Zãa 12

Maari í fãsi tuae si isɛi Jesu

(Cɔ Matie 26:6-13; Maaku 14:3-9)

1Si ajɔ mɛɛfa iyi í gbe jingaui Iku ku kuau ku bɛi ku to wa, ŋɔi Jesu í bɔ Betani. Bɛi Lazaa inɛ iyi Jesu í jĩ hai si balɛu í wa. 2Ilu bɛi à cea Jesu ijɛ wa jɛ. Maata wa gbɔ nŋa nɔ Lazaa í wa si inɔ nŋa. 3Wee Maari í nɛ tuaei fia nkpɔ gɔ iyi à ce do ikpoi naadi#12:3 Ikpoi naadi Tuae iyi à ce do icãi jĩi ndii naadii. À naaò tuaeu wa si ilɛi Zudeei hai ilɛi Ɛndi. alala, zakai bubui liiti. Ŋɔi í koo í soo í naa í fãsi isɛi Jesu, nɔ í gbãa do ntoi iriɛ. Ŋɔi inunui tuaeu í gba kpasɛ̃u fei.

4Ŋɔi inɛ akãi mɔcɔi Jesu ŋau iyi à ya kpe Zudasi Isikariɔti inɛ iyi á zambaɛu í ni, 5fiai tuaeu ihɛ̃ á yɔkɔ ku to fiai icɛi adɔ̃ akã. Na mii í jɔ̀ a kù taa ka kpɛ̃a ilu are ŋa fiau. 6Iyi wa fɔ bɛɛbɛ kù jɛ wa ce araarei ilu are ŋau fa, amma si na iyi í jɔ̀ í jɛ ile dei. Nŋui í ya maa mu bɔgɔi fia nŋau, nɔ í ya maa ce ilei fia iyi à ya dasiu. 7Amma Jesu í ni, jɔ̀ abou si laakaiɛ. Amui í jilɛa ku ba ku fãsim a bɛi a sim. 8Waati kãma fei aa nɛ ilu are ŋa si inɔ nŋɛ, amma amu i kaa nɛm do ajɔ fei ŋa.

À waa dɛ kpãa a kpa Lazaa

9 Zuifu nkpɔ í gbɔ iyi Jesu í wa Betani, nɔ à bɔ bɛ. Kù jɛ na Jesu nŋu akã, amma à waa bi à yɛ Lazaa iyi Jesu í jĩ hai si balɛu. 10Inɛ ngboi woo weei Ilaaɔ̃ ŋau à waa busi njɛ a ba a kpa Lazaa mɔ, 11domi na iriɛi Zuifu nkpɔ gɔ ŋa à fita hai bi tu ŋa à dasi Jesu naanɛ.

Jesu wa lɔ inɔ ilu Zeruzalɛmu*

(Cɔ Matie 21:1-11; Maaku 11:1-11; Luku 19:28-40)

12Iju kumáɛ ŋɔi zamaa iyi í naa jingauu í gbɔ iyi Jesu wa naa Zeruzalɛmu. 13Ŋɔi à so wuai kpakpa à waa bɔ ku koɛ. À dɔ̃ anu hee lele à waa ni, à waa saabuɛ. Aɔ̃ Lafɛ̃ɛ ku weeɛ, awɔ iyi ì waa naa do iriɛ.#12:13 Cɔ Iri ku kɔ̃ 118:26. Ilaaɔ̃ ku weeɛ, awɔ ilaalui Izirɛli. 14Jesu wee í ba ama gbankɛlɛ gɔ wa gũ. Bɛɛbɛi í ce si bɛi kukɔi idei Ilaaɔ̃ wa fɔ í ni,

15I maà ce njo, iŋɛ inɛi Siɔ̃ɔ ŋa.

I cɔ ilaalu nŋɛ í gũ ama gbankɛlɛ, wa naa.#12:15 Cɔ Zakari 9:9.

16Ide ŋau bɛ mɔcɔi Jesu ŋau a kù gbɔ yaaseɛ waati bɛɛbɛ, amma waati iyi í nyi lelei Aɔ̃ do amboeɛ, à ye gigi iyi mii ŋau fei à kɔɔ si kukɔi idei Ilaaɔ̃ na iriɛ, à nɔ à ceaa fei ndɛɛ.

17Inɛ ŋa iyi à wa inya akã do Jesu waati iyi í kpe Lazaa í jũu hai si balɛu, aŋa fei à waa sisia inɛ ŋa mii iyi Jesu í ce. 18Ŋɔi í jɔ̀ zamaau fei í bɔ ku koɛ bɛɛbɛ domi à gbɔ baaui maamaake iyi í ceu. 19Na nŋu, Farisi ŋau à fɔ aŋa duusɔ̃ɔ à waa ni, i kù yɛ à mɔngɔ inɛɛu ihɛ̃i mam mam? Wee inɛ fei í koo wa tooɛ.

Gɛrɛki gɔ ŋa à waa dɛ Jesu

20Wee Gɛrɛki gɔ ŋa à wa si inɔi inɛ ŋa iyi à naa Zeruzalɛmu Ilaaɔ̃ ku gulɛa waatii jingauu. 21Ŋɔi à bɔ bi Filipu inɛi Bɛsaida si ilɛi Galileeu, à ni, mɔkɔɔyi, à waa bi Jesu ku yɛ.

22Ŋɔi Filipu í koo í sɔ̃ Anderee, nɔ Anderee do Filipu à koo à sɔ̃ Jesu. 23Ŋɔi Jesu í sɔ̃ ŋa í ni, awaati í to mbɛ bɛi bii inɛ ŋa aa yɛ amboei amu Amai Amanɛ. 24Ntɔ ntɔ ǹ wa n sɔ̃ ŋɛi, bii ijui iya kù cuku si ilɛ kù ku, nŋu akãi á maa wɛɛ. Amma bii í ku á bí iju nkpɔ nkpɔ. 25Inɛ iyi í bi kuwɛɛɛ á na ku kuaɛ. Inɛ mɔ iyi kù saalu kuwɛɛɛ ngɔgɔ, sɔɔlui kuwɛɛ hai tãi lafɛ̃ɛ wa ce. 26Inɛ iyi í wɛɛ na irim ku toom wa. Nɔ bii ǹ wa, bɛi lafɛ̃ɛ mɔ á wa. Bii inɛ gɔ í wɛɛ na irim, Baam á cea lafɛ̃ɛ bɛɛrɛ.

Jesu wa fɔ idei ikuɛ

27Ŋɔi Jesu í ni, nsɛi inɔm í fɔ jiida jiida. N kù mà baa bɛirei an fɔ. Mà n tɔɔ Baaba ku nyam si wahala iyi á bam nsɛiu ihɛ̃i ya. Aawo, n kaa n ce bɛɛbɛ domi na nŋui í jɔ̀ ǹ naa. 28Baaba, jɔ̀ bɛɛrɛi awɔ takaɛ ku kɔ̃ɔsi. Iyi Jesu í fɔ bɛɛbɛ ŋɔi à gbɔ ide ku fɔ gɔ wa hai lele í ni, ǹ nɛ bɛɛrɛ tã nɔ an jɔ̀ ku kɔ̃ɔsi má. 29Iyi inɛ ŋa iyi à wa bɛu à gbɔ ide ku fɔu, ŋɔi à ni, kulai ijĩi. Ŋɔi inɛ gɔ ŋa mɔ à ni, amaleka gɔi wa baa ide ku fɔ.

30Nɔ Jesu í sɔ̃ ŋa í ni, kù jɛ na irim nii à gbɔ ide ku fɔu bɛ, amma na iri nŋɛi. 31Nsɛi ajɔ í to wa mbɛ si bii Ilaaɔ̃ á kiiti inɛi andunya ŋa. Bɛbɛii aa lele Seetam ilaalui andunyau. 32Waati iyi aa som hai ilɛ a kɔam lele, waati bɛɛbɛi an fa inɛ fei wa bi tom. 33Si ideu bɛ Jesu wa sisi yaase bɛi nŋu á kuòi. 34Ŋɔi zamaau í sɔ̃ɔ í ni, à gbɔ si tiai wooda nwa ŋa iyi inɛ iyi Ilaaɔ̃ í cicau á maa wɛɛi hee do ajɔ fei. Bɛirei í ce ì waa ni kù nɛ bɛi á ce iyi a kù so Amai Amanɛ hai ilɛ a kɔaɛ lele. Yooi í jɛ Amai Amanɛu.

35Ŋɔi Jesu í sɔ̃ ŋa í ni, í gbe keeke iyi inya kumá kaa wa anini nŋɛ má. Í sĩa i ya maa nɛ si waati iyi ì nɛ inya kumáu ŋa ku ba ilu kuku ku maà na ku boe ŋɛ, domi inɛ iyi wa nɛ si ilu kuku ci ya mà bii wa bɔ. 36Na nŋu, i dasi inya kumáu naanɛ waati iyi ì nɔɔ ŋa ku ba i jɛ amai inya kumá ŋa.

Zuifu* ŋa a kù dasi Jesu naanɛ

Iyi Jesu í fɔ bɛɛbɛ í tã ŋɔi í dede hai inɔ nŋa í nɛ í koo í manji. 37Baa do iyi í ce maamaake nkpɔ fei si waju nŋa a kù dasiɛ naanɛ. 38Bɛɛbɛi ide iyi walii Ezai í fɔu í ce. Í ni,

Lafɛ̃ɛ, yooi í dasi waazo nwa naanɛ.

Mà bi yooi Lafɛ̃ɛ í nyisi gbugbãɛ.#12:38 Cɔ Ezai 53:1.

39-40Walii Ezai í fɔ má í ni,

Ilaaɔ̃ í fɛɛju ŋa,

Ku ba a maà yɛ ilu.

Nɔ í jɔ̀ idɔ nŋa í le

Ku ba a maà mà do bisi nŋa.

Í ce bɛɛbɛi ku ba a maà na a kpaasi idɔ nɔ nŋu ku jɔ̀ a ba iri.#12:39-40 Cɔ Ezai 6:10.

Ŋɔi í jɔ̀ a kù yɔkɔ a kù dasi naanɛ. 41Ezai í fɔ bɛɛbɛi si na iyi í jɔ̀ í yɛ amboei Jesu nɔ í fɔ ide na iriɛ.

42Do nŋu fei, baa inɛ ngboi Zuifu ŋau nkpɔ í dasi Jesu naanɛ. Amma si bɛi à waa ce njoi Farisi ŋau a kù jɛsi si bantuma ku ba a maà na a ganji ŋa ile bii à ya ce kutɔtɔɔ ŋau ku bɔ má. 43A kù waa bi a lele aŋa hai bɛi si na iyi í jɔ̀ saabui amanɛ ŋai à bi í re ti Ilaaɔ̃.

Idei Jesui á yɛ taalei inɛ ŋa

44Ŋɔi Jesu í fɔ ide hee lele í ni, inɛ iyi í dasim naanɛ, kù jɛ amu akãi í dasi naanɛ, í dasi inɛ iyi í bɛm wa mɔ naanɛi. 45Bɛɛbɛ mɔi inɛ iyi í yɛm í yɛ inɛ iyi í bɛm wai. 46Amui ǹ jɛ inya kumá, nɔ ǹ naai si andunya ku ba inɛ iyi í dasim naanɛ fei ku maà wa si ilu kuku má. 47Inɛ iyi í gbɔ idem nɔ kù waa saaluɛ, kù jɛ amui an yɛ taalei lafɛ̃ɛ. Amu ǹ naai n na n faaba inɛi andunya ŋa, n kù naa ku yɛ taale nŋa. 48Inɛ iyi í kɔ̀sim nɔ kù gba idem, í nɛ mii iyi á yɛ taalei lafɛ̃ɛi. Ide ŋa iyi ǹ fɔi á yɛ taalei lafɛ̃ɛ si ajɔi ankãanyiu. 49Ideui á yɛ taaleɛ si na iyi í jɔ̀ n kù wa n fɔ ide do yiikoi aram, amma Ilaaɔ̃ Baaba takaɛi í sɔ̃m ide ŋa iyi ǹ nɛ n fɔ. Nŋui í nɔ í bɛm wa. 50Ǹ mà iyi ide ŋa iyi í sɔ̃m ŋau kuwɛɛ hai tãi á jɛ kɔkɔɔ nŋa. Ŋɔi í jɔ̀ ide iyi ǹ wa n fɔ, ǹ wa n fɔɔi bɛi Baaba í sɔ̃m.

Currently Selected:

Zãa 12: MKL

Highlight

Copy