Kusintii Andunya 14

Aburamu í faaba Lɔtu

1Waati bɛɛbɛ Amurafɛli ilaalui Sineaa do Ariɔku ilaalui Elasaa do Kedɔɔlaɔmɛɛ ilaalui Elamu do Tideali ilaalui Goyimu, 2ilaalu mɛɛ ŋau bɛi à ce igũ do Bera ilaalui Sodomu do Birisa ilaalui Gomɔɔ do Sineabu ilaalui Adima do Semɛbɛɛ ilaalui Seboimu do ilaalui Bela iyi à ya kpe Soaa nsɛi. 3Inɛ miiu ŋau bɛ à tɔtɔɔ si angbɔɔ gɔ iyi à ya kpe Sidimu. Amma si nsɛi angbɔɔu mɔ í baa í jɛ Tenku ku da imu. 4Mii iyi í tale si ŋa igũu ku ce wee. Zakai adɔ̃ maateeji, bɛɛbɛi à jɛ arui Kedɔɔlaɔmɛɛ. Amma si adɔ̃ maatɛtasiaɛi inɛ ŋau à dede à kɔ̀ò ara nŋa. 5Ŋɔi si adɔ̃ maatɛ̃ɛsia, Kedɔɔlaɔmɛɛ do ilaalu ŋa iyi à wa bi tɛɛu à bɔ igũ Asiterɔti-Kaanaimu nɔ à jɛ inɛi Refa ŋa igũ, ŋɔi à bɔ Hamu nɔ à jɛ inɛi Zuzi ŋa igũ, ŋɔi à bɔ Save-Kiriataimu nɔ à jɛ inɛi Emi ŋa igũ. 6Nɔ à koo à jɛ inɛi Hɔɔ ŋa mɔ igũ ikpa iri kuta nŋa iyi à ya kpe Seii hee ku bɔ bi jĩi ndii sɛnii Parãa iyi í wa kɔkɔi gbaau. 7Si anyii nŋu nɔ à sinda wa má à bɔ Eni-Misipati iyi à ya kpe Kadɛsi má. Bɛi à koo à ce igũ do inɛi Amalɛki ŋa nɔ à kãmia ilɛi ide nŋau fei do inɛi Amɔɔ ŋa iyi à waa kɔ̃ si ilui Hasasɔ̃ɔ-Tamaa fei.

8Iyi ilaalui Sodomu do ilaalui Gomɔɔ do ilaalui Adima do ilaalui Seboimu do ilaalui Bela iyi à ya kpe Soaa nnyi à yɔɔ bɛɛbɛ, ŋɔi à dede à koo à ce igũ aŋaò ŋa si inɔ angbɔɔi Sidimuu. 9À ce igũui do Kedɔɔlaɔmɛɛ ilaalui Elamu, nŋu do Tideali ilaalui Goyimu do Amurafɛli ilaalui Sineaa do Ariɔku ilaalui Elasaa. Ilaalu mɛɛi wa ba miiu ŋau ihɛ̃ ku ja. 10Wee isai kɔntaa ŋa wa kɔ̃i si angbɔɔi Sidimuu. Ŋɔi si igũu ilaalui Sodomu do ti Gomɔɔ à waa sa nɔ à koo à dasi isa ŋau. Inɛ ŋa iyi à gbe ŋau mɔ à sa à bɔ ikpa iri kutau. 11Inɛ ŋa iyi à jɛ ŋa igũu à ko amani nŋa ŋau do ijɛ nŋa ŋa fei à nɛò. 12Nɔ à mu Lɔtu amai ifɔi Aburamu iyi í wa Sodomuu mɔ hee do andi mii iyi í nɛ fei à nɛò.

13Ŋɔi mɔkɔ gɔ í ba í sa wa nɔ í koo í sɔ̃ Aburamu inɛi Ebɛɛu laabaau. Waati bɛɛbɛ Aburamu wa bubai do ide si agboi Maree. Mareeu inɛi Amɔrei, ifɔi Esikoli do Anɛɛ, aŋa iyi à dĩ akabuu do Aburamu. 14Iyi Aburamu í gbɔ iyi à mu amai ifɔi nŋu aru, ŋɔi í cica ilu wɔɔkɔ ŋa si woo ce icɛɛ ŋa, zakai amanɛ cĩɔ mɛɛta do kɔnfia iyi minji kù wa si, inɛ ŋa iyi à bí si kpasɛ̃ɛ, nɔ í na ŋa jĩnɛi igũ ŋa nɔ à too tuubai ilaalu ŋau à bɔ hee ilui Dãa. 15Waati iyi à to bɛ, ŋɔi í ce ikpɛ̃i inɛɛ ŋa titã, à bɛi à to si ŋa idũ, nŋu do woo ce icɛɛ ŋa. À koo à jɛ ŋa igũ nɔ à lele ŋa à bɔ hee Koba iyi í wa kɔkɔi Damasiu do ikpa awɔ njɛi kpãai inunu. 16Í gba amani nŋa ŋau fei wa nɔ í gba Lɔtu wa do mii iyi í nɛ fei hee do amanɛ ŋa do abo nŋa ŋa.

Mɛɛkizedɛki í weea Aburamu

17Waati iyi Aburamu í jɛ Kedɔɔlaɔmɛɛ igũ do ilaalu ŋa iyi à wa bi tɛɛu ŋɔi í sinda wa baa. Nɔ ilaalui Sodomu í bɔ ku koɛ tengii angbɔɔi ilaalu iyi à ya kpe Saveu. 18Ŋɔi Mɛɛkizedɛki ilaalui Salɛmu í naaò pɛ̃ɛ wa do atɛ̃ vɛ̃ɛ. Wee mɔkɔu woo weei Ilaaɔ̃ iyi í re mii feii. 19Nɔ í weea Aburamu í ni, Ilaaɔ̃ iyi í re mii fei iyi í taka lele do ilɛ ku weeɛ. 20Ka saabu Ilaaɔ̃ iyi í re mii fei, nŋu iyi í daɛ mbɛɛ ŋa si awɔ.

Nɔ andi mii iyi Aburamu í ba wa, si mɛɛwa fei í nya akã í naa.

21Si anyii nŋu nɔ ilaalui Sodomu í sɔ̃ Aburamu í ni, nam inɛ ŋa iyi ì gba wau nɔ i so amaniu fei ku jɛ titɛɛ.

22Ŋɔi Aburamu í jɛa ilaalui Sodomuu í ni, ǹ wa n sɔ̃ ŋɛ ntɔ do irii Aɔ̃ Lafɛ̃ɛ, nŋu iyi í jɛ Ilaaɔ̃ iyi í re mii fei nɔ iyi í taka lele do ilɛ, 23n kaa n so nkãma iyi í jɛ ti inɛɛ ŋa, baa ikũ kusii, baa ikũi baata, ku ba i maà na i ni awɔi ì cem amanɛ. 24N kaa n so nkãmaɛ bii kù jɛ iyi á jɛ ikpɛ̃i inɛ ŋa iyi à sim do iyi awaasũm ŋa à jɛ. Anɛɛ do Esikoli do Maree aŋa mɔ aa ce ikpɛ̃i tu ŋa.

Currently Selected:

Kusintii Andunya 14: MKL

Highlight

Copy