Kusintii Andunya 15

Akabuu iyi Ilaaɔ̃ í dĩ do Aburamu

1Si anyii nŋu bɛ nɔ Aɔ̃ Lafɛ̃ɛ í ba Aburamu ide ku fɔ si kuyɛ í ni, Aburamu, maà ce njo, amui ǹ jɛ tɛliɛ #15:1 tɛli Mii iyi woo ce igũ í ya gɛɛò afai.. Ribaɛ á la ntɔ ntɔ.

2Aburamu í jɛ í ni, Lafɛ̃ɛ, mii aa muum. Wee ǹ wɛɛ hai nɛ ama, nɔ Eliezɛɛ woo ce icɛm inɛi Damasiui á jɛ tubum. 3Í ni má, i kù muum ama. Debɛi inɛ njoo iyi à bí si kpasɛ̃m nɔu bɛ, nŋui á jɛ tubum.

4Ŋɔi Aɔ̃ Lafɛ̃ɛ í sɔ̃ Aburamu í ni, kù jɛ nŋui á jɛ tubuɛ. Amaabíi awɔ takaɛi á jɛ tubuɛ. 5Ŋɔi Aɔ̃ Lafɛ̃ɛ í bɔòɛ waduude í ni, cɔ lele nɔ i ka leleaɔ̃ ŋau bɛ, mà aa yɔkɔ. Bɛɛbɛ mɔi dimiɛ á na ku kpɔ.

6Nɔ Aburamu í dasi Aɔ̃ Lafɛ̃ɛ naanɛ, nŋui í jɔ̀ í dooɛ si inɛ dee dee.

7Ŋɔi í sɔ̃ Aburamu má í ni, amui ǹ jɛ Aɔ̃ Lafɛ̃ɛ iyi í nyaɛ hai Uu si ilɛi Kaladee ku ba n naɛ ilɛu ihɛ̃.

8Ŋɔi í jɛaa í ni, Ilaaɔ̃ Lafɛ̃ɛ, bɛirei an ce n mà iyi ilɛu ihɛ̃ á na ku jɛ titom.

9Ŋɔi Aɔ̃ Lafɛ̃ɛ í sɔ̃ɔ í ni, naaò kɛtɛ zãui adɔ̃ mɛɛta wa do iwo zãui adɔ̃ mɛɛta do angudã komboi adɔ̃ mɛɛta do kufe do ama ankasiidi. 10Ŋɔi Aburamu í tɔtɔɔ iŋa ŋau fei í kpalɔɛ minji minji í nyaa í jilɛ kpalɔɛ akã canga, kpalɔɛ akã mɔ njɛ, amma kù kpalɔɛ kufe do ankasiidiu. 11Ŋɔi yembeeku ŋa à waa desi iŋa iku ŋau wa, nɔ Aburamu í lele ŋa.

12Iyi alɛ í lɛ ŋɔi njoo nla gɔ í naa si Aburamu ŋɔi ilu í kuku siɛ nɔ njo í muu. 13Ŋɔi Aɔ̃ Lafɛ̃ɛ í sɔ̃ɔ í ni, ǹ bi i mà iyi dimii amaɛ ŋa aa na a fita a koo a buba ilɛ mmu iyi kù jɛ tu ŋa. Aa ce ŋa aru nɔ a kpã ŋa iju hee zakai adɔ̃ cĩɔ mɛɛ. 14-16Amma si anyii adɔ̃ cĩɔ mɛɛu an kpã inɛ ŋa iyi aa na a ce ŋa aruu iju nɔ a jɔ̀ ŋa a fitaò amani nla nla. Si anyii adɔ̃ cĩɔ mɛɛu aa sinda a baa ihɛ̃ má si na iyi í jɔ̀ dulum dii inɛi Amɔre ŋau kù la titã bɛi an lele ŋa hai si ilɛu iyi ǹ wãɛ do. Amma awɔ do laakai ku sũi aa jɔ̀ò andunya i koo i ba balaɛ ŋa iyi à ku. Aa gboi tɔkɔ tɔkɔ i bɛi i ku.

17Iyi inunu í lɔ idũ í dũ kiti kiti, nɔ Aburamu í yɛ icu alulu gɔ iyi í nɛ ina nyɛnyɛ nla gɔ do cua nla gɔ do amɛi ina gɔ í dede wa lɔ si afei iŋa ŋa iyi à kpalɔɛu. 18Si ajɔ nŋui Aɔ̃ Lafɛ̃ɛ í dĩ akabuu do Aburamu í ni, ilɛu ihɛ̃ dimiɛ ŋai an mua hai bi idoi Ezibitiu bɛ hee ku bɔ bi ido nla iyi à ya kpe Efarata. 19An mu nŋa ilɛi inɛi Keni ŋa do ti inɛi Kenizi ŋa do ti inɛi Kadimɔni ŋa 20do ti inɛi Hɛti ŋa do ti inɛi Ferɛzi ŋa do ti inɛi Refa ŋa 21do ti inɛi Amɔre ŋa do ti inɛi Kanaã ŋa do ti inɛi Girigasi ŋa do ti inɛi Zebusi ŋa.

Currently Selected:

Kusintii Andunya 15: MKL

Highlight

Copy