Luku 13

Bii i kù kpaasi idɔ aa ku

1Waati bɛɛbɛ, inɛ gɔ ŋa iyi à wa bɛ à waa sisia Jesu mii iyi í ba inɛi Galilee gɔ ŋa, inɛ ŋa iyi Pilati í jɔ̀ à kpa si waati iyi à naa ku cea Ilaaɔ̃ kuwee. 2Amma Jesu í sɔ̃ ŋa í ni, iŋɛ ì waa tamaa dulum dii inɛi Galilee ŋau bɛ í re ti inɛi Galilee ŋa iyi à gbei? Ì waa tamaa dulum du ŋai í jɔ̀ à kpa ŋa bɛɛbɛ ŋa? 3Aawo. Bɛɛbɛ mɔi ǹ wa n sɔ̃ ŋɛ, iŋɛ taka nŋɛ, bii i kù sinda idɔ ŋa, iŋɛ fei aa kui bɛi aŋa mɔ. 4Ì waa ye gigii amanɛ maatũ do mɛɛta ŋa iyi ile kugbokai Siloe í cuku í bata í kpau ŋa? Debɛi, ì waa tamaa kurara nŋai í re ti inɛi Zeruzalɛmu ŋa iyi à gbe fei ŋa? 5Aawo, ǹ wa n sɔ̃ ŋɛi, iŋɛ taka nŋɛ, bii i kù kpaasi idɔ ŋa, iŋɛ fei aa kui bɛi aŋa mɔ.

Mɔndai jĩi iyi ci ya so

6Ŋɔi í kpa nŋa mɔndau ihɛ̃ má í ni, mɔkɔ gɔ í lɔ jĩi ndii figi si kaaɛ. Waati iyi jĩi nɔu í la ŋɔi mɔkɔu í bɔ isoɛ ku ka, nɔ kù ba. 7Ŋɔi í sɔ̃ woo ce icɛɛ í ni, adɔ̃ mɛɛta wai ihɛ̃ bɛbɛi iyi bii ǹ naa isoi jĩi nɔu ihɛ̃ ku ka n ci ya n ba. Daa i nyɔɔ. Na mii í ce á maa gba nwa inya ngbɛ ngbɛ. 8Ŋɔi woo ce icɛu í sɔ̃ɔ í ni, lafɛ̃ɛ, jɔ̀ɔ adɔ̃ɔyi titã ka cɔ. An tu fitiɛ n kaakoɛ, nɔ n daa si taasi. 9Á yɔkɔ ku jɛ adɔ̃ gɔ á so. Bii kù so i bɛi i daa.

Jesu í jɔ̀ abo gɔ í ba iri si ajɔi kusĩmi*

10Si ajɔi kusĩmi gɔ, Jesu wa kɔ inɛ ŋa si cioi idei Ilaaɔ̃ ile gɔ bii Zuifu ŋa à ya ce kutɔtɔɔ. 11Wee abo gɔ mɔ í wa bɛ iyi inɛi inɔɔko í jɔ̀ í ce bɔ̃ɔ bɛi zakai adɔ̃ maatũ do mɛɛta. Í ya maa batei, ci ya yɔkɔ ku tɛ araɛ baa keeke. 12Iyi Jesu í yɔɔ ŋɔi í kpoo í ni, abooyi, í ba iri mbɛ. 13Nɔ í le siɛ awɔ. Ŋɔi gbakã í tɛ araɛ nɔ í lɔsi Ilaaɔ̃ ku saabu. 14Amma idɔi inɛ ngboi ile bii à ya ce kutɔtɔɔu í kɔ̃ si na iyi í jɔ̀ Jesu í jɔ̀ inɛ gɔ í ba iri si ajɔi kusĩmi, nɔ í sɔ̃ zamaau í ni, ajɔ mɛɛfai í wɛɛ iyi aa yɔkɔ i ce icɛ ŋa. I naa wa waati bɛɛbɛ ku ba i ba iri ŋa, ku maà ti ku jɛ si ajɔi kusĩmi. 15Ŋɔi Lafɛ̃ɛ í jɛaa í ni, iŋɛ ilu muafiti ŋai, iŋɛ fei i ci ya fũ kɛtɛ nŋɛ ŋa do gbankɛlɛ nŋɛ ŋa a koo a mɔ inyi si ajɔi kusĩmi? 16Abou ihɛ̃ mɔ dimii Aburahamui. Nɔ wee Seetam wa dũu hai zakai adɔ̃ maatũ do mɛɛta. Kù sĩa a fũu si ajɔi kusĩmi? 17Waati iyi wa fɔ ideu bɛ, anyɔ wa mu mbɛɛɛ ŋau fei, nɔ zamaau í wɛɛ do inɔ didɔ̃ na maamaake ŋa iyi wa ce fei.

Mɔndai dimi keeke iyi à ya kpe mutaadi

(Cɔ Matie 13:31-32; Maaku 4:31-32)

18Ŋɔi Jesu í ni má, mii bommai Ilaaɔ̃ í jɔ. Mii an wãa do. 19Í yɛi bɛi ngboi mutaadi iyi inɛ gɔ í so í gbɛ̃ si ilɛɛ. Nɔ í fita í ce jĩi hee yɛi ŋa à ya maa ce antɛ si amaawɔɛ ŋa.

Mɔndai levɛ̃ɛ

(Cɔ Matie 13:33)

20Ŋɔi í ni má, mii an nyi n wãò bommai Ilaaɔ̃ má. 21Bommai Ilaaɔ̃ í yɛi bɛi levɛ̃ɛ iyi abo gɔ í so í dasi iyafũi pɛ̃ɛ gũa mɛɛta, nɔ fei ndɛɛ í dede í kpante.

Andɛ iyi kù cĩ

(Cɔ Matie 7:13-14, 21-23)

22Jesu wa too si ilu nla ŋa do ilɛɛko ŋa wa kɔ inɛ ŋa si cioi idei Ilaaɔ̃ wa nɛò ikpa Zeruzalɛmu. 23Si isɛɛnɛu ŋɔi inɛ gɔ í naa bi tɛɛ nɔ í beeɛ í ni, Lafɛ̃ɛ, inɛ ŋa iyi aa ba faaba a kaa kpɔ? Ŋɔi í jɛ í ni, 24i ce kookaai i lɔ do andɛ iyi kù cĩu ŋa. Ǹ wa n sɔ̃ ŋɛi, inɛ nkpɔi á maa dɛ kpãa iyi aa lɔò a kaa nɔ a yɔkɔ.

25Waati iyi amu ilu kpasɛ̃ ǹ dede ǹ cĩmbo koofau iŋɛ aa wa waduude, i maa cã gambo ŋa i maa ni, Lafɛ̃ɛ, cĩ nwa. Nɔ an jɛ nŋɛ n ni, n kù mà hai bii ì naa ŋa. 26Waati bɛɛbɛi aa ni ŋa, à jɛ à mɔ si wajuɛ, ì nɔ ì kɔ wa si cioi idei Ilaaɔ̃ si bantumai ilu nwa ŋa. 27Nɔ an sɔ̃ ŋɛ n ni, n kù mà hai bii ì naa ŋa. I fa ara nŋɛ hai bi tom, iŋɛ fei woo ce laalɔ ŋai. 28Ajɔ wa naa iyi aa yɛ Aburahamu do Izaaki do Zakɔbu do walii ŋau fei si andunya titɔ̃i Ilaaɔ̃ nɔ iŋɛ i ba wee à nyɔ ŋɛ waduude. Tengi bɛi aa so awɔ i lesi iri i kpataò ŋa. 29Nɔ inɛ gɔ ŋa aa naa hai nunui daakɔ do hai nunui alɛ do hai nunu gaa cingaa minjiu nɔ aa buba a jɛ si bommai Ilaaɔ̃. 30Waati bɛɛbɛ inɛi anyi gɔ ŋa aa na a jɛ inɛi waju ŋa, inɛi waju gɔ ŋa mɔ aa na a jɛ inɛi anyi ŋa.

Jesu í kpata na Zeruzalɛmu*

(Cɔ Matie 23:37-39)

31Waati nŋu, Farisi gɔ ŋa à naa à sɔ̃ Jesu à ni, koo, fita hai ihɛ̃ domi Herodu wa bi ku kpaɛi. 32Ŋɔi í jɛ nŋa í ni, i koo i sɔ̃ Herodu, ilu bisi laalɔu bɛ i ni, wee nnyi do ala ǹ wa n lele inɛi inɔɔko ŋa nɔ ǹ jɔ̀ inɛ ŋa à waa ba iri, nɔ si ajɔ mɛɛtasia an koo n tambɔ icɛm. 33Amma kù nɛ bɛi an ce iyi n kù ce isɛɛnɛm nnyi do ala do ala akã, domi a kaa kpa walii kãma bii gɔ bii kù jɛ Zeruzalɛmu.

34Iŋɛ inɛi Zeruzalɛmu ŋa, iŋɛ iyi ì ya kpa walii ŋa, nɔ i ta ama abɛi Ilaaɔ̃ ŋa mɔ kuta i kpa ŋa ŋa, isɛ fɛloi ǹ ya n bi n tɔtɔɔ ŋɛ si abɛm bɛi ajɛɛ í ya tɔtɔɔ amaɛ ŋa si ikpaɛ, amma i kù jɛ ŋa. 35Wee nsɛi Ilaaɔ̃ á fũ nŋɛ kpasɛ̃ nŋɛ si awɔ. Amma an sɔ̃ ŋɛ, hai nsɛi i kaa yɛm má ŋa í gbe hee ajɔ iyi aa ni ŋa, Ilaaɔ̃ ku weea inɛ iyi wa naa do irii Lafɛ̃ɛ.#13:35 Cɔ Iri ku kɔ̃ 118:26.

Currently Selected:

Luku 13: MKL

Highlight

Copy