Kufita 18
18
Zetoro í bɔ Moizi ku cɔ
1Zetoro anai Moiziu woo weei wa jɛ si ilɛi Madiãa. Ŋɔi í gbɔ mii iyi Ilaaɔ̃ í ce na aranfãanii Moizi do inɛi Izirɛli ŋa fei. Í gbɔ iyi Aɔ̃ Lafɛ̃ɛ í nya inɛɛ ŋa wa hai ilɛi Ezibiti. 2Wee í ko Moizi í tako í jɔ̀ Sefora aboɛu í nɛ bi Zetoro anaɛu bɛ. 3Ŋɔi Zetoro í gbaa nŋu do ama minjiɛ ŋau bi tɛɛ. Inɛ akã Gɛɛsomui aa ya kpoo, domi Moizi í ni, si ilɛ iyi ǹ wa isɛ mmui ǹ wa n jɛ. 4Inɛ akã mɔ Eliezɛɛi à ya kpoo domi Moizi í ni má, Aɔ̃ Lafɛ̃ɛi baam í sobim nɔ í faabam í jɔ̀ Faraɔ̃ kù kpam.
5Ŋɔi Zetoro do amu ŋau do aboi Moiziu à koo à ba Moizi ŋa si gbaau tengi bii à ce asɔ kɔkɔi iri kuta iyi à ya kpe iri kutai Ilaaɔ̃#18:5 iri kutai Ilaaɔ̃ Iri kutai Sinaii à waa fãa tengi bɛ.. 6Ŋɔi í ni a sɔ̃ Moizi a ni, amu Zetoro anaɛ ǹ naa bi tɛɛ do aboɛ do ama minjiɛ ŋa. 7Nɔ Moizi í fita í bɔ wajui anaɛ í koo í gulɛa nɔ í coo fɔɔ do kubi. Nɔ à waa bee baanii njɛ nɔ à lɔ inɔ ilei acɔi Moizi. 8Ŋɔi Moizi wa sisiaa mii iyi Aɔ̃ Lafɛ̃ɛ í cea Faraɔ̃ do inɛɛ ŋa inɛi Ezibiti ŋau fei na irii inɛi Izirɛli ŋau. Nɔ í sisiaa wahala ŋa iyi à yɛ si kpãau fei do bɛi Aɔ̃ Lafɛ̃ɛ í faaba aŋa. 9Ŋɔi inɔi Zetoro í dɔ̃ do mii jiida ŋa iyi í gbɔ Aɔ̃ Lafɛ̃ɛ í cea inɛi Izirɛli ŋa fei do bɛi í nya ŋa hai si awɔi inɛi Ezibiti ŋa. 10Nɔ í ni, ka saabu Aɔ̃ Lafɛ̃ɛ, nŋu iyi í nya ŋɛ hai si awɔi inɛi Ezibiti ŋau do Faraɔ̃ ilaalu nŋa. Nŋui í faaba ŋɛ hai si gbugbãi inɛi Ezibiti ŋau. 11Nsɛi ǹ mà iyi Aɔ̃ Lafɛ̃ɛ í la í re mii baa yooma fei iyi inɛ ŋa à waa tɔɔ, nɔ í nyisi gbugbãɛ waati iyi í nya inɛi Izirɛli ŋau wa hai si awɔ gbugbãi inɛi Ezibiti ŋau.
12Nɔ í cea Ilaaɔ̃ kuwee iyi à ya jo si ina fei sãa sãa do kuwee mmuɛ gɔ ŋa má. Ŋɔi Arɔ̃ɔ do inɛ ngboi Izirɛli ŋa fei à naa à jɛ do anai Moiziu si wajui Ilaaɔ̃.
Moizi í cica inɛ ngbo ŋa iyi aa ya ce kiiti
13Iyi iju í má daakɔ, Moizi í buba wa kiiti inɛ ŋau nɔ inɛ ŋau à waa leekĩ si wajuɛ hai daakɔ hee alɛ í koo í lɛò. 14Ŋɔi anau í yɛ mii iyi Moizi wa cea inɛ ŋau fei nɔ í ni, mii ì waa ce bɛ do inɛ ŋau ihɛ̃. Na mii í ce ì waa ce icɛ awɔ akã nɔ zamaau ihɛ̃ fei wa leekĩ si wajuɛ hai daakɔ hee alɛ í koo í lɛò. 15Ŋɔi Moizi í jɛaa í ni, inɛ ŋau à naa bi tom nii ku ba n sisi nŋa mii iyi Ilaaɔ̃ í bi a ce. 16Bii à nɛ ide gɔ bi tom nii à ya naa, amui ǹ ya n kiiti ŋa, nɔ n sɔ̃ ŋa mii ŋa iyi Ilaaɔ̃ í bi do woodaɛ ŋa.
17Nɔ anaɛu í sɔ̃ɔ í ni, mii iyi ì waa ce kù sĩa. 18Aa gbɛɛji ŋa ntɔ ntɔ, awɔ do inɛ ŋa iyi à waa naa ide ku beeɛu fei. Icɛu ihɛ̃ í la í reɛ, i kaa yɔkɔ i coo awɔ akã. 19Na nŋu, gbɔ ide iyi an sɔ̃ɛ nɔ Ilaaɔ̃ ku wɛɛ do awɔ. Awɔi aa jɛ irii inɛ ŋau bi Ilaaɔ̃ nɔ i ya kooò ide nŋa ŋa bi tɛɛ. 20Sɔ̃ ŋa mii ŋa iyi Ilaaɔ̃ í bi do woodaɛ ŋa, nɔ i jɔ̀ a mà kpãa iyi aa maa too do mii ŋa iyi aa maa ce. 21Nɔ i cica inɛ ŋa iyi aa yɔkɔ a ce icɛu, inɛ ŋa iyi à waa jirima Ilaaɔ̃ nɔ à waa nɛ si kpãa ntɔ nɔ a maà jɛ woo bi fia do bisi laalɔ ŋa. Nɔ i jilɛ ŋa a jɛ inɛ ngbo ŋa. Inɛ gɔ ŋa a jɛ inɛ ngboi amanɛ dubu, inɛ gɔ ŋa mɔ inɛ ngboi amanɛ cĩɔ, inɛ gɔ ŋa mɔ inɛ ngboi amanɛ ciitaa, nɔ inɛ gɔ ŋa mɔ a jɛ inɛ ngboi amanɛ mɛɛwa. 22Aŋai aa ya maa kiiti inɛ ŋau waati kãma fei, ide iyi í la í re ŋa fei a bɛi a naaò wa bi tɛɛ, amma aŋa taka nŋai aa ya kiiti ide keeke ŋau. Si bɛɛbɛi asoɛ á kaye domi aa baɛ icɛ ŋau ku ce. 23Bii ì waa ce bɛɛbɛ nɔ Ilaaɔ̃ wa nɛɛ, i kaa gbɛɛji araɛ má nɔ inɛ ŋau fei aa ya sinda a nyi ide do laakai ku sũ.
24Ŋɔi Moizi í gbɔ idei anaɛu nɔ í ce bɛi í sɔ̃ɔu fei. 25Nɔ í cica inɛ ŋa iyi aa yɔkɔ a ce icɛu si inɔi inɛi Izirɛli ŋau fei nɔ í jilɛ ŋa a jɛ inɛ ngboi inɛ ŋau, inɛ gɔ ŋa a jɛ inɛ ngboi amanɛ dubu, inɛ gɔ ŋa mɔ inɛ ngboi amanɛ cĩɔ, inɛ gɔ ŋa mɔ inɛ ngboi amanɛ ciitaa, nɔ inɛ gɔ ŋa mɔ a jɛ inɛ ngboi amanɛ mɛɛwa. 26Aŋai à ya maa kiiti inɛ ŋau waati kãma fei. Ide kugaabu ŋaui à ya naaò wa bi Moizi nɔ aŋai à ya kiiti ide keeke ŋau fei.
27Ŋɔi anaɛu í tɔɔɛ sukudɔ̃ nɔ í sinda í nyi ilɛi ideɛ.
Currently Selected:
Kufita 18: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
