nɔ kù cé baaɛ#14:26 nɔ kù cé baaɛ Tengi ihɛ̃ Jesu wa nyisi iyi í sĩa ku bi nŋu ku re inɛ ŋa iyi à gbe fei nɔ ku maà jɔ̀ inɛ gɔ ku ganjiɛ si kpãai naanɛ ku dasi. do iyeɛ do aboɛ do amaɛ ŋa do igbãɛ ŋa do ifɔɛ ŋa do wecĩɛ ŋa do kuwɛɛi nŋu takaɛ kaa yɔkɔ kù jɛ mɔcɔm. 27Inɛ iyi kù jɛsi nŋu ku so jĩi ku gaauɛ#14:27 jĩi ku gaauɛ Inɛ ŋa iyi à kua wooda gɔ ŋa, inɛi Romu ŋa à ya kpa ŋai si jĩi ku gaau. Nɔ inɛ iyi à yɛ taaleɛu nŋui í ya so jĩi nɔu ku bɔò hee tengi bii aa kpaau. ku toom do wa kaa yɔkɔ ku jɛ mɔcɔm.

28Bii inɛ gɔ nŋɛ í bi ku ma ile á buba ku ce dooa titã ku cɔ mà fiai nŋu á to ku kpaò iriɛ. 29Bii kù jɛ bɛɛbɛ, nɔ í cɛ icui ileu, í bɛi í na í mɔngɔ ku maɛ, inɛ ŋa iyi à yɔɔ fei aa nyaanyiɛ, 30a ni, mɔkɔu ihɛ̃ í sinti ku ma nɔ wee í mɔngɔ kù kpa iriɛ.

31Bɛɛbɛ mɔi ilaalu ŋa mɔ à ya ce a bɛi a bɔ igũ. Bii ilaalu gɔ í nɛ sooge dubu mɛɛwa, nɔ í yɛ ilaalu mmu gɔ wa naa siɛ igũ do sooge dubu kɔnfia, á dedei gbakã ku ce igũ? Aawo, á bubai titã ku lasabu ku cɔ mà nŋu á yɔkɔ ku kãmiaɛ. 32Bii í yɛ iyi nŋu kaa nɔɔ, á bɛ inɛ ŋai bi ilaalu iyi ihɔ̃u hai waati iyi kù to wa titã ku ba aŋaò a gbɔsi njɛ nɔ laakai ku sũ ku wa anini nŋa.

33Na ŋɔi í ce awɔ iyi i kù jɔ̀ mii iyi ì nɛ fei, i kaa yɔkɔ í jɛ mɔcɔm.

Imu iyi í ku

(Cɔ Matie 5:13; Maaku 9:50)

34Nɔ Jesu í ni má, imu mii ncɛɛi, amma bii didɔ̃i imu í ku, mii aa dasi a jɔ̀ ku dɔ̃ má. 35Kaa ce bukaata kãma má nɔ baa bii ikoi kaa ce taasi. À ya dikãɛi waduude.

Inɛ iyi í nɛ itĩ iyi á gbɔò ide, ku gbɔ.

Currently Selected:

Luku 14: MKL

Highlight

Copy