Kufita 17
17
Inyi í fita hai si kuta
1Inɛi Izirɛli ŋau fei à nɛ hai gbaa iyi à ya kpe Siniu si bɛi Aɔ̃ Lafɛ̃ɛ í sɔ̃ ŋa. Nɔ à waa nɛ kpɛlɛ kpɛlɛ hee à to Refidimu. Tengi bɛi à buba, amma a kù ba inyi iyi aa mɔ. 2Nɔ à koo à waa baò Moizi ija à ni, na wa inyi ka mɔ.
Ŋɔi Moizi í jɛ nŋa í ni, bɛirei í ce ì waa dɛ ijam ŋa. Bɛirei í ce ì waa cɔ laakai Aɔ̃ Lafɛ̃ɛ bɛɛbɛ ŋa.
3Amma si bɛi agbɛ wa mante ŋa, à wasi ku gbagba si Moizi à waa ni, na mii í ce ì nya wa hai ilɛi Ezibiti ka na ka ku do agbɛ, awa do ama nwa ŋa do mɛɛmu nwa ŋa.
4Nɔ Moizi í dɔ̃ anu si Aɔ̃ Lafɛ̃ɛ í ni, bɛirei an cea inɛ ŋau ihɛ̃. Í gbe keeke a tam kuta a kpam. 5Ŋɔi Aɔ̃ Lafɛ̃ɛ í jɛa Moizi í ni, so golo iyi ì tako ì cãò idoi Nili, nɔ i koo si wajui inɛ ŋau, awɔ do inɛ mbɔi inɛ ngbo nŋa ŋau. 6Nɔ an koo n maa n leekĩ bi kuta gɔ si iri kutai Ɔrɛbu. I naa wa bɛ ŋa, nɔ i cã kutau do goloɛu, inyi á fita nɔ inɛ ŋau a mɔ.
Bɛɛbɛ mɔi Moizi í ce si wajui inɛ ngbo ŋau.
7Nɔ í sɔ tengi bɛ Masa do Meriba, waatɔ laakai ku cɔ do ija ku dɛdɛ. Í sɔ inyau bɛɛbɛi si na iyi í jɔ̀ inɛi Izirɛli ŋa à dɛdɛ ijaɛ nɔ à cɔ laakai Aɔ̃ Lafɛ̃ɛ, à waa ni, Aɔ̃ Lafɛ̃ɛ í wa bi tu wa mbɛ de mà kù wɛɛ.
Inɛi Amalɛki ŋa à ba inɛi Izirɛli ŋa igũ ku ce
8Inɛi Amalɛki ŋa à naa ku ba inɛi Izirɛli ŋa igũ ku ce Refidimu. 9Ŋɔi Moizi í sɔ̃ Zozue í ni, cica inɛ ŋa nɔ i koo i ce igũ ŋa do inɛi Amalɛki ŋau. Nɔ ala an maa n leekĩ si antaii iri kutau nɔ n maa n mu goloi Ilaaɔ̃ si awɔ.
10Nɔ Zozue í bɔ igũu ku ce si inɛi Amalɛki ŋau si bɛi Moizi í sɔ̃ɔu, nɔ Moizi takaɛ í gũ antaii iri kutau nŋu do Arɔ̃ɔ do Uu. 11Bii Moizi í wu awɔɛ lele, inɛi Izirɛli ŋai gbugbã nŋa í ya re. Amma bii í baaò awɔɛ wa ilɛ, inɛi Amalɛki ŋai à ya re do gbugbã. 12Waati iyi awɔi Moizi ŋau à na à gbɛɛji, ŋɔi Arɔ̃ɔ do Uu à koo à so kuta gɔ wa à naa à jilɛa Moizi í buba si. Nɔ aŋa minjiu à waa leekĩ cingaa do cingaaɛ à waa mu awɔɛ ŋau lele. Nɔ bɛɛbɛi awɔɛ ŋau fei à wa lele hee inunu í koo í lɔò. 13Nɔ Zozue í jɛ inɛi Amalɛki ŋau igũ.
14Ŋɔi Aɔ̃ Lafɛ̃ɛ í sɔ̃ Moizi í ni, kɔ iyi bɛ fei si tia gɔ ku ba i maà gbɛjɛ ŋa. Nɔ i sɔ̃ Zozue i ni an kpa inɛi Amalɛki ŋa hee inɛ kãma kaa ye gigi nŋa si ilɛu ihɛ̃ má.
15Ŋɔi Moizi í ma bi kuwee gɔ nɔ í sɔɔ iri í ni, Aɔ̃ Lafɛ̃ɛi í jɛ tuutam. 16Nɔ í ni má, si na iyi í jɔ̀ inɛi Amalɛki ŋa à ce igũ do Aɔ̃ Lafɛ̃ɛ takaɛ, nŋui í jɔ̀ Aɔ̃ Lafɛ̃ɛ mɔ á maa ce igũ do aŋa hee do ajɔ fei.
Currently Selected:
Kufita 17: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
