Kufita 15
15
Iri ku kɔ̃i Moizi do inɛi Izirɛli ŋa
1Ŋɔi Moizi do inɛi Izirɛli ŋau à kɔ̃a Aɔ̃ Lafɛ̃ɛ iri à ni,
an kɔ̃a Aɔ̃ Lafɛ̃ɛ iri.
Do amboe nlaɛi í jɛ igũ,
í tale si acĩ ŋa do masa ŋa si tenku.
2Aɔ̃ Lafɛ̃ɛi í jɛ gbugbãm,
nŋui í faabam, an kɔ̃aa iri.
Nŋui í jɛ Lafɛ̃ɛm an saabuɛ,
nɔ í jɛ Lafɛ̃ɛi baam, an sisi kulaɛ.
3Nŋui í jɛ woo jɛ igũ ilu wɔɔkɔ,
iriɛi Aɔ̃ Lafɛ̃ɛ.
4Í so sarɛtii igũi Faraɔ̃
do woo ce igũɛ ŋa fei
í tale ŋa si tenku.
Inyii Tenkui Njee í jɛ soogeɛ ŋa
iyi à re do gbugbã.
5Inyiu í bii ŋa.
À mile hee lɛlɛi inyiu
bɛi kuta ŋa.
6Aɔ̃ Lafɛ̃ɛ, gbugbãi awɔ njɛɛ í la,
do nŋui ì ya lɛgɛò mbɛɛɛ ŋa.
7Kulaɛ í caa,
í ya kɛkɛ mbɛɛɛ ŋa.
Idɔɔkɔ̃ɛ í yɛi bɛi ina.
Í ya jo ŋai bɛi fɔfɔ ngbɛ.
8Do fufui imɔɛi ì tɔtɔɔ inyiu cingaa do cingaa,
nɔ í nɛ sisima í ce bɛi idĩ.
9Mbɛɛ nwa ŋa à tɔɔ fufu à ni,
aa ka da hãmɛ nŋa káa mu ŋa wa.
Aa ka yɔ taakuba nwa ka kpa ŋaò,
nɔ ka ko amani nŋa ka kpɔ̃ɔ
inɛ fei ku ba bɛi í bi.
10Amma awɔ Lafɛ̃ɛ,
do fufui imɔɛi ì jɔ̀ inyiu í bii ŋa,
nɔ à mile si inyiu bɛi isɔ ku wo.
11Aɔ̃ Lafɛ̃ɛ, mii í la í toɛ
si mii iyi inɛ ŋa à waa tɔɔ fei.
Yooi í toɛ do kumá nla nlaɛ.
Yooi í toɛ iyi í jɔ a saabu.
Yooi í toɛ do maamaake ŋa ku ce.
12Iyi í tɛ awɔ njɛɛ ilɛ í mi ŋa.
13Do araareɛi ì gbã inɛɛ ŋau nɔ ì faaba ŋa.
Do gbugbãɛi ì bɔò ŋa bi kuwaɛ iyi í má.
14Dimi mmu gɔ ŋa à gbɔ ideu
ŋɔi à yaya do njo.
Njo í mu inɛi Filisi ŋa.
15Ilaalui ilɛi Edɔmu ŋa zigi nŋa í da,
bɛɛbɛ mɔi do inɛ ngboi Moabu.
Inɛi Kanaã ŋa mɔ a kù nɛ wɔɔkɔ má.
16Njo nla nla í mu ŋa.
Na gbugbãi awɔɛi njo í jɔ̀ à yɛ bɛi wɛɛgɛ
hee inɛɛ ŋa à lɔ,
aŋa iyi ì ra a jɛ tɛɛ.
17Bɛbɛi ì waa bɔò ŋa si iri kuta iyi ì cica ku jɛ titɛɛu.
Si iri kutau bɛi aa koo a buba.
Aɔ̃ Lafɛ̃ɛ, awɔ takaɛi ì ce sɔɔlui bi kuwaɛ tengi bɛ.
Kpasɛ̃u, awɔ takaɛi ì jilɔɔ ku jɛ bi kuwaɛ.
18Aɔ̃ Lafɛ̃ɛ, awɔi ì jɛ ilaalu hee do ajɔ fei.
19[À kɔ̃ iriu ihɛ̃i] si na iyi í jɔ̀ waati iyi acĩi Faraɔ̃ ŋa do sarɛtii igũɛ ŋa do masaɛ ŋau à lɔ inɔ tenkuu, Aɔ̃ Lafɛ̃ɛ í jɔ̀ inyiu í bii ŋa. Amma inɛi Izirɛli ŋau à kua tenkuu si ilɛ ngbɛ.
20Ŋɔi Mariama walii inaabo iyi í jɛ wecĩi Arɔ̃ɔ, í so gãgã keeke gɔ wa cã. Nɔ inaabo ŋa fei à waa too fitiɛ, à waa cã gãgã keeke nŋa ŋa à waa jojoò. 21Mariamai í ya tako ku kɔ̃ ku ni,
i kɔ̃a Aɔ̃ Lafɛ̃ɛ iri ŋa.
Do amboe nlaɛi í jɛ igũ,
í tale si acĩ ŋa do masa ŋa si tenku.
Inyii Mara
22Moizi í gbã inɛi Izirɛli ŋau hai bi Tenkui Njeeu nɔ à kã iri ikpa gbaa iyi à ya kpe Suu. Si isɛɛnɛ nŋa ajɔ mɛɛta si gbaau a kù ba inyi kãma. 23Waati iyi à to Mara à ba inyi bɛ, amma a kù yɔkɔ a kù mɔ inyi iyi í wa bɛu domi í roi. Nŋui í jɔ̀ à ya kpe inyau Mara, waatɔ kuro. 24Ŋɔi inɛ ŋau à waa gbagba si Moizi à waa ni, mii aa ka mɔ. 25Nɔ Moizi í tɔɔ Aɔ̃ Lafɛ̃ɛ nɔ Aɔ̃ Lafɛ̃ɛ í nyisiɛ jĩi gɔ. Nɔ Moizi í so jĩi nɔu í sɔsi inɔ inyiu nɔ inyiu í baa í dɔ̃.
Hai Mara bɛi Aɔ̃ Lafɛ̃ɛ í na inɛ ŋau wooda iyi aa maa mu, nɔ í sɔ̃ ŋa yaase bɛi aa maa jɛò kuwɛɛ nŋa. Tengi bɛ mɔi í cɔ laakai nŋa. 26Í ni, bii ì waa gbɔ imui ide ku fɔi amu Aɔ̃ Lafɛ̃ɛ nŋɛ do laakai, bii ì waa ce iyi í tɛ si wajum ŋa, nɔ ì waa de itĩ si woodam ŋa, nɔ ì waa jirima wooda ŋau fei ŋa, n kaa n dasi ŋɛ bɔ̃ɔ kãma bɛi ǹ dasi inɛi Ezibiti ŋau. Amui ǹ jɛ Aɔ̃ Lafɛ̃ɛ nŋɛ, nɔ amui an faaba ŋɛ hai si bɔ̃ɔ nŋɛ.
27Si anyiɛ nɔ à to Elimu, tengi bii isɔ̃ maateeji do kpakpa icu kitaò fɛɛwa (70) í wau. Tengi bɛi à buba kɔkɔi inyiu.
Currently Selected:
Kufita 15: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
